Mashitanguti 18
18
1Mutu ya sa utwani ni ba bañwi, u tabela za hae a nosi, mi h'a na ku lumelelana ni ze ba ziba ba bañwi kuli li lukile.
2Sikuba h'a na taba kw'a utwa lika ni kw'a sa li utwi. Ku yena kwa swana. S'a bata feela ki ku bonisa fo i kuma ngana ya hae.
3Sibi ni maswabi li zamaelela hamoho. Tuhela likute la hao mi u ta fumana kashwau mwa sibaka sa lona.
4Manzwi a mutu a ka ba makalelo a butali, ili a tungile sina liwate, mi ili a mande sina mezi a buba mwa nuka.
5Ha si hande ku eza sobozi ku ya fosize ni ku hanisa ya si na mulatu katulo ye lukile.
Pulelo ya bukuba
6Sitoto ha si kala likañi, si bata ku natiwa.
7Sikuba ha si bulela, si isinya ili sona. Si swasiwa mwa siteo sa manzwi a sona luli.
8Lusebo lwa tabusa mi batu ba lata ku lu miza!
9Mutu ya buzwa u maswe mi ki wahabo sisinyi.
10Libizo la Muñ'a Bupilo li swana ni ndu ya masabelo ye tiile, ko ku y'o pilela mutu ya lukile.
11Bafumi ba hupula kuli bufumu bwa bona bwa ba sileleza sina mamota a munzi a matelele a tiile.
12Ha ku na mutu ya ka kutekiwa konji h'a ishuwile. Muikuhumusi u ta sinyehelwa.
13 #
Litu 11.8
Teeleza pili u si ka alaba kale. Ha u sa ezi cwalo u sikuba, mi wa swabisa.
14Takazo ya mutu ya ku pila i kona ku mu tiisa h'a kula, kono ha i fela, ha ku sa na sepo ku yena.
15Batu ba ba na ni ngana ba lata zibo, mi kamita ba tukufalelwa hahulu ku ituta.
Patisiso ya taba
16Kikuli u bata ku bonana ni mutu yo mutuna, nji? U mu iseze mpo mi u ta mu bona ka bunolo.
17Litaba za mutu wa pili ya bulela mwa kuta li utwahala inge li lukile, ku fitela ya mu kananisa h'a kala ku mu buza lipuzo.
18Haiba batu ba babeli ba ba maata ba zekisana mwa kuta, taula ye kenile ki yona feela ye ka puma taba.
19Tusa mwanahenu mi ni yena u ta ku sileleza sina lukwakwa lo lu tiile, kono ha u omana ni yena u ta ku tuhela u nosi.
20Mutu u kutula miselo ya manzwi a zwa mwa mulomo wa hae.
21Z'o bulela li kona ku ku pilisa kamba ku ku bulaya. Cwalehe, u swanezi ku amuhela ze tisiwa ki manzwi a hao.
22 #
Litu 26.1-4
Ha u fumana musali u fumani nto ye nde luli, ye bonisa kuli Muñ'a Bupilo u ku ezelize hande.
23Mubotana h'a bulela, u kupa ka likute, kono mufumi h'a alaba ki ka lishwau.
Mulikani wa niti
24Siango se siñwi ha si ngi nako, kono ba bañwi ba utwana hahulu ku fita mutu ni wahabo.
Lozi Interconfessional Bible, Catholic Edition © Bible Society of Zambia, 2009.