Mashitanguti 12
12
1 #
Litu 21.6
Mutu ya lata ku ziba lika, u tabela ku bulelelwa h'a fosa. Ki bukuba ku hana ku sikululwa.
2Muñ'a Bupilo u tabiswa ki batu ba bande, kono u nyaza ba ba lela milelo ye maswe.
3Bumaswe ha bu tisi buiketo, kono batu ba ba lukile ba tiile.
4Munna u tabiswa ni ku ikuhumusa ka musal'a hae ya lukile, kono ya mu tiseza maswabi, u swana ni butuku bwa malengwafuba mwa masapo a hae.
5Batu ba ba lukile ba ta ku babalela. Ba ba maswe ba bata feela ku ku puma.
6Manzwi a batu ba ba maswe a sinya, kono manzwi a ba ba lukile a pilisa ba ba fumbelwa.
7Ndu ya batu ba ba maswe i ta feliswa kapili, kono ndu ya ba ba lukile i ka tiya.
8U ta lumbiwa haiba u na ni ngana. Haiba u sikuba batu ba ta ku shwaula.
9Ki ko kunde ku ba mutunyana feela ya ipilisa ka ku sebeza, ku fita ku inuneka kono u nz'o shwa tala.
10Mutu yo munde u babalela limunanu za hae, kono batu ba ba maswe ba na ni lunya ku za bona.
11Mulimi ya sebeza ka tata u na ni lico ze ñata, kono ki butoto ku sinyeza nako fa misebezi ye si na tuso.
12Ze ba bata batu ba ba maswe kamita ki ku fumana bumaswe bo ba ka eza, kono batu ba ba lukile ba tiile.
Mo lu inezi lulimi
13Mutu ya maswe u swasiwa ki manzwi a hae, kono mutu ya lukile u ikambusa mwa mifili-fili.
14Mupuzo wa mutu u itingile ku z'a bulela ni z'a eza. U ta fumana se si mu swanela.
15Batu ba likuba ba hupula kuli ze ba eza kaufela li lukile. Kono batu ba ba butali ba teeleza kelezo.
16Mutu wa sikuba h'a filikani u izibahaza kapili, kono ya lukile h'a ka lwahiwa h'a isi pilu kwateñi.
17Ha u bulela niti u petile mulao, kono buhata bu isa kwa ku puma.
18Manzwi a si ka nahanwa hande a holofaza hahulu sina sabule, kono manzwi a mutu ya butali ona a folisa mañiba.
19Buhata bu nga nako ye kuswani kono niti, yona, i ina kuya kuile.
20Ba ba lela ze maswe ba ta kena mwa butata bo bu komokisa, kono ba ba belekela ze nde ba ta fumana tabo.
21Ha ku na se si maswe se si ka tulisa pilu ya mutu ya lukile, kono mutu ya maswe ha ku na s'a fumana haisi milifi-fili feela.
22Muñ'a Bupilo u toile mahata, kono u tabela ba ba buluka manzwi a bona.
23Batu ba ba na ni ngana ha ba bonisi zibo ya bona, kono likuba li bonisa ku sa ziba kwa bona.
Miswalo
24Ku sebeza hahulu ku fa mutu maata, kono ku ba buzwa ku ta mu eza mutanga.
25Lipilaelo li kona ku feza tabo ya mutu, kono manzwi a lilato a ka mu tiisa pilu.
26Mutu ya lukile ki ndambo ya mulikan'a hae, kono ya maswe u lateha mwa nzila.
27Mutu ya buzwa h'a na ku fumana s'a bata, kono mutu ya sebeza ka tata u ta fumana litohonolo.
28Ku luka ki nzila ye isa kwa bupilo. Bumaswe ki nzila ye isa kwa lifu.
Lozi Interconfessional Bible, Catholic Edition © Bible Society of Zambia, 2009.