Mashitanguti 1
1
Butokwa bwa buka ya mashitanguti
1 #
1 Male 4.32
Mashitanguti a Salumoni mwan'a Davida, mulena wa Isilaele.
2Ki a mashitanguti a ka tusa batu ku ba ni butali, ni ku utwisisa likelezo ze nde ni lipulelo ze tata. 3A kona ku mi luta ku ba ni ngana, ku ba ba ba sepahala, ni ba ba lukile. 4A kona ku talifisa ya si na zibo, ni ku luta ba banca ku lemuha lika. 5Mashitanguti a, mane a kona ku ekeza kwa zibo ya ba ba butali, ni ku fa sikuka ku ba ba itutile. 6Ka tuso ya ona ba kone ku utwisisa taluso ye ipatile mwa mashitanguti, ni litaba ze tata ze tahiswa ki batalifi.
Kelezo ku ba banca
7 #
Job 28.28; Lipi 111.10; Mash 9.10;
Litu 1.14
Ku ba ni zibo, u swanezi ku kala ku saba Muñ'a Bupilo pili. Batu ba likuba ba shwaula butali, mi ba hana ku ituta.
8Mwan'a ka, teeleza z'a ku luta ndat'aho, mi u utwe z'a ku bulelela m'aho. 9Lituto za bona li ta kondisa mikwa ya hao, i be ye minde sina tukwe ye nde kwa toho kamba sifaha se si ekeza kwa bukabali bwa hao.
10Mwan'a ka, ha u likiwa ki baezalibi u hane likelezo za bona. 11Mwendi ba ka li, “A lu ye lu y'o bandamena mutu, lu mu bulaye!” Kapa “Lu teye ba ba si na mulatu, lu bone se si ka ezahala. 12Lu ka ba fumana ba pila hande, mi ba iketile, kono lu ta ba siya ba shwile! 13Lu ta fumana tutu ya butokwa kaufela, mi lu ta taza mandu a luna ka ze lu ikungezi! 14Taha, u t'o kena ku luna, mi lu ta ikabela ze lu ta uzwa kamukana.”
15Mwan'a ka, u si ke wa zamaya ni batu ba ba cwalo. U ba ambuke. 16Ba akufelanga ku eza ze maswe. Ba itukiselize ku sulula mali a mutu nako kaufela. 17Ha ku tusi ku teela linyunywani katwa fo ku bonahala. 18Kono batu ba ba cwalo ba iteela lilaha ili bona, ili lilaha ze ta ba bulaya. Ha ku na se ba ka swasa haisi bupilo bwa bona. 19Busholi kamita bu zuma bupilo bwa lisholi. Se ki sona se si ezahala ku mutu ufi ni ufi ya pila ka ku uzwa.
Butali bwa biza
20 #
Mash 8.1-3
A mu teeleze! Butali bwa biza mwa mikwakwa ni mwa lipatelo. 21Bu huweleza kwa minyako ya munzi, ni kai ni kai ko ba kopanela batu, bu li,
22“Mina likuba! Mu ta ina nako ye kuma kai mu nze mu li likuba cwalo? Mu ta ina nako ye kuma kai mu nze mu sheununa zibo? Kana, ha mu na ku ituta ni kamuta, nji? 23Mu teeleze ha ni mi kalimela. Ni ta mi fa kelezo ye nde, mi ni ikabele ni mina zibo ya ka. 24Ne ni nze ni mi biza, ni ku mi mema kuli mu tahe, kono mu hanile. Ha mu si ka isa pilu ku na. 25Mu hanile likelezo za ka kamukana, mi ha mu si ka tabela kuli ni mi sikulule. 26Cwale ha mu ta kena mwa butata, ni ta mi seha. Ni ta mi sheununa ha mu kenelwa ki ze sabisa. 27Ni ta mi sheununa ha li taha ku mina sina liñungwa, li tisa moya wa manyando a sabisa, mi mu utwa butuku, mu zielehile. 28Hona fo, mu ta ni biza, kono ha ni na ku alaba. Mu ta ni bata kafa ni kafa, kono ha mu na ku ni fumana. 29Mu toile zibo, mi kamita mu hanile ku saba Muñ'a Bupilo. 30Ha mu si ka bata kelezo ya ka, kamba ku teeleza ha ni mi sikulula. 31Cwalehe, mu ta fumana se si mi lukela, mi likezo za mina li ta mi yemela ka mahutu. 32Batu ba ba si na zibo ba shwa kakuli ba hana butali. Batu ba likuba ba bulaiwa ki ku sa isa pilu kwa lika. 33Kono ufi ni ufi ya ni teeleza u ta ba ni mapilelo. U ta ba mwa buiketo, ku si na libaka le li ka mu sabisa.”
Lozi Interconfessional Bible, Catholic Edition © Bible Society of Zambia, 2009.