Mashitanguti 25
25
Manzwi a Salumoni hape a butali
1Ki ze hape lipulelo za butali bwa Salumoni. Li kopisizwe ki bañoli ba Mulena Ezekiasi wa Juda.
Ka za malena
2Lu kuteka Mulimu ka z'a patile, mi lu kuteka malena ka ze ba talusa.
3Ha u koni ku ziba s'a hupula malena. Mihupulo ya bona i fahalimw'a ya luna. I swana sina buhule bwa lihalimu, kamba buliba bwa liwate.
4Zwisa mawiliwili kwa silivela, mi mumbuti u ta eza nto ye nde. 5Lelekisa baelezi ba ba maswe ku mulena, mi mubuso wa hae u ta zibahala ka likatulo ze nde, ze lukile.
6 #
Luk 14.8-10
Ha u li fapil'a mulena, u si ke wa iponahaza ku yena kuli u yo mutuna ku fita mo u inezi. 7Ki bunde ha u ne u ka kupiwa ku nga sipula se si pahami, ku fita ku bulelelwa kuli u zwe fa sipula seo, u si fe yo muhulu ku wena.
Likañi
8U si ke wa akufela ku ya kwa kuta ka nto ye u iponezi ka meeto a hao. Haiba ka bupaki bwa yo muñwi ku ka fumaneha mutu yo muñwi ya ka bonisa hande kuli wena u na ni milatu, cwalehe wena u ta eza cwañi?
9Haiba wena ni y'o bapani ni yena mu sa utwani, mu felise taba sibeli sa mina mu sa putululi likunutu za mina lifi kamba lifi. 10Hakusicwalo mutu kaufela u ta lemuha kuli ha mu pati kunutu. Mu ka sinyeha mabizo kuya kuile.
11Muhupulo o bulezwi hande u swana ni kabisa ya gauda ye beilwe mwa silivela.
12Temuso ye bulezwi hande ki mutu ya na ni butali ku mutu ya tabela ku utwa ki ya butokwa hahulu ku fita maseka a gauda, kamba likabiso ze ezizwe ka gauda ye nde ka ku fitisisa.
13Mulumiwa ya sepahala u wisa ya mu lumile pilu. U swana sina mezi a bata mwahal'a musebezi wa kutulo.
14Batu ba ba sepisa limpo ba sa li fani ba swana ni malu ni moya a sa tisi pula.
15Ku susueza ka musa ku kona ku fuyula ya n'a s'a hanile ku hanelela, mane a kolwise ni babusi.
Buiswalo
16U si ke wa ca hahulu linosi. Ha u li ca hahulu li ka ku tazisa.
17Y'o yahile ni yena u si ke wa swalelela ku mu potela. Mwendi a ka swana a ku nyikwa, mi a ku toye.
18Mutu ya bulela za buhata ka ya bapani ni yena u na ni kozi sina sabule, mulamu, kamba lisho le li shengile.
19Ku beya sepo ku mutu ya sa sepahali mwa ziezi ku swana ni ku tafuna ka liino le li shekesha, kamba ku zamaya ka lihutu le li holofezi.
20U ka na wa lika ku futumalelwa zazi ku bata ka ku tubula liapalo za hao? Ku opelela mutu ya mwa maswabi ku swana ni ku sasa lizwai fa sitombo.
21 #
Baro 12.20
Haiba sila sa hao a lapile, mu fe lico a ce. Haiba a nyolilwe, mu fe mezi a nwe. 22U ka mu bulaisa maswabi, mi Muñ'a Bupilo u ta ku fa mupuzo.
23Lusebo lu tisa bunyemi, ki niti, sina moya wa mutulo mo u tiseza pula.
24Bunde ki ku ina fa ngandaleza ku fita ku ina mwa ndu ni musali ya bulela hahulu.
25Ku utwa litaba ze nde ze zwa kwa naha ya kwahule ku swana ni ku nwa mezi a bata poo ha u kangukile u nyolilwe.
26Mutu ya lukile h'a lumela za ya maswe u ku hupulisa musindi wa mezi a lubehile, kamba siliba mo ku beilwe mulyani o bulaya.
27Linosi le liñata li maswe mwa mubili wa hao. Ku cwalo ni kwa ku bata ku lumbiwa hahulu.
28Haiba ha u koni ku iswala ha u nyemile, ha u na tuso. U swana sina munzi o si na lukwakwa, o lwaniswa ka bunolo.
Lozi Interconfessional Bible, Catholic Edition © Bible Society of Zambia, 2009.