Mashitanguti 27
27
Lipulelo ze butali
1 #
Jak 4.13-16
U si ke wa lika ku ikuhumusa ka ze taha. Ha u zibi se si ta ezahala mwahal'a kacenu ni kamuso.
2Lumbiwa ki batu, mane nihaili bazamai. Wena u si ke wa itumba ni hanyinyani.
3Bukiti bwa licwe ni mushabati ha bu likanyezwi ni mufili-fili o tiswa ki bukuba.
4Buhali bu na ni lunya ni ku shandaula, kono ha li likanyezwi ni muna.
5Bunde ki ku nyaza mutu patalaza, ku fita kuli a hupule kuli ha u na taba ni yena.
6Mulikan'a hao nih'a ka ku utwisa butuku, u sa li yo munde. Kono sila sa hao h'a ku kambeka mazoho fa maheta, tokomela!
7Mutu h'a kusi, u hana nihaili linosi, kono h'a lapile, nihaili lico ze baba, ku yena za tabusa.
8Munna h'a zwile mwa hae u swana ni nyunywani ye zwile mwa siyaleto.
9Lukumba ni mafula a nunka hande za ku tabisa, mi ni bulikani bo bu tiile bu ku fa maata.
10U si ke wa libala balikani ba hao, kamba balikani ba ndat'aho. Haiba u mwa ziezi, u si ke wa kupa tuso ku munyan'a hao. Y'o bapani ni yena wa kona ku ku tusa ku fita munyan'a hao ya kwahule.
11U be ni butali, mwan'a ka, mi ni ta taba. Ni ta ba ni kalabo ku ufi ni ufi ya ni nyaza.
12Mutu ya na ni ngana u bona mufili-fili ha u taha, mi wa u pima, kono ya si na ngana wa pululeza feela, kihona a ka inyaza mwamulaho.
13Mutu ufi ni ufi ya eza bukuba bwa ku sepisa ku ba ni buikalabelo ka sikoloti sa muzamai u lukela ku amuhiwa liluwo la hae ku eza swalelele, konji fo si ka lifelwa.
14Ku pakelela ku zusa mulikan'a hao ka ku mu lumelisa ka linzwi le lituna kwa swana ni ku mu lwahaka.
15Musali ya bulela hahulu u swana ni milupi pula ha i sa kauzi.
16U ka mu kuzisa cwañi? Kana u kile wa lika ku kuzisa moya, kamba ku lika ku swalelela lizoho le li tezi la mafula a oli, nji?
17Batu ba ituta ku ba bañwi, sina sipi ha i looza sipi ye ñwi.
18Babalela kota ya feiga mi u ta ca miselo ya yona. Mutanga ya babalela mulen'a hae u ta kutekiwa.
19Ki pata ya hao luli y'o bona mwa mezi, mi ki wena kasibili y'o bona mwa pilu ya hao.
20Litakazo za mutu li swana ni naha ya ba ba shwile, mi ka nako kaufela ku na ni sibaka sa ba bañwi.
21Gauda ni silivela li likiwa ka mulilo. Mukwa wa mutu ni ona u likiwa ka ku mu lumba.
22Sikuba niha u ka mu nata ku bata ku bulaya, u ka na a li sikuba cwalo kuya kuile.
Pabalelo ya sicaba
23Tokomela lingu ni likomu za hao mo u konela kaufela.
24Bufumu ha bu ineleli kuya kuile. Nihaili yona mibuso ha i ineleli.
25Mweta bucwañi, mi ha bu sa hula u kona ku mweta bo buñwi kwa malundu.
26Wa kona ku ikezeza liapalo ka boya bwa lingu za hao, ni ku leka sisa ka mali o fumani fa tekiso ya lipuli ze ñwi za hao.
27Mabisi a lipuli ze ñwi a kona ku ku fepa, wena ni lubasi lwa hao, ni basizana ba ba ku belekela cwalo.
Lozi Interconfessional Bible, Catholic Edition © Bible Society of Zambia, 2009.