Mashitanguti 26
26
Sitoto
1Ha ku lukeli ku lumba sikuba, sina mezi a kangelisizwe ki silami mbumbi, kamba pula maliha.
2Matapa h'a koni ku ku utwisa butuku konji haiba a ku swanela. A swana ni linyunywani ze fufa-fufa li sa luli.
3U na ni ku nata pizi, ku beya mbongolo tumo, mi ni wena haisi kuli u nate sikuba.
4Haiba u alaba puzo ya butanya, ni wena u litanya ya swana ni ya i buzize.
5Fa kalabo ya butanya kwa puzo ya butanya, mi ya i buzize u ta lemuha kuli h'a na ngana sina mw'a hupulela.
6Mutu ya lumelela sikuba ku bulela litaba, n'a swanela feela ku ipumaka mahutu. U ipatela mufili-fili.
7Sikuba si kona ku itusisa nguli sina sihole sa mahutu ha si kona ku itusisa ona.
8Ku lumba sitoto ku na ni ngana ye swana sina ya mutu ha ka tama licwe kwa kafwililo.
9Sitoto h'a ka bulela lipulelo za ngana, ku ku hupulisa mutu wa litahwa h'a lika ku zwisa muutwa kwa lizoho la hae.
10Ya kenya sikuba se si izamaela fa musebezi u utwisa ba ba mwa musebezi wo butuku.
11 #
2 Pit 2.22
Sikuba se si kutela ku eza sika lwa bubeli u swana ni nja ye kutela ku ca mataza a yona.
12Mutu wa sikuba sa mafelelezo u mbubo-mbubo ku fita ya ikupula kuli u butali mi a si cwalo.
Nabutolo
13Kiñi mutu ya buzwa ha sa zwi mwa ndu ya hae? U sabañi? Litau, nji?
14Ya buzwa u fetauha fa mumbeta wa hae. U swana ni sikwalo se si nyendaela fa lisipi ze si sweli, si nze si ya kafa ni kafa.
15Batu ba bañwi mane ba palelwa ni ku tafuna lico za bona kabakala buzwa.
16Mutu ya buzwa u ta hupula kuli u na ni ngana ku fita batu ba supile ba ba ka fa mabaka a mande ka mihupulo ya bona.
Mukatazi
17Ku kena mwa kañi ye sa ku ami ku swana ni ku zamaya mwa nzila u katana nja ni ku i swala.
18Sipulumuki se si bapalisa silemanu ki sibangoki. 19Mutu ya cwalo ki ya teza wahabo mi mwamulaho u li n'a eza feela lishea.
20Ha ku si na likota, mulilo wa tima. Ha ku si na lusebo, likañi za fela.
21Mashala a cisisa mufuse, likota li tukisa mulilo, mi batu ba milifi-fili ba zwisezapili likañi.
22Lusebo ki lo lunde! Lu tabela ku lu miza!
Muipi
23Pulelo ye sa sepahali, ye pata s'o hupula luli, i swana sina liñolanyi a mande a fa piza ye sa tuli ya lizupa.
24Muikezisi u pata sitoyo sa hae mwa manzwi a ku puma-puma. 25A ka na a ba a tabisa, kono u si ke wa kolwa, kakuli pilu ya hae i tezi hahulu lutimbo. 26Wa kona ku pilula lutimbo lwa hae, kono mutu kaufela u ta bona likezo za hae ze maswe z'a eza.
27 #
Litu 27.25-27
Batu ba ba teela ba bañwi liteo ki bona hape ba ba swaseha mwateñi. Batu ba ba kala ku pindumuna macwe, a ta ba pyata.
28Ka ku toya yo muñwi u bata ku mu utwisa butuku ka za buhata. Lipulelo ze sa sepahali ha li tisi se siñwi haisi feela bumai.
Lozi Interconfessional Bible, Catholic Edition © Bible Society of Zambia, 2009.