Mashitanguti 22
22
1Haiba u lukela ku keta mwahal'a libubo le linde ni bufumu bo buñata, bunde ki ku keta libubo le linde.
2Ha ku na fapahano mwahal'a mufumi ni mubotana, kakuli bubeli bwa bona ba ezizwe ki Muñ'a Bupilo.
3Mutu ya na ni ngana u kona ku bona mufili-fili ha u taha mi wa u picuka, kono mutu ya sa nahani u ta zwelapili cwalo, mi mwamulaho wa inyaza.
4Saba Muñ'a Bupilo, ikokobeze, mi u ta fumana bufumu, ku kutekiwa, ni bupilo bo butelele.
5Haiba u lata bupilo bwa hao, ya kwahule ni liteo ze mwa nzila ze swasa ba ba maswe.
6 #
Litu 6.18
Luta mwanana mw'a lukela ku pilela, mi u ta li hupula mwa bupilo bwa hae kaufela.
7Babotana ki batanga ba ya fumile. Kalima mali mi ni wena u ta ba mutanga wa ya ku kalimile.
8Cala lipeu za bumaswe, mi sinyehelo i ka taha, mi tupa ya buhali bwa hao i ta ku nata.
9Ba ni musa, mi u ikabele lico za hao ni babotana. U ta tohonolofazwa kabakala zona.
10Kauhana ni muikuhumusi, mi likañi, likomano ni mashendekela a ta fela.
11Wa kona ku utwana ni malena ka lilimi le li munati, kono Muñ'a Bupilo u lata mutu ya na ni niti.
12Muñ'a Bupilo u tokomezi kuli niti i bulukiwe ka ku hanyeza manzwi a mahata.
13Mutu ya buzwa u siyala kwa hae, a nz'a li mwendi u ka swalwa ki tau haiba a zwela kwande.
14Buhule ki siteo. Si swasa ba ba nyemezwi ki Muñ'a Bupilo.
15Ka sisimo banana ba eza za butanya, ku sa tokomela, kono tupa i ta ba luta hande.
16Haiba u fa batu ba ba fumile limpo, kamba ku hatelela mubotana kuli u fume, ki wena kasibili ya ta ba mubotana.
Lituto zeñwi za butali
17Teeleza mi ni ta ku luta ze bulezwi ki batu ba ba butali. Itute lituto za bona. 18U ka taba haiba u li hupula, ni ku li bulela.
Lipulelo ze mashumi a malalu za butali
19Ni bata kuli u beye sepo ya hao ku Muñ'a Bupilo. Kikabakaleo ha ni ku bulelela zona hona fa. 20Ni ku ñolezi lipulelo ze mashumi a malalu. Ku zona ku na ni zibo ni likelezo ze nde. 21Li ta ku luta seo niti i li sona. Cwale ha u lumwa ku y'o i bata, u ta kutisa kalabo ye lukile.
-1-
22U si ke wa putelela mubotana kakuli wa kona ku eza cwalo. U si ke wa putelela mutu ya mwa kuta ya si na ya ka mu tusa. 23Muñ'a Bupilo ki yena ya ka ba zekela taba ya bona, mi u ta fumbela bupilo bwa mutu ya ba fumbela.
-2-
24U si ke wa ikeza bulikani ni batu ba ba na ni kacimacima, ni bulwani. 25Mwendi u ka swana wa ituta mikwa ya bona, mi u palelwe ku i tuhela.
-3-
26U si ke wa sepisa ku ba ni buikalabelo ka sikoloti sa mutu. 27Haiba u ka palelwa ku lifa, ba ta nga nihaiba wona mumbeta wa hao.
-4-
28U si ke wa sutisa mululwani o ne u ezizwe kale ki bo kukw'a hao.
-5-
29Ni supeze mutu ya eza musebezi o munde, mi ni na, ni ta ku supeza ya fita ba bañwi, ya lukela ku y'o kopana ni malena.
Lozi Interconfessional Bible, Catholic Edition © Bible Society of Zambia, 2009.