Lipalo 8
8
Ku paheka malampi
1 #
Mut 25.31-40; 37.17-24 Muñ'a Bupilo a li ku Mushe, 2“Bulelela Aruni kuli h'a paheka malampi a supile fa sipahekelo sa ona, u lukela ku a beya f'a ka kona ku bonahaza liseli kwapili.” 3Aruni a lumela, mi a beya malampi fapil'a sipahekelo. 4Ku zwa kwahalimu ku y'o fita kwatasi, sipahekelo ne si ezizwe ka gauda ye tulilwe, ka mukwa w'a n'a supelizwe Mushe ki Muñ'a Bupilo.
Ku keniswa kwa Malivi
5Muñ'a Bupilo a li ku Mushe, 6“U kauhanye Malivi kwa Maisilaele kaufela, mi u ba kenisa ka mukwa wo, 7‘U ba fafaze ka mezi a kenile, ba ipeule fa mibili kaufela, mi ba tapise liapalo za bona. Cwale ba ta be ba kenile. 8Malivi ba nge poho ye nyinyani ni limpo za lico ze tokwahala, ili bupi bwa mabele bo bu lubilwe ka mafula a olive, mi wena u nge poho ya bubeli ya sitabelo sa ku zwisa libi. 9Cwalehe, wena u kopanye Maisilaele kamukana, mi u suteleze Malivi fapil'a Tende ya Kopano. 10Batu ba Isilaele ba beye mazoho a bona fa litoho za Malivi. 11Cwale Aruni u ta ni ketela Malivi kuli ba eze musebezi wa ka. Ba be mpo ya butokwa ye zwa kwa Maisilaele. 12Cwale Malivi ba ta ezezwa sebelezo ya ku ba kenisa. Ba ta beya mazoho a bona fa litoho za lipoho ze peli. Ye ñwi i ta eziwa sitabelo sa ku zwisa libi, mi ye ñwi i be ya sitabelo sa ku cisa.
13“‘U ni ketele Malivi ba be mpo ya butokwa ku na, mi u supe Aruni ni bana ba hae, ba be bazamaisi ba bona. 14U kauhanye Malivi kwa Maisilaele kaufela, ka ona mukwa wo, kuli ba be ba ka.’ 15Ha u s'o kenisize Malivi ni ku ba tahisa ku na, fohe ba ta lumelelwa ku sebeza mwa Tende ya Kopano. 16Ni ikungezi bona mwa sibaka sa baeli kamukana ba Maisilaele, mi ki ba ka, na feela ni li nosi. 17#Mut 13.2 Ha ne ni bulaile baeli kamukana mwa Egepita, ne ni iketezi bana ba Maisilaele ba baeli mwa limba kaufela, hamoho ni maizibulo a limunanu kamukana. 18Cwale ni ikungela Malivi bakeñisa baeli ba Maisilaele kaufela. 19Ni ba fa Aruni ni bana ba hae, kuli i be mpo ye zwa kwa Maisilaele, ku t'o sebeleza batu ba Isilaele mwa Tende ya Kopano, ni ku ba sileleza kwa ziezi ye ne ka ba kenela ha ba ka sutelela fakaufi ni Sibaka se si Kenile.”
20Cwale Mushe, Aruni ni sicaba sa Isilaele ba keta Malivi sina mw'a n'a laelezwi Mushe ki Muñ'a Bupilo. 21Malivi ba ikenisa, ba tapisa liapalo za bona, mi Aruni a ba fitisa sina mpo ya butokwa ku Muñ'a Bupilo. Hape a eza sebelezo ya ku ba kenisa. 22Mi cwale Malivi ba lumelelwa ku sebeza mwa Tende ya Kopano ba nze ba zamaiswa ki Aruni ni bana ba hae. Batu ba eza lika kamukana z'a n'a laezwi Mushe ki Muñ'a Bupilo bakeñisa Malivi.
23Muñ'a Bupilo a li ku Mushe, 24“Malivi ba ta eza misebezi ya bona mwa Tende ya Kopano ku kala ka ba ba na ni lilimo ze mashumi a mabeli ka ze ketalizoho. 25Ha ba se ba na ni lilimo ze mashumi a ketalizoho, ba ka tuhela misebezi. 26Mwamulaho a zeo, ba ka na ba tusa Malivi ba bañwi ka ku eza misebezi ya bona mwa Tende, kono ba si ke ba eza misebezi ifi ni ifi ba li nosi. Kihona m'o swanezi ku zamaiseza misebelezo ya Malivi cwalo.”
Lozi Interconfessional Bible, Catholic Edition © Bible Society of Zambia, 2009.