Mashitanguti 14
14
1Musali ya butali u tiisa ndu ya hae, kono wa sikuba, yena, wa i lutula ka mazoho a hae.
2Ku sepahala ki ku bonisa likute ku Muñ'a Bupilo, kono ku eza sibi ki ku mu shwaula.
3Manzwi a mutu ya butali a mu sileleza, kono buikuhumuso bwa sikuba bwa mu yambutukisa.
4Ha ku si na mapulu a hoha sikekele u ta kutula lico ze nyinyani, kono h'a li teñi, u ta kutula ze ñata.
5Paki ye sepahala i bulela niti kamita, kono ye sa sepahali i bulela buhata feela.
6Mutu wa muikuhumusi h'a na ku ba ni butali, kono mutu ya na ni ngana u ituta ka bunolo.
7Zwa kwa batu ba likuba. Ha ba na se ba ka ku luta.
8Mutu ya na ni ngana kiñi h'a na ni butali? Kakuli wa ziba s'a eza. Mutu ya si na ngana kiñi h'a li sikuba? Kakuli u hupula feela kuli wa ziba.
9Batu ba likuba ha ba na taba niha ba ka eza sibi, kono batu ba ba lukile ba bata ku swalelwa.
10Tabo ya hao ki ya hao luli. Maswabi a hao ki maswabi a hao luli. Ha ku na mutu ya ka kona ku ikabela zona ni wena.
11Ndu ya mutu yo munde i ta siyala i nze i yemi, ya mutu ya maswe ha i se i tubilwe.
12 #
Mash 16.25
Y'o hupula kuli ki yona nzila luli, mwendi ki ye ku isa kwa lifu.
13Liseho za mutu li ka pata maswabi a hae. Tabo ha i se i felile, maswabi a siyala a nz'a li teñi.
14Mutu ya maswe u fumana se si mu lukela. Mutu yo munde u kutisezwa mupuzo ka likezo za hae.
Tokomelo
15Sikuba si lumela nto ifi ni ifi, kono mutu ya na ni ngana u lemuha mihato ya hae.
16Mutu ya butali u na ni tokomelo ya ku zwa mwa mifili-fili, kono mutu wa sikuba h'a na tokomelo, mi u eza lika kapili-pili.
17Mutu wa kacimacima u eza lika za bukuba. Ya butali yena wa ikuzeza.
18Batu ba ba si na zibo ba fumana se si lukela bukuba bwa bona, kono ba ba talifile ba kutisezwa zibo.
19Batu ba ba maswe ba ta kandelela ba ba lukile, mi ba ba kupe tuso ka buikokobezo.
20Ha ku na ya lata mubotana niha i ka ba wahabo, kono bafumi ba na ni balikani ba bañata.
21Haiba u bata mbuyoti, u be ni musa kwa babotana, kakuli ki sibi ku nyaziseza yo muñwi.
22U ta sepiwa ni ku kutekiwa ki ba bañwi haiba u eza ze nde. Haiba u eza ze maswe, u fosa hahulu.
23Sebeza mi u ta fumana za ku ipilisa ka zona. Haiba u ina u nz'o mbwambwata feela, u ta ba mubotana.
24Batu ba ba butali ba fiwa mupuzo wa bufumu, kono sikuba si zibahala ka bukuba bwa sona.
25Paki wa pilisa haiba a bulela niti. U kenya batu mwa kozi haiba a bulela buhata.
Tumelo ni zamaiso ya naha
26Bulumeli bwa niti bu tisa sepo ni buiketo ku mutu ni lubasi lwa hae.
27Kana u bata ku pima lifu, nji? Bulumeli bwa niti ki lona liwelu-welu la bupilo.
28Kabubo ka mulena ka itingile fa buñata bwa batu b'a busa. H'a sina batu, puso ya hae ya shandauka.
29Mutu ya ina a nz'a ikuzelize u butali, kono ha u li wa kacimacima u bonisa feela fo bu kuma bukuba bwa hao.
30Mwa pilu ha ku na ni kozo ni mubili u pila hande, kono muna u swana ni butuku bwa malengwafuba.
31Ha u nyandisa babotana, u shwaula Mulimu ya ba ezize, kono mukekecima w'o eza kwa babotana ki kezo ya bulapeli.
32Likezo za batu ba ba maswe li ba tiseza ku wa, kono batu ba ba lukile ba silelezwa ki busepahali bwa bona.
33Butali bu mwa munahano kaufela wa mutu ya na ni ngana. Litoto ha li na se li ziba ka za butali.
34Ku luka ku hulisa sicaba, kanti sibi si tiseza sicaba sifi kamba sifi maswabi.
35Malena ba tabela manduna ba ba kondisa musebezi wa bona, kono ba ba ba paleliswa ku eza cwalo ba fiwa mulatu.
Lozi Interconfessional Bible, Catholic Edition © Bible Society of Zambia, 2009.