Mashitanguti 16
16
Pabalelo ya Mulimu
1Batu ba kona ku eza milelo ya bona, kono linzwi la Muñ'a Bupilo ki lona la mafelelezo.
2U ka na wa hupula kuli z'o eza kamukana li lukile, kono Muñ'a Bupilo u atula mihupulo ya hao.
3U kupe Muñ'a Bupilo kuli a fuyaule milelo ya hao, mi u ta kona ku i peta hande.
4Lika kamukana z'a ezize Muñ'a Bapilo li na ni fo li libile. Mi cwale mafelelezo a mutu ya maswe ki bumai.
5Muñ'a Bupilo u toile ufi ni ufi ya ipahamisa. Mutu ya cwalo h'a na ku pima mulatu.
6 #
Tob 12.9
U sepahale mwa lika kamukana mi Mulimu u ta ku swalela libi za hao. Saba Muñ'a Bupilo mi ha ku na se si maswe se si ta ku tahela.
7Ha u tabisa Muñ'a Bupilo u kona ku fetula lila ku ba balikani ba hao.
8 #
Tob 12.8
Ki ko kunde ku ba ni lika ze nyinyani, ili ze fumanwi ka ku sepahala, ku fita ku ba ni ze ñata ze fumanwi ka mikwa ye sa sepahali.
9U ka na wa eza milelo ya hao, kono Muñ'a Bupilo u zamaisa likezo za hao.
Mulena tota
10Malena ba bulela ka maata a Mulimu, mi likatulo za bona kamita li lukile.
11Muñ'a Bupilo u bata kuli likala ni litikanyo li be ze lukile, mi litekiso kaufela li be ze sa bilaezi.
12Malena ba toile bumaswe, kakuli puso ya bona i tiiswa ki ze lukile.
13Mulena u bata ku utwa niti, mi u ta utwana ni batu ba ba i bulela.
14Fokuñwi buhali bwa mulena ki liñusa la lifu, kono mutu ya butali u kona ku bu kuyula.
15Musa wa mulena u swana ni malu a tisa pula ka nako ya maseulo. U tisa bupilo.
Buikokobezo
16Ki ko kunde, ko kunde hahulu, ku ba ni butali ni zibo ku fita ku ba ni gauda ni silivela.
17Batu ba bande ba zamaya mwa linzila ze kekuluha bumaswe. Cwalehe, talima k'o ya, mi mwendi u ka ipilisa.
18Muipo u isa kwa lifu, ni buikuhumuso bu isa kwa ku wa.
19Ki ko kunde ku ba yo muñwi wa babotana ba ba ikokobeza ku fita ku ba yo muñwi wa baikuhumusi ni ku abelana ni bona tutu ye ba hapile.
20U utwisise hande z'o lutiwa, mi u ta zwelapili. Sepa Muñ'a Bupilo, mi u ta ba ni litohonolo.
21Mutu ya butali u zibiwa ka kutwisiso ya hae. Mo a tabiseza manzwi a hae, ni batu ba mu kolwa cwalo.
22Ngana ki liwelu-welu la bupilo ku ba ba butali, kono ki ku sinya feela nako ku lika ku luta batu ba likuba.
23Mutu ya butali u kala ku hupula pili a si ka bulela, mi s'a ka bulela sa kolwisa.
24Manzwi a musa a swana sina linosi. Ki a munati, mi ki a mande ni kwa bupilo bwa hao.
25 #
Mash 14.12
Nzila y'o hupula kuli i lukile mwendi i isa kwa lifu.
26Takazo ya lico ku mubeleki i mu sebelisa ka tata, kakuli u bata ku kula.
27Mutu ya lata bumaswe u zamaya a bata mikwa ya ku utwisa ba bañwi butuku, mane nihaili manzwi a hae a tezi bumaswe.
28 #
Litu 28.13-26
Batu ba ba maswe ba hasanya lusebo, ba zusa mifili-fili mi ba felisa bulikani.
29Mutu wa mulwani u puma balikani ba hae mi u ba isa mwa bumai.
30Tokomela batu ba ba ku lumela ñaña mi ba ku kobeta ka meeto. Ba se ba hupuzi se si maswe ka wena.
31Bupilo bo butelele ki mupuzo wa mutu ya lukile. Limbi za hae ki kuwani ya likute.
32Ki ko kunde ku sa nyema kapili ku fita ku ba ni maata. Ki ko kunde ku ba ni buiswalo ku fita ku zamaisa munzi mutumbi.
33Batu ba nepa litaula ze kenile kuli ba zibe tato ya Mulimu, kono Muñ'a Bupilo kasibili, ki yena ya lukisa kalabo.
Lozi Interconfessional Bible, Catholic Edition © Bible Society of Zambia, 2009.