Lipalo 6
6
Milao ya Bunazareni
1Muñ'a Bupilo a fa Mushe litaelo. 2Mushe n'a na ni ku fa batu ba Isilaele litaelo ze kuli, “Munna kamba musali ufi ni ufi wa kona ku itama kuli u ta ba wa Muñ'a Bupilo, mi a ipeya ku yena. 3#Luk 1.15 U ta tuhela waine ni bucwala. H'a na ku nwa sifi ni sifi se si ezizwe ka miselo ya likota za veine, kamba ku ca yona miselo yeo. 4H'a nz'a li wa Munazareni cwalo, h'a na ku ca se si zwa kwa likota za veine, i ka ba minjeke kamba makapi a zona.
5“H'a nz'a li mwa buitamo bwa ku ba Munazareni, h'a swaneli ku ikuta milili kamba ku ipeula milelu. U tamilwe ki luci lwa hae nako kaufela h'a sa ipeile ku Muñ'a Bupilo, mi u ta uta milelu ni milili kuli li hule. 6H'a na ku sutelela kwa situpu. 7H'a na ku sutelela nihaiba sa ndat'ahe, sa m'ahe, sa muhulwan'a hae kamba sa kaizel'a hae. A si ke a isilafaza ka ku sutelela kwatuko a situpu, kakuli milili ya hae ki poniso ya kuli ki wa Mulimu. 8H'a nz'a li Munazareni cwalo, u sumekezwi Muñ'a Bupilo.
9“Haiba mutu a ka shwela kwatuko a Munazareni ka lifu la sipundumukela, mi a silafaza milili ye kenile ya Munazareni yo, u ta ina mazazi a supile, kihona a ta kuta milili ni ku ipeula mulelu, mi ka mukwa wo, u ta kena ka mulao. 10Ka lizazi la busupa ka li li liñwi, u ta tisa maiba a mabeli kamba linkwilimba ze peli ku muprisita ili kwa munyako wa Tende ya Kopano. 11Muprisita u ta eza ye ñwi ya zona sitabelo sa libi, mi ye ñwi i be ya sitabelo sa ku cisa, mi ka mukwa wo a eze sebelezo ya ku kenisa mutu yo kabakala ku sutelela kwa situpu. I sa li ka lona lizazi leo, mutu yo u ta kenisa toho ya hae. 12Mi u ka kutela ku ba wa Muñ'a Bupilo sinca hape. Nako ya hae ya pili ya buitamo ha i sa balwa, kakuli milili ya hae ye n'e kenile i silafalizwe. U lukela ku tisa nkomwana ya ngu ya silimo si li siñwi ku ba mpo ya tifo.
13 #
Lik 21.23-24
“Munazareni u lukela ku ikenisa cwana h'a s'a felize buitamo bwa hae. U ta ya kwa munyako wa Tende ya Kopano. 14Cwale a y'o fa Muñ'a Bupilo limunanu ze talu ze si na fo li nyazahala, ili pohwana ya ngu ya silimo si li siñwi ya sitabelo sa ku cisa, nkomwana ya ngu ya sitole ya silimo si li siñwi, ili ya sitabelo sa ku zwisa libi, ni poho ya ngu ya sitabelo sa ku tiisa bulikani. 15Hape, u ta tisa sizuma sa linkwa ze si na mumela, ili linkwa ze kima za bupi bo bu kopanyizwe ni mafula a olive, ni mañende a masisani a lambilwe mafula a olive, hamoho ni limpo ze tokwahala za mabele ni waine.
16“Muprisita u ta li fitisa fapil'a Muñ'a Bupilo, mi a li eze sitabelo sa ku zwisa libi ni sitabelo sa ku cisa. 17U ka ezeza Muñ'a Bupilo sitabelo sa poho ya ngu, ili mpo ya ku tiisa bulikani. A fitise ni sizuma sa linkwa hamoho ni limpo za mabele ni waine. 18Munazareni yo, u ta ikutela milili fa munyako o liba kwa Tende ya Kopano, mi a y'o i beya mwa mulilo fo ku cisezwa sitabelo sa ku tiisa bulikani.
19“Cwale muprisita u ta nga sipaka sa ngu, ha si se si apehilwe. Hape a nge sinkwa si li siñwi se sikima, ni liñende le lisisani mwa sizuma, mi a li beye mwa mazoho a Munazareni. 20Ku zwa fo, muprisita u ta li fitisa ku Muñ'a Bupilo, ili limpo ze kenile za muprisita, li ekezwe kwa pita ni silupi sa ngu. Zeo ki za hae ka swanelo. Ha ku felile zeo, Munazareni a ka nwa waine.
21“Ye ki yona milao ya Manazareni. Kono haiba yo muñwi wa bona a sepisa mpo ye ñwi, kwand'a z'a swanezi ku fa, a li Munazareni, u swanezi ku taleleza hande sepiso ya hae.”
Mbuyoti ya Buprisita
22Muñ'a Bupilo a fa Mushe litaelo. 23Mushe n'a na ni ku bulelela Aruni ni bana ba hae kuli ba sebelise mbuyoti ye, kwa sicaba sa Isilaele,
24Muñ'a Bupilo a mi fuyaule, mi a mi babalele.
25Muñ'a Bupilo a mi shemube ni ku mi shwela makeke.
26Muñ'a Bupilo a mi talime ka musa, mi a mi fe kozo.”
27Haiba ba sebelisa tohonolofazo ye, ha ba lapelela sicaba sa Isilaele ku Muñ'a Bupilo, u ta ba fuyaula.
Lozi Interconfessional Bible, Catholic Edition © Bible Society of Zambia, 2009.