Lipalo 7
7
Limpo za baeteleli
1Ka lizazi l'a n'a felize Mushe ku yaha Tende ya Kopano, a i toza, mi a i kenisa hamoho ni libyana za yona kaufela. A kenisa cwalo katala hamoho ni lisebeliso za kona kamukana. 2Cwale ba taha manduna ba mishiku ba ba ne ba li baeteleli mwa masika a Isilaele, ili bona ba ba ne ba ñolisa sicaba. 3Ba tisa limpo za bona ku Muñ'a Bupilo, ili likoloi ze silezi ni mapulu a lishumi ka a mabeli. Kwa manduna ba babeli ne ku na ni ku zwa koloi i liñwi ni pulu i liñwi ku nduna yo muñwi ni yo muñwi. Ba li tisize ku Muñ'a Bupilo. 4Cwale Muñ'a Bupilo a li ku Mushe, 5“Amuhela limpo ze, za ku itusisa mwa musebezi o ta eziwa mwa Tende ya Kopano. U li fe Malivi, ka ku ya ka misebezi ya bona.” 6Cwale Mushe a fa Malivi likoloi ni mapulu. 7A fa Magerishoni likoloi ze peli ni mapulu a mane. 8Mamerari a ba fa likoloi ze ne ni mapulu a supile ni i liñwi. Misebezi ya bona kaufela ne i zamaiswa ki Itamare mwan'a Aruni. 9Kono Mushe n'a si ka fa Makohati likoloi kamba lipulu, kakuli ne ba na ni ku lwala, ili bona, libyana ze kenile ze ne ba babalela.
10Hape baeteleli ba tisa limpo za ku eza mukiti wa ku kakula katala. Ne ba itukiselize ku fitisa limpo za bona kwa katala. 11Muñ'a Bupilo a li ku Mushe, “U ba bulelele kuli ka zazi ni zazi, mwa mazazi a lishumi ka a mabeli, nduna ni nduna u swanezi ku tisa limpo za hae za sebelezo ya ku kenisa katala.”
12Ba tisa limpo za bona ka mukwa wo: Nduna Nashoni, mwan'a Aminadabi wa lusika lwa Juda, ki yena ya tisize limpo za hae ka lizazi la pili. 13Limpo z'a n'a tisize n'e li mukeke wa silivela wa kwiti o na ni bukiti bo bu bata ku eza kilo i liñwi ni licika, ni sikotolo sa silivela se si eza bukiti bo bu bata ku likana ni kilo i liñwi ili ka tikanyo ye n'e tomilwe ka mulao, mi bubeli bwa bona ne i tezi bupi bo bu kopanyizwe ni mafula, ili ka mpo ya lico, 14mukeke wa gauda o n'o bata ku eza kalulo ya bulishumi ya kilo kwa bukiti mi o tezi insense, 15nkomwana ya poho, poho ya ngu, nkomwana ya ngu ya silimo si li siñwi, ili za sitabelo sa ku cisa, 16puli i liñwi ya sitabelo sa ku zwisa libi, 17ni lipoho ze peli, lipoho za lingu li ketalizoho, lipuli li ketalizoho, ni mankomwana a ketalizoho a lingu a silimo si li siñwi, ili za sitabelo sa ku tiisa bulikani.
18Nduna Nataneele, mwan'a Zuari wa lusika lwa Isakare, ki yena ya tisize limpo za hae ka lizazi la bubeli. 19-23Limpo z'a n'a tisize n'e li likanelela ni za Juda.
24Nduna Eliabi, mwan'a Heloni wa lusika lwa Zebuloni, ki yena ya tisize limpo za hae ka lizazi la bulalu. 25-29Limpo z'a n'a tisize n'e li likanelela ni za Juda.
30Nduna Elizuri, mwan'a Shedeuri wa lusika lwa Rubeni, ki yena ya tisize limpo za hae ka lizazi la bune. 31-35Limpo z'a n'a tisize n'e li likanelela ni za Juda.
36Nduna Shelumiele, mwan'a Zurishadai wa lusika wa Simioni, ki yena ya tisize limpo za hae ka lizazi la butanu. 37-41Limpo z'a n'a tisize n'e li likanelela ni za Juda.
42Nduna Eliasafi, mwan'a Reuele wa lusika lwa Gadi, ki yena ya tisize limpo za hae ka lizazi la busilela. 43-47Limpo z'a n'a tisize n'e li likanelela ni za Juda.
48Nduna Elishama, mwan'a Amihudi wa lusika lwa Eferaimi, ki yena ya tisize limpo za hae ka lizazi la busupa. 49-53Limpo z'a n'a tisize n'e li likanelela ni za Juda.
54Nduna Gamaliele, mwan'a Pedazuri wa lusika lwa Manase, ki yena ya tisize limpo za hae ka lizazi la busupa ni li li liñwi. 55-59Limpo z' n'a tisize n'e li likanelela ni za Juda.
60Nduna Abidani, mwan'a Gidioni wa lusika lwa Benjamine, ki yena ya tisize limpo za hae ka lizazi la busupa ni a mabeli. 61-65Limpo z'a n'a tisize n'e li likanelela ni za Juda.
66Nduna Akizele, mwan'a Amishadai wa lusika lwa Dani, ki yena ya tisize limpo za hae ka lizazi la bulishumi. 67-71Limpo z'a n'a tisize n'e li likanelela ni za Juda.
72Nduna Pagiele, mwan'a Okurani wa lusika lwa Asere, ki yena ya tisize limpo za hae ka lizazi la bulishumi ni li li liñwi. 73-77Limpo z'a n'a tisize n'e li likanelela ni za Juda.
78Nduna Akira, mwan'a Enani wa lusika lwa Nafetali, ki yena ya tisize limpo za hae ka lizazi la bulishumi ni a mabeli. 79-83Limpo z'a n'a tisize n'e li likanelela ni za Juda.
84Palo ya limpo kamukana ze ne tisizwe ki baeteleli ba lishumi ka ba babeli kwa kakulo ya katala ne i zamaile ka mukwa wo.
85Ne ku na ni miikeke ya kwiti ya silivela ye lishumi ka ye mibeli ni likotolo za silivela ze lishumi ka ze peli, hamoho ne li eza bukiti bo bu likana ni likilo ze mashumi a mabeli ka ze supile.
86Ne ku na ni mikeke ya gauda ye lishumi ka ye mibeli, hamoho ne i eza bukiti bo bu kuma fa kilo i liñwi ni licika ye tezi insense.
87Ne ku na ni lipoho ze lishumi ka ze peli, lipoho za lingu ze lishumi ka ze peli, hape ni mankomwana a lingu a lishumi ka a mabeli a na ni silimo si li siñwi, ni limpo za lico ze iswa ni zona kwa litabelo za ku cisa, ni lipuli ze lishumi ka ze peli za sitabelo sa ku zwisa libi.
88Ne ku na ni lipoho ze mashumi a mabeli ka ze ne, lipoho za lingu ze mashumi a silezi, lipuli ze mashumi a silezi, mankomwana a lingu a silimo si li siñwi a mashumi a silezi, a li a matabelo a ku tiisa bulikani.
89Nako kaufela Mushe ha n'a yanga kwa Tende ya Kopano ku y'o bulela ni Muñ'a Bupilo, n'a mu utwanga a bulela ni yena, a li fahalimw'a sikwahelo sa Likwati la Bulikani, mwahal'a libupiwa ze peli ze na ni mafufa.
Lozi Interconfessional Bible, Catholic Edition © Bible Society of Zambia, 2009.