Mashitanguti 17
17
Sishemo ku babañwi
1Ki ko kunde ku ca bungululwa bo bu omile bwa buhobe ka kozo, ku fita ku ina kwa malyalya mwa ndu ye tezi mifili-fili.
2Mutanga ya talifile u ta ba ni maata fahalimw'a mwan'a mulen'a hae ya si na tuso, mi u ta fumana kabelo kwa lifa.
3Gauda ni silivela li likiwa ka mulilo, kono pilu ya mutu i likiwa ki Muñ'a Bupilo.
4Batu ba ba maswe ba tokomela lipulelo ze maswe, ni mahata ba teeleza kwa buhata.
5Ha u shendaula mutu wa mubotana, u shwaula Mulimu ya mu bupile. U ta fiwa mulatu ha u tabiswa ki bumai bwa yo muñwi.
6Banna-bahulu ba ikuhumusa ka baikulu ba bona, sina bashimani ha ba ikuhumusa ka bo ndat'a bona.
7Mutu ya kutekeha h'a buleli buhata, sina sikuba ha si luniwa ki ku bulela ze utwahala.
8Batu ba bañwi ba hupula kuli ku leka kweta ku sebeza sina mabibo. Ba kolwa kuli ku ta ba ezeza sifi ni sifi.
9Haiba u bata ku latiwa ki batu, u ba swalele ha ba ku foseza. Ku hupula lifoso ku feza bulikani.
10Mutu ya na ni ngana u kona ku ituta hahulu h'a kalimelwa hañwi, ku fita sikuba se si ituta ha se si natilwe hañata hamwanda.
11Lifu li ka taha sina mulumiwa ya lunya kwa batu ba ba maswe bona bao ba bata ku tisa milifi-fili nako kaufela.
12Bunde kiha u ka katana ni bele ya muzwezi, y'e ngezwi bana ba yona, ku fita ku katana ni sitoto se si patehile ka misebezi ya sona ya bukuba.
13Haiba u kutisa bunde ka bumaswe, ha u na ku kona ku zwisa bumaswe bo bu mwa ndu ya hao.
14Makalelo a likañi a swana ni lisuba fa mushimbela. U li tibe ku si ka sinyehelela kale.
Kuluka
15Ku atula ya si na mulatu kamba ku tuhela ya maswe a ikela, bubeli bwa zona li toilwe ki Muñ'a Bupilo.
16Ha ku tusi ku sinya mali ka ku luta sikuba, kakuli h'a na ngana ya ku bata butali.
17 #
Litu 6.7-10
Balikani kamita ba bonisana lilato. Cwale y'o pepilwe ni yena ki wañi ha mu sa tusani mwa butata?
18Mutu ya si na ngana luli ni kutwisiso ys butu ki yena ya ipapatela sikoloti sa mutu yo muñwi.
19Ku lata sibi ku swana ni ku lata mifili-fili. Haiba u ikuhumusa ka bufumu bwa hao u ipatiseza mifili-fili.
20Mutu ya hupula ni ku bulela ze maswe h'a na ze nde z'a libelezi ku li fumana haisi manyando feela.
21Mushemi ya pepile mwana ya eza lika za bukuba feela h'a na s'a ka libelela haisi maswabi.
22Ku pila ka tabo ki mulyani o munde. Kono ku ba ni bulutu kamita ku swana ni lifu le li taha ka bunya.
23Baatuli ba ba maswe ba lekiwa likweta kwa mukunda, mi likatulo ha li sa ya ka mulao.
24Mutu ya butali u ziba za ngana z'a ka eza, kono mutu wa sikuba h'a koni ku hupula s'a ka eza.
25Mwana wa sitoto u tiseza ndat'ahe maswabi, mi u utwisa m'ahe butuku.
26Ha si hande ku lifisa mutu ya si na mulatu, mi hape ki ku tula mulao ku nata mutu ya lukile.
Butali bwa kueza lika
27Mutu ya ziba s'a eza h'a buleli nako ni nako. Mutu wa mombela u lemuha lika.
28 #
Litu 20.5
Mane, nihaili sikuba si kona ku hupulelwa ku ba ni butali ni ngana, haiba si ka ina si nze si kuzize.
Lozi Interconfessional Bible, Catholic Edition © Bible Society of Zambia, 2009.