Mashitanguti 24
24
Likelezo zeñwi
-19-
1U si ke wa shwela muna batu ba ba maswe, mi u si ke wa iswala ni bona bulikani. 2Ze ba hupula feela ki ku eza mifili-fili. Ka nako kaufela ha ba kwalula milomo ya bona, yo muñwi haisi kuli a nyeme.
-20-
3Minzi i yahilwe fa mutomo wa butali ni kutwisiso. 4Fo ku na ni zibo, mizuzu i tezi ya za butokwa ili lika ze nde.
-21-
5Ku ba ni butali ki ko kunde ku fita ku ba ni maata. Ee, zibo ki ya butokwa hahulu ku fita tata. 6Hakulicwalo, u swanezi ku eza milelo ka tokomelo pili u si ka kena kale mwa ndwa, ni likelezo ze nde z'o fumana ni ku tula kwa hao mwendi ku ta ba cwalo.
-22-
7Lipulelo za ngana li tungile hahulu ku mutu wa sikuba ku li utwisisa. H'a na s'a bulela ha ku ambolwa litaba ze tuna.
-23-
8Haiba u lela bumaswe nako kaufela, u ta biziwa mufilikanyi. 9Mulelo ufi ni ufi o hupulwa ki sikuba ki sibi feela. Batu ba toile mutu ya si na se siñwi haisi ku shendaula ba bañwi.
-24-
10Haiba u fokola mwa maziezi, wa fokola luli ki niti.
Likezo ku ba ba pila ni mutu
-25-
11U si ke wa lika-lika ku pilisa mutu ya hohelwa kwa ku y'o bulaiwa ku si na libaka. 12U ka na wa li ha ki taba ya hao yeo, kono Mulimu wa ziba mi u atula minahano ya hao. U ku talimezi. Wa ziba. Mi u lifa batu ka ze ba eza.
-26-
13Mwan'a ka, ca linosi. Ki le linde. Linosi le li zwa mwa ngoma li munati fa lilimi. 14Ni cwalo zibo ni butali ki ze nde mwa pilu. Li nge, mi kwapili u ta ba ni buiketo.
-27-
15U si ke wa eza mulelo wa ku y'o amuha mutu ya lukile, kamba ku y'o nga ndu ya hae. Ki sibi. 16Mutu ya lukile nih'a ka wa hañata wa zuha hape. Kono kozi i sinya ba ba maswe.
-28-
17U si ke wa taba, sila sa hao ha si tahelwa ki ziezi. U si ke wa nyakalala h'a sitatala. 18Muñ'a Bupilo u ta ziba haiba kwa ku tabisa, mi h'a na ku tabela kezo yeo. Mwendi cwale h'a na ku mu utwisa butuku.
-29-
19U si ke wa lumela ku katazwa ki batu ba ba maswe. U si ke wa ba shwela muna. 20Mutu ya maswe h'a na za kamuso. Ha ku na ze taha z'a libelezi.
-30-
21Mwan'a ka, saba Muñ'a Bupilo, mi u sabe ni mulena. U si ke wa kopana ni batu ba ba ba fetuhela. 22Batu ba ba cwalo ba ka sinyeha ka nakonyana feela. Kana ha u lemuhi kozi y'a ka eza Mulimu kamba mulena, nji?
Lipulelo ze ñwi hape za butali
23Batu ba ba butali ba bulezi hape lipulelo ze.
Ku maswe ku muatuli ku ba ni sobozi. 24Haiba a atula sifosi kuli h'a na mulatu, u ta kutiwa ni ku toiwa ki mutu ufi ni ufi mwa lifasi. 25Baatuli ba ba fa sifosi mulatu, ba ta iketa mi ba be ni libizo le linde.
26Kalabo ya niti ki sisupo sa bulikani bwa niti.
27U si ke wa yaha ndu pili ni ku eza munzi ku fitela masimu a hao a luka, mi h'a lukile u ta ba ni niti ya kuli u ta fumana bupilo.
28U si ke wa fa bupaki bwa ku lwanisa y'o yahile ni yena u si na libaka le linde, kamba ku mu tameleza za buhata. 29U si ke wa li, “Ni ta mu eza sina mw'a n'a ni ezelize ni na! Ni ta swana ni yena!”
30Ni zamaile mwa masimu ni mwa likota za veine za mutu ya buzwa, wa sikuba. 31Ne ku tezi macacani a mikakani, mi ku hulile bucwañi. Lukwakwa lwa macwe lo lu a potolohile lu se lu wile. 32Na lu talima, na nahana mi na ituta tuto ka lona. 33#Mash 6.10-11 Zwelapili mi u ozele. Zwelapili u lobale. Puta mazoho a hao, u pumule nakonyana. 34Konohe ha u sa lobezi cwalo, bunjebwe bu ta ku lwanisa sina lisholi le li sweli lilwaniso.
Lozi Interconfessional Bible, Catholic Edition © Bible Society of Zambia, 2009.