Lipalo 9
9
Paseka ya bubeli
1 #
Mut 12.1-13
Muñ'a Bupilo a bulelela Mushe mwa Lihalaupa la Sinai ka kweli ya pili, ili mwa silimo sa bubeli, batu ba Isilaele ha ba se ba zwile mwa Egepita. 2A li, “Batu ba Isilaele ba lukela ku buluka Paseka. 3Ba lukela ku kala ka lizazi la bulishumi ni a mane la kweli ye, ha li likela, ka ku ya ka milao kaufela ni litaelo za Mukiti wa Paseka.” 4Cwale Mushe a bulelela batu ku buluka Paseka. 5Ba eza cwalo, manzibwana a la bulishumi ni a mane mwa kweli ya pili, ha ba li mwa Lihalaupa la Sinai. Batu ba eza lika kamukana sina Muñ'a Bupilo mw'a n'a laelezi Mushe.
6Kono ne ku na ni batu ba bañwi, ba ba ne ba si ka kena, kakuli ne ba sweli situpu, mi ba palelwa ku buluka Paseka ka lona lizazi leo. Ba ya ku Mushe ni Aruni ka lona lizazi leo. 7Ba li, “Luna ha lu si ka kena kakuli ne lu sweli situpu. Cwale lu hanisezwañi ku tiseza Muñ'a Bupilo limpo hamoho ni Maisilaele ba bañwi?”
8Mushe a alaba, a li, “Mu litele, ni fumane pili litaelo ze zwa ku Muñ'a Bupilo.”
9Muñ'a Bupilo a fa Mushe litaelo. 10Mushe n'a na ni ku taluseza batu ba Isilaele kuli, “Yo muñwi wa mina, kamba wa baikulu ba mina, wa kona ku silafazwa ki ku swala situpu kamba a li kwahule mwa musipili, mi a lakaza ku buluka Paseka. 11Ba lumelelwa ku i buluka manzibwana a la bulishumi ni a mane mwa kweli ya bubeli. Ba ka eza mukiti ka linkwa ze si na mumela ni miloho ye baba. 12#Mut 12.46; Joa 19.36 Ba si ke ba buluka sico sifi kapa sifi ku fitela bu sa, mi ba si ke ba loba masapo a folofolo, nihaili li li liñwi feela. Ba ta buluka Paseka ka ku ya ka milao ya yona kaufela. 13Kono mañi ni mañi ya kenile ka mulao, mi a siyo mwa musipili, kono a sa lati ku buluka Paseka, h'a sa na ku ba yo muñwi wa batu ba ka, kakuli h'a si ka ni tiseza mpo ka nako ye tomilwe. U swanezwi ku utwiswa butuku kabakala sibi sa hae.
14“Haiba mulicaba ya yahile ni mina a tabela ku buluka Paseka, u swanezi ku i buluka ka ku latelela milao ni litaelo za yona kaufela. Mulao wo u tomezwi mañi ni mañi, mulicaba kamba mwana wa naha.”
Lilu la mulilo
(Mut 40.34-38)
15Zazi le i tomwa Tende ya Kopano, kwa taha lilu mi la t'o i kwahela. Ka nako ya busihu la bonahala inge mulilo. 16Kwa ba cwalo zazi ni zazi busihu ni musihali. Lilu la kwahela Tende mi busihu la bonahala inge mulilo. 17Lilu fo ne li nanuhela kaufela, batu ba Isilaele ne ba funduka. Mi fo ne li yema kamukana, ni bona ne ba tibelela. 18Batu ne ba yahulula mafulo ka taelo ya Muñ'a Bupilo, mi hape ne ba a yaha ka taelo ya hae. Nako kaufela ye ne li ina lilu fahalimw'a Tende, ki yona ye ne ba ina mwa mafulo. 19Lilu ha ne li kwahela tende nako ye telele, batu ne ba kuteka Muñ'a Bupilo ka ku sa funduka. 20Fokuñwi lilu ne li kwahela Tende mazazinyana feela. Kono nihakulicwalo niha ne ba ina kamba ku funduka, i n'e li ka taelo ya Muñ'a Bupilo. 21Fokuñwi lilu ne li kwahela ku zwa manzibwana ku isa kakusasa, mi ne ba funduka lilu li sa nanuha feela. Musihali kamba busihu, fo ne li nanuhela kaufela, ni bona ne ba funduka. 22I ka ba mazazi a mabeli, kweli, kamba silimo, hona mo ne li inela kaufela fahalimw'a Tende, ni bona ne ba sa funduki. Kono ha ne li nanuha, ni bona ne ba funduka. 23Ne ba yaha ni ku yahulula mafulo ka ku mamela litaelo z'a n'a fa Muñ'a Bupilo ka Mushe.
Lozi Interconfessional Bible, Catholic Edition © Bible Society of Zambia, 2009.