Mashitanguti 20
20
1Ku nwa hahulu ku ezisa lilata ni bukuba. Ki butoto ku kolwa.
2Saba mulena ya nyemile sina m'o ka sabela tau ye hona. Ku mu nyemisa ki ku ipulaya.
3Sikuba sifi ni sifi si kona ku kala kañi. Cwale nto ya butokwa ki ku ikambusa ku zona.
4Mulimi ya buzwa, ya palelwa ku lima masimu a hae ka nako. Kifohe nih'a t'o bata h'a na s'a ka kutula.
5Mihupulo ya mutu i swana ni mezi a mwa siliba se si tungile, kono yo muñwi ya na ni ngana wa kona ku a ka.
6Mutu kaufela u bulela ka likute ni ku sepahala kwa hae, kono lika ku fumana luli mutu ya cwalo kuli ki ufi!
Buino sakata
7Banana ba ka ba ni litohonolo kwa linako ze taha, haiba ba na ni bashemi ba ba sepahala, ba ba eza ze lukile.
8Mulena h'a inzi fa situlo sa buatuli, meeto a hae a hasanya bumaswe.
9Kana luli u teñi ya ka li pilu ya hae i kenile, kuli u tuhezi sibi sa hae?
10Muñ'a Bupilo u toile ba ba sebelisa bubeli bwa zona, likala ni litikanyo ze putelela.
11Mutu nih'a sa li mwanana z'a eza li bonisa mw'a inezi. Wa kona ku lemuha haiba wa sepahala ni kuli u lukile.
12Muñ'a Bupilo u lu file bubeli bwa zona, meeto a ku bonisa, ni lizebe za ku utwisa.
13Haiba u sinyeza nako ya hao fa ku lobala, u ta ba mubotana. Kono ha u pateha, u ta ba ni lico ze ñata.
14Muleki kamita u bilaela kuli liteko li pahami hahulu, kono cwale u ya a nz'a itumba ka muleko w'a fumani.
15Haiba wa ziba s'o bulela, u na ni nto ya butokwa ku fita gauda ni macwe a butokwa.
Ku luwa ko ku lukile ni ko ku si ka luka
16Ufi ni ufi ya sepisa ku ba ni buikalabelo ka sikoloti sa muzamai ki sitoto ka ku lumelela liluwo la hae ku ngiwa kuli i be swalelele ku fitela si lifiwa.
17S'o fumana ka ku putelela si tabusa sina lico ze nde hahulu, kono mwamulahonyana li ta swana ni mushabati o tezi lihanu.
18Fumana kelezo ye nde mi u ta kona. U si ke wa kena mwa ndwa u si ka ba ni mulelo.
19Lusebo ha lu pati kunutu. Ambuka mutu ya bulela hahulu.
20Haiba u lwaha bashemi ba hao, bupilo bwa hao bu ta fela sina lampi ha i tima mwa lififi.
21Ha u fumana bufumu ka bunolo, ha bu na ku ba ni tuso ye tuna ku wena.
22U si ke wa hupula ku lifa foso. Sepa Muñ'a Bupilo, mi yena u ka lukisa.
23Muñ'a Bupilo u toile batu ba ba sebelisa ze putelela, ili likala ni litikanyo ze sa sepahali.
24Muñ'a Bupilo u lukisize nzila ya luna. Cwalehe, yo muñwi ni yo muñwi u ta utwisisa cwañi bupilo bwa hae bo bu libile?
25Hupula ka tokomelo pili u si ka sepisa ku fa Mulimu mpo. Mwendi mwamulaho u ka swana wa inyaza.
Mulena ni puso
26Mulena ya butali u ta ziba ya fosize, mi a mu utwise butuku a si na makeke.
27Muñ'a Bupilo u lu file minahano ni lizwalo, mi ha lu koni ku li pata ili luna.
28Mulena u ta ba ni maata cwalo puso ya hae ha i sa sepahala, i lukile, mi i li ya niti.
29Lu buha maata a ba banca, mi lu kuteka limbi za macembele.
30Fokuñwi lu utwanga butuku hahulu ha lu tuheliswa mikwa ya luna.
Lozi Interconfessional Bible, Catholic Edition © Bible Society of Zambia, 2009.