Mashitanguti 23
23
Kwa tafule
-6-
1Ha u ina ku ca ni mutu yo mutuna, u hupule kuli ki yo mutuna. 2Haiba u na ni takazo ye tuna, i swale. 3U si ke wa lobela lico ze nde z'a sula. Mwendi u bata ku ku lika.
-7-
4Ba ni butali kuli u si ke wa ikataza ku lika ku fuma. 5Mali a hao a kona ku fela ka nakonyana, inge a melile mafufa mi a fufile sina mbande.
-8-
6U si ke wa cela fa tafule ya mutu ya timana kamba ku lobela lico ze nde z'a sula, a nz'a li, 7“Taha, u t'o nga ze ñwi hape,” mi mwa pilu a sa lati. Kono u sweli ku hupula feela ka za hae ni liteko za sico. 8Sico seo si ta ku nyembunyisa, u ka taza z'o cile kale, mi kalembeshwa ka hao ka ta be ka sinyehile.
Lituso ni likozi
-9-
9U si ke wa lika ku bulela ni sikuba ka za ngana. H'a na ku li tabela.
-10-
10U si ke wa lika ni hanyinyani ku shimbulula mululwani, kamba ku nga naha ya lindiala. 11Muñ'a Bupilo ki yena musilelezi wa bona ya maata, mi u ta ku zekisa ka taba ya bona.
-11-
12U teeleze hande ku muluti wa hao mi u itute z'o ka kona kamukana.
-12-
13U si ke wa lika-lika ku kalimela mwanana. Ku mu nata ha ku na ku mu bulaya. 14Ku bulela feela niti, kikuli wa mu pilisa.
-13-
15Mwan'a ka, haiba u ka ba ni ngana, ni ka taba hahulu. 16Ni ka ikuhumusa ha ni ka ku utwa u bulela manzwi a ngana.
-14-
17U si ke wa shwela batu ba ba maswe muna, kono u zwelepili mwa ku saba Muñ'a Bupilo mazazi kaufela. 18Haiba ku cwalo, u ta ba ni buiketo mwa linako ze taha.
-15-
19Utwa, mwan'a ka. U be ni butali, mi u nahane hahulu ka mukwa o pila ka ona. 20U si ke wa eza siango ni batu ba ba nwa hahulu waine, kamba ba ba fayula lico hahulu. 21Matahwa ni baci ba ta kutisezwa mwa bunjebwe. Haiba s'o eza feela ki ku ca ni ku lobala u tuha u tina mahalaswana.
Tuso ya kelezo ya bushemi
-16-
22U utwe ndat'aho. Kabesi yena kambe ni wena ha u yo. M'aho ha s'a supezi, mu bonise tabo ya hao.
23Niti, butali, tuto, ni ku ba ni ngana, zeo kaufela ki ze nde ku itekela zona, kono ku wena ki za butokwa hahulu ku li lekisa.
24Musehemi wa mutu ya lukile u na ni libaka le li mu tabisa. Wa kona ku ikuhumusa ka mwana ya butali.
25Tabisa bo ndat'aho ni bo m'aho kuli ba ikuhumuse ka wena. U fe m'aho tabo yeo.
Mu tokomele mahule ni waine
-17-
26U teeleze hande, mwan'a ka, mi bupilo bwa ka i be ona mutala wa hao. 27Mahule ni basali ba ba izamaeli ki siteo se si bulaya. 28Ba ku litezi sina masholi, mi ba til'o kenya banna ba bañata mwa ku sa sepahala.
-18-
29Na, ni ka ku supeza ya mwa maswabi mi a inyaza, ya nz'a zusa mifili-fili nako kaufela, ya tola a bilaela. Meeto a hae a fubezi mi u na ni miupa ya n'a kona ku i pima. 30Ki yena mutu ya nwa hahulu, ya nz'a lika mifuta-futa ya ze nwiwa. 31U si ke wa lumela ku likwa ki waine, nihaili ya bufubelu bo bunde, kuli mane wa kona ku ipona mwa komoki, mi i bonahala hande ha u i potolosa. 32Habusa u ta ikutwa kuli inge u n'o lumilwe ki noha ye na ni buhazo hahulu. 33Meeto a hao a ka bona lika ze makaza, mi ha u na ku kona ku hupula kamba ku bulela hande. 34U ta ikutwa kuli inge u n'o li mwa liwate, u bata ku taza, u kwendoka kwa njongo-njongo ya sisepe se si yeyauka, u li, 35“Mwendi ni ngungizwe ki sika, mwendi ni natilwe, kono ha ni hupuli. Kiñi ha ni sa zuhi? Ni sa tokwa ku nwa hape.”
Lozi Interconfessional Bible, Catholic Edition © Bible Society of Zambia, 2009.