Mashitanguti 28
28
Miinelo ya bupilo bwa sicaba
1Batu ba ba maswe ba mata ku si na ya ba lelekisa, kono batu ba ba sepahala ba na ni bundume sina tau.
2Sicaba si ta ba ni maata ni ku pila hande ha si na ni ngana, ni bazamaisi ba ba na ni butali. Kono sicaba ha si na ni sibi, si ta ba ni bazamaisi ba bañata mwa nako ye kuswani.
3Mutu wa mubusi h'a nyandisa babotana u swana ni liñungwa le li til'o sinya lico.
4Haiba u sa sabi mulao u kwa neku la ba ba maswe, kono ha u saba mulao u lwanisa ba ba maswe.
5Batu ba ba maswe ha ba zibi taba ye lukile, kono ba ba lapela Muñ'a Bupilo ba i utwisisa hande.
6Bunde ki ku ba mubotana ya sepahala ku fita ku fuma u sa sepahali.
7Yo munca ya buluka mulao u na ni ngana. Ya ikeza bulikani ni ba ba si na tuso u swabisa ndat'ahe.
8Haiba u bata ku fuma ka ku bata ñambeko ni ku putelela batu, tutu ya hao i ta ya ku yo muñwi ya na ni musa kwa babotana.
9Haiba u sa utwi mulao, Mulimu u ta toya ku utwa litapelo za hao.
10Kenya mutu ya lukile mwa bumaswe ka ku mu puma-puma mi ki wena ya ka wela mwa siteo sa hao luli.
Ba ba si na mulatu ba ta fumana mupuzo o munde.
11Batu ba ba fumile hañata ba hupula kuli ba butali, kono mubotana ya na ni ngana ya ku lemuha lika wa ba fita.
12Batu ba bande ha ba busa, mutu ni mutu wa bina, kono ha ku busa ba ba maswe, batu ba y'o ipata.
13Ha u na ku ba ni buiketo mwa bupilo haiba u lika ku pata libi za hao. Li bulele mi u tuhele. Fohe Mulimu u ta ku bonisa musa wa hae.
14Saba Muñ'a Bupilo ka nako kaufela mi u ta ba ni litohonolo. U be ni mahanyi mi u ta sinyeha.
15Batu ba babotana ha ba koni ku itusa ku mulena ya maswe. U na ni kozi sina tau ye lila, kamba sibatana se si nanalela.
16Mubusi ya si na ngana hande u ta ba ni lunya ni ku nyandisa. Ya toile bumaswe u ta busa nako ye telele.
17Mutu ya na ni mulatu wa ku bulaya u ikepela libita la hae kapili-pili. U si ke wa lika ku mu tuhelisa.
18U be ya lukile mi u ta iketa. U be ya si ka luka mi u ta palelwa.
19Mulimi ya sebeza ka tata u ba ni lico ze ñata. Batu ba ba sinya nako ba ta ba babotana nako kaufela.
20Mutu ya lukile u ta pila bupilo bo bu na ni buiketo ni tabo. Kono haiba u akufela ku bata ku fuma, u ta utwiswa butuku feela.
21Ya na ni sobozi u maswe. Kono baatuli ba bañwi ba ka fosa kuli ba amuhele nihaili mpo ye nyinyani ya kweta.
22Mutu wa pilu-seta u akufela ku ba mufumi mi mane h'a zibi kuli bubotana bu tuha bu mu kena.
23Sikulula mutu, mi mwamulaho u ta itumela ku fita mutu wa kalembeshwa.
24Mutu ya hupula kuli ku uzweza bashemi ba hae ha ki foso, yo u likana feela ni lisholi la ku sili.
25Pilu-seta i tisa feela mufili-fili. Ha u sepile Muñ'a Bupilo u iketile.
26Ki bukuba ku latelela mihupulo ya hao. Ikete, mi u latelele lituto za ba ba butali.
27Tusa babotana mi ha ku na s'o ka tokwa. Kono ya ikezisa kuli ha ku na bubotana u ta kutiwa ki batu ba bañata.
28Batu ba ipata ha ku busa ya maswe. Kono h'a zwa fa ku busa, batu ba ba lukile ba yola mi ba busa hape.
Lozi Interconfessional Bible, Catholic Edition © Bible Society of Zambia, 2009.