Lipalo 10
10
Litolombita za silivela
1Muñ'a Bupilo a li ku Mushe, 2“Eza litolombita ze peli, za silivela ye tulilwe, za ku itusisa kwa ku biza batu ku yahulula mafulo. 3Litolombita ze peli zeo ha li lizwa nako ye telele, batu kamukana ba ta kubukana ku wena kwa munyako wa Tende ya Kopano. 4Kono ha ku lizwa i liñwi feela, fohe, manduna ba mishiku ki bona ba ba ka t'o kopanela ku wena. 5Ha li lizwa ka bukuswani, masika a tibelezi kwa neku la upa a ta funduka. 6Ha ku kutelwa ku lizwa ka bukuswani lwa bubeli, masika a kwa neku la mboela a ta funduka ni ona. Cwalehe ku liza ka bukuswani ki zibiso ya ku yahulula mafulo. 7Kono ku kopanya sicaba hamoho ku tokwahala ku liza mifumbo ye mitelele. 8Litolombita li swanezi ku liziwa ki bana ba Aruni, bona baprisita.
“Mulao o tatama u swanezi ku bulukiwa ki masika kaufela a sa taha. 9Ha mu lwana mwa naha ya mina, mu itamulela kwa sila se si mi lwanisa, mu lemuse sicaba ka ku liza litolombita. Na, Mulena Mulimu wa mina, ni ta mi tusa ku mi pilisa kwa lila za mina. 10Hape ni ka linako za tabo, kwa mikiti ya mina ya moonda, ni mikiti ya mina ye miñwi cwalo ya bulumeli, mu lize litolombita ha mu eza litabelo za mina za ku cisa kapa za ku tiisa bulikani. Cwale, ni ta mi tusa. Ki na Muñ'a Bupilo, Mulimu wa mina.”
Mukwa wa ku funduka
11Ka lizazi la mashumi a mabeli la kweli ya bubeli, mwa silimo sa bubeli sa ku zwa kwa Maisilaele mwa Egepita, lilu le ne li li fahalimu a Tende ya Kopano la nanuha. 12Maisilaele ba kala musipili wa bona wa ku zwa mwa Lihalaupa la Sinai. Lilu la t'o yema mwa Lihalaupa la Parani.
13Kiha ba kala ku funduka ka taelo ya Muñ'a Bupilo, ye ne ba filwe ka Mushe. 14Ka nako kaufela ha ne ba funduka, ba ba mwatas'a ndembela ya likolo le ne li etelezwi ki lusika lwa Juda, ki bona ba ba ne ba funduka pili. Ba latelelana ka litopa, ba nze ba laelwa ki Nashoni mwan'a Aminadabi. 15Netaneele, mwan'a Zuari, ki yena ya n'a laela ba lusika lwa Isakare. 16Eliabi, mwan'a Heloni, yena, n'a zamaisa ba lusika lwa Zebuloni.
17Cwale Tende ne i yahululwa, mi ba mishiku ya Gerishoni ni Merari, ba ba ne ba i lwala, ne ba funduka ni bona.
18Ku zwa fo, ne ku latelela ba ba mwatas'a ndembela ya likolo la lusika lwa Rubeni. Ne ba funduka ka litopa za bona ba nze ba zamaiswa ki Elizuri mwan'a Shedeuri. 19Shelumiele, mwan'a Zurishadai, yena, n'a zamaisa ba lusika lwa Simioni. 20Haili Eliasafi, mwan'a Reuele, n'a zamaisa lusika lwa Gadi.
21Ba mushiku wa Kohati, ba ba ne ba lwalanga libyana ze kenile, ni bona ne ba ba latelela. Ka nako ye ne ba y'o fita mwa mafulo a mañwi, Tende ne i se i tomilwe hape.
22Ku zwa fo, ne ku latelela ba ba mwatas'a ndembela ya likolo la lusika lwa Eferaimi. Ne ba funduka ka litopa za bona ba nze ba zamaiswa ki Elishama mwan'a Amihudi. 23Gamaliele, mwan'a Pedazuri, n'a zamaisa ba lusika lwa Manase. 24Abidani mwan'a Gidioni, yena, n'a zamaisa ba lusika lwa Benjamine.
25Kwa mafelelezo, ba ndembela ya likolo le ne li etelezwi ki ba lusika lwa Dani, ba ba ne ba li basilelezi ba makolo kaufela kwa mulaho, ni bona ne ba funduka sitopa ka sitopa, ba nze ba zamaiswa ki Akiezele mwan'a Amishadai. 26Pagiele, mwan'a Okurani, n'a zamaisa lusika lwa Asere. 27Akira, mwan'a Enani, n'a zamaisa lusika lwa Nafetali. 28Cwale wo n'e li ona mukwa o ne ba zamaya ka ona Maisilaele, ka makolo a bona, ha ne ba yahulula mafulo ni ku funduka.
29Mushe a bulelela mulamwaye, yena Hobabi mwan'a Jetero wa Mumidiani, a li, “Lu tuha lu funduka ku ya mwa sibaka s'a bulezi Muñ'a Bupilo kuli u ta lu fa sona. U sepisize kuli u ta pilisa hande Maisilaele. Cwalehe, a lu ye kaufela, lu y'o pila hande hamoho.”
30Hobabi a alaba, a li, “Batili, na, ni kutela mwa naha ya hesu.”
31Mushe a li, “Mwanesu, u si ke wa lu siya. Wa ziba fo lu ka y'o yaha mafulo mwa lihalaupa, mi wa kona ku lu supeza nzila. 32Ha lu ka ya ni wena, lu ka y'o ikabela limbuyoti kaufela z'a ka lu fa Muñ'a Bupilo.”
Batu ba funduka
33Batu ha ba zwa mwa Sinai, lilundu le li kenile, ba zamaya mazazi a malalu, mi Likwati la Bulikani bwaa Muñ'a Bupilo la ba etelela ku ba fumanela sibaka sa mafulo. 34Ha ba zwa mwa mafulo a mañwi ni a mañwi musihali, lilu la Muñ'a Bupilo ne li li fahalimw'a bona.
35 #
Lipi 68.1
Likwati la Bulikani ha ne li funduka, Mushe n'a li, “Zuha, Muñ'a Bupilo. Hasanya lila za hao, mi u sabise ba ba ku toile!” 36Mi fo ne li yemela kaufela, n'a li, “Muñ'a Bupilo, kutela kwa likiti ze lishumi za masika a Isilaele.”
Lozi Interconfessional Bible, Catholic Edition © Bible Society of Zambia, 2009.