Mashitanguti 19
19
1Bunde ki ku ba mubotana ya sepahala ku fita ku ba lihata la sikuba.
2Ku tukufalelwa ku eza sika s'o sa zibi, ha si ko kunde. Ku si akufisa ku ta ku kenya mwa ziezi.
3Batu ba bañwi ba isinya ka mikwa ya bona ya bukuba, mi ku zwa fo ba nyaza Muñ'a Bupilo.
4Ka nako kaufela bafumi ba fumana balikani ba banca, kono babotana ba palelwa ku ina ni balikani ba sikai ba ba na ni bona.
5Ha u bulela buhata mwa kuta u ta fiwa mulatu, mi ha u bata ku puma ha u na ku banduka.
6Ufi ni ufi u lata ku utwana ni batu ba bahulu. Yo muñwi ni yo muñwi u lakaza ku utwana ni mutu ya fana.
7Nihaili banabahabo mubotana ha ba na tuso ku yena, mi cwale ha ku komokisi h'a si na balikani. Nih'a ka lika cwañi ni cwañi, h'a koni ku fumana nihaili a li muñwi.
Sitalifi ni sitoto
8U itute ili wena m'o konela kaufela, mi u hupule s'o itutile. Kihona u ta zwelapili.
9Ha ku na ya bulela buhata mwa kuta ya ka banduka a si na mulatu. Ya bulela buhata u ka shwa.
10Likuba ha li lukeli ku pila ka bulena, ni batanga ha ba lukeli ku busa batompehi.
11Mutu ya na ni ngana u kwalela bunyemi bwa hae. Ha u ka fosezwa ki mutu, i ka ba hande ha u ka mu swalela.
12Ku nyema kwa mulena ku swana ni mulumo wa tau, kono musa wa hae u swana ni pula ya maseulo.
13Mwana wa sikuba u kona ku tiseza ndat'ahe ziezi. Musali ya bulela hahulu u swana ni mezi a nz'a lota, a li to-to-to.
14Mutu u kona ku yola ndu ya ndat'ahe ni mali cwalo, kono ki Muñ'a Bupilo feela a nosi ya kona ku mu fa musali wa ngana.
15Zwelapili u nz'o li buzwa cwalo, u lobale, kono bo nabutolo ba ta lapa.
Likute ku Mulimu
16Buluka milao ya Mulimu mi u ta pila nako ye telele. Ha u i limbulula u ta shwa.
17Ha u fa mubotana, ku swana ni ku kalima Muñ'a Bupilo kakuli u ta ku fa s'a n'a kalimile ku wena.
18Luta bana ba hao mikwa ye minde ha ba sa li ba banyinyani ba sa kona ku ituta. Ha u sa ezi cwalo, u ba batiseza kuli ba kene mwa ziezi mi u ekeza kwa bumai bwa bona.
19Mutu wa kacimacima u ta kutelwa. Haiba u ka mu zwisa mwa ziezi hañwi, konji u kutele ku eza cwalo hape.
20Utwa kelezo, u i mamele, mi zazi le liñwi u ta ba ni butali.
21Mutu a ka lela lika za mifuta-futa, kono ku ta eziwa tato ya Muñ'a Bupilo.
22Kwa swabisa ku ba mutimani, mi ku mbubo-mbubo ku ba mubotana ku fita ku ba lihata.
23Saba Muñ'a Bupilo, mi u ta ba ni bupilo bo butelele. Ya mu saba u pila mwa buiketo bo bu si na bumaswe.
Kukondisa ni buzwa
24Buzwa bwa ba bañwi bu ba palelwisa nihaili ku ca lico za bona.
25Muikuhumusi u lukela ku utwiswa butuku, ili kuli batu ba ba sa zibi se siñwi ba itute tuto. Mutu ya butali u ta ituta h'a sikululwa.
26Mutu ya eza ndat'ahe maswe kamba ya leleka m'ahe mwa hae, ki mwana ya swabisa, ya tahisa kashwau.
27Mwan'a ka, ha u tuhela tuto, u tuha u libala ni z'o n'o s'o zibile kale.
28Ha ku na katulo ye lukile, paki h'a itukiselize ku utwisa yo muñwi butuku. Batu ba ba maswe ba tabela ze maswe.
29Muikuhumusi wa sikuba u na ni niti ya kuli u ta natiwa. Likoto li lukiselizwe bashendi.
Lozi Interconfessional Bible, Catholic Edition © Bible Society of Zambia, 2009.