Mashitanguti 13
13
1Mwana ya butali wa teeleza ndat'ahe h'a mu sikulula, kono mutu ya ipahamisa h'a lumeli kuli u fosize.
2Batu ba bande ba ta kutelwa ki bunde bwa lipulelo za bona, kono bapumi ba lakaza feela bulwani.
3 #
Litu 28.25, 26 U tokomele s'o bulela, mi u sileleze bupilo bwa hao. Mutu wa liamba-amba wa ipulaya.
4Mutu ya buzwa a ka na a bata hahulu sika, kono h'a na ku si fumana. Ya sebeza ka tata u fumana z'a bata kamukana.
5Batu ba ba sepahala ba toile buhata, kono manzwi a mutu ya maswe a sisimuna mubili ni ku swabisa.
6Ku luka ku sileleza ba ba si na mulatu, kono bumaswe ki ku wa kwa baezalibi.
Bunjebwe ni bufumu
7Batu ba bañwi ba ikeza bafumi, bo ba si na se siñwi. Ba bañwi ba ikeza babotana kono ba fumile.
8Mutu ya fumile u itukulula ka bufumu bwa hae, kono mubotana ha ku na ya mu fumbela.
9Ba ba lukile ba swana ni liseli le li benya hande, haili ba ba maswe, bona, ba swana ni lampi ye se i tima.
10Ku ipahamisa ha ku fumanisi se siñwi haisi mifili-fili feela. Ku kupa kelezo ki bona butali.
11Mo u fumanela bufumu bwa hao ka bunolo, ni kwa ku bu sinya u ta bu sinya ka bunolo cwalo. Ha u bu fumana ka tata, u ta bu luwa ka buñata.
12Ku felelwa ki sepo ku zwafisa pilu, kono takazo ha i petahala, ku taha bupilo bo bunca ni tabo.
Bukombwa
13Ha u hana kelezo ye nde, u ipatela mifili-fili. Zamaya ka kelezo yeo mi u ta pila.
14Lituto za batu ba ba butali ki liwelu-welu la bupilo. Li ta ku pimisa butata, muta bupilo bwa hao bu li mwa kozi.
15Kutwisiso i tisa likute, kono batu ba ba sa sepahali ba ya kwa ku sinyeha.
16Mutu kaufela ya butali u ziba s'a eza, kono sikuba u yaneha feela bukuba bwa hae.
17Balumiwa ba ba sa sepahali ba tisa mifili-fili, kono ba ba sepahala ba tisa kozo.
18Mutu ya sa ituti u ta ba mubotana mi a iswabele. Ya teeleza h'a sikululwa wa kutekiwa.
19Ki ko kunde cwañi ku fumana ze nde z'o bata! Batu ba litoto, bona, ba hana ku tuhela bumaswe.
20 #
Litu 6.33, 34 U twaelane ni batu ba ba butali mi ni wena u ta ba ni butali. Ha u iswala bulikani ni likuba, ni wena u ta sinyeha.
Lituwelo za kuluka
21Mufili-fili u latelela baezalibi kai ni kai ko ba ya, kono batu ba ba lukile ba ta kutisezwa lika ze nde.
22Mutu yo munde u ta ba ni bufumu bw'a ta siyela baikulu ba hae, kono tutu ya baezalibi i ta ya kwa batu ba ba lukile.
23Masimu a tite a kona ku tiseza babotana lico ze ñata, kono batu ba ba si ka luka b'a hanisa kuli a limiwe.
24Haiba u sa nati mwan'a hao, u mu toile. Haiba u mu lata luli u ta mu sikulula.
25Batu ba ba lukile ba na ni lico ze ba likana, kono batu ba ba maswe ba lapile nako kaufela.
Lozi Interconfessional Bible, Catholic Edition © Bible Society of Zambia, 2009.