Mashitanguti 11
11
1Muñ'a Bupilo u toile ba ba sebelisa likala ze si ka luka. U tabiswa ki litikanyo ze lukile.
2Batu ba ba ikuhumusa ba tuha ba swabiswa. Ku ikokobeza ki bona butali.
3Batu ba bande ba zamaiswa ki busepahali. Ku sa sepahala ku wisa ba ba sa sepahali.
4Bufumu ha bu na ku ku tusa zazi l'o talimana ni lifu, kono ku luka ku kona ku sileleza bupilo bwa hao.
5Busepahali bu nolofaza bupilo bwa mutu yo munde, kono mutu ya maswe u ipatiseza ku wa.
6Ku luka ku sileleza mutu ya sepahala, kono mutu ya sa sepahali u swasiwa ki litakazo za hae.
7Mutu ya maswe h'a shwa, sepo ya hae i shwa ni yena. Sepo y'a beile fa bufumu ha i sa na tuso.
8Batu ba ba lukile ba silelezwa kwa mifili-fili, kono mifili-fili yeo i kutela ku ba ba maswe.
Pabalelo ya sicaba
9Batu ba sinyiwa ki lipulelo za ba ba sa lumeli ku Mulimu, kono ba piliswa ki butali bwa ba ba lukile.
10Munzi wa nyakala batu ha ba na ni litohonolo, mi ha ku shwa ba ba maswe wa taba.
11Minzi ya tuma ha ku pila ba ba lukile, kono i sinyiwa ki manzwi a ba ba maswe.
12Ki butoto ku bulela ka kashwau ku ba bañwi. Mutu ya butali wa ikuzeza.
13Ha ku na wa lusebo y'o sepa mwa likunutu, kono u kona ku beya sepo ku mutu ya sepahala.
14 #
But 6.24
Sicaba si ka wa haiba si si na zamaiso ye nde. Baelezi ba bañata ba tahisa buiketo.
15Haiba u sepisa ku lifa likoloti za muenyi, u ta inyaza. Kono u ta iketa haiba u sa keni ku zona.
16Musali ya na ni mikwa ye minde wa kutekwa, kono musali ya si ka luka wa swabiswa.
Munna ya buzwa h'a na ku fumana mali, kono ya sebeza ka tata u ta fuma.
Likoto ni lituwelo
17Ha u na ni sishemo u ikeza hande ili wena, kono ha u na ni lunya u ikutwisa feela butuku ili wena.
18Batu ba ba maswe ha ku na ni se sikana se ba fumana, kono ba ba eza ze nde ba ta kutisezwa.
19Mutu ya itukiselize ku eza hande u ta pila, kono ya pihelela ku eza ze maswe u ta shwa.
20Muñ'a Bupilo u toile batu ba ba na ni moya o maswe, kono u tabela ba ba eza ze nde.
21Ki niti luli kuli batu ba ba maswe ba ka utwiswa butuku, kono ba ba lukile, bona, ba ta pila.
22Bunde bwa musali ya si na taluhanyo hande bu swana ni liseka la gauda le li beilwe kwa ngo ya kulube.
23Kamita se si batiwa ki batu ba ba lukile si y'o fela ka bunde. Kono ba ba maswe ha ba fumana ze ba tokwa, batu kaufela ba nyema.
Sishemo se si pilisa
24Batu ba bañwi ba fana mali a bona ba nze ba lukuluhile, kono ba sa fuma ni ku fita pili. Ba bañwi ki ba mango kono bubotana bwa bona kihona bu ekezeha.
25U fana, mi u ta zwelapili. Tusa ba bañwi, mi ni bona ba ka ku tusa.
26Batu ba kuta ya buluka mabele a litezi teko ye pahami, kono ba lumba ya a lekisa kapili.
27Haiba u bata ku eza hande, u ta kutekiwa, kono ha u bata mufili-fili, ki ona o ta fumana.
28Ba ba sepile bufumu bwa bona ba ta wa sina matali a maliha, kono ba ba lukile bona ba ka tiya sina matali a litabula.
29Mutu ya tiseza lubasi lwa hae mufili-fili, kwa mafelelezo h'a na s'a ka fumana. Batu ba likuba ba ta ba batanga ba ba ba butali kamita.
30Ku luka ku fa bupilo, kono bulwani, bona, bu amuha mutu bupilo.
31 #
1 Pit 4.18
Mutu ya lukile u fumana mupuzo a sa li fafasi fa, kono batu ba ba maswe ni baezalibi ba ta fiwa mulatu luli.
Lozi Interconfessional Bible, Catholic Edition © Bible Society of Zambia, 2009.