Lipalo 5
5
Batu ba ba si ka kena
1Mulimu a li ku Mushe, 2“Laela Maisilaele kuli ba zwise mwa mafulo mutu kaufela ya na ni butuku bwa mbingwa kamba bwa sooya, kamba mutu ufi ni ufi ya isilafalize ka ku swala-swala situpu. 3Mu zwise batu bao kamukana ba ba si ka kena, ili kuli ba si ke ba silafala mafulo, mo ni pila ni batu ba ka.” 4Maisilaele ba utwa, mi ba ba zwisa mwa mafulo kaufel'a bona.
Litifo bakeñisa bumaswe bo bu ezizwe
5 #
Malivi 6.1-7
Muñ'a Bupilo a fa Mushe litaelo. 6Mushe n'a na ni ku fa batu litaelo ze za sicaba sa Isilaele kuli, “Mutu h'a sa sepahali ku Muñ'a Bupilo ka ku foseza yo muñwi, u na ni mulatu. 7U swanezi ku ipulela libi za hae ni ku lifela ya foselizwe mulatu wa hae kaufela, mane a ekeze ñambeko ya kalulo ya buketalizoho ya tifo. 8Kono haiba mutu yo ya foselizwe a shwile, mi a si na wahabo ya lukela ku amuhela tifo yeo, fohe i ta fiwa Muñ'a Bupilo kuli i be ya muprisita. Tifo yeo ki ñambeko ye beiwa fa poho ya ngu ye itusiswa kwa ku mu kenisa. 9Ku cwalo ni ku zona limpo ze ñwi za Maisilaele ze ba tisezanga Muñ'a Bupilo. Ki za muprisita ya li amuhela. 10Muprisita yo muñwi ni yo muñwi u ta buluka limpo ze tiswa ku yena.
Litaba za banna ba ba lifufa
11Muñ'a Bupilo a fa Mushe litaelo. 12Mushe n'a na ni ku fa Maisilaele litaelo ze kuli, “Munna wa kona ku nuhelela kuli musal'a hae h'a sepahali. 13Wa kona ku nuhelela ni kuli mwendi u isilafalize ka ku fosa ni munna u sili, kono a si na niti hande kakuli musali u patile taba, hape ne ku si na paki, ni musali h'a si ka swaleha. 14Hape munna wa kona ku nuhelela, musal'a hae nih'a si ka fosa. 15Ku zona litaba zeo, munna u lukela ku isa musal'a hae ku muprisita. A lwale ni mpo ye tomilwe, ili likomoki ze peli za bupi, kono a si ke a bu sela mafula a olive kamba ku beya fateñi insense, kakuli ki mpo ya taba ya ku nuhelela, mi ili kuli ku fumanehe niti.
16“Muprisita u ta fitiseza musali kwapili ni ku mu yemisa fapil'a Muñ'a Bupilo. 17Muprisita u ta sela mezi mwa mukeke wa lizupa wa kwiti, mi a ñwate mubunyana o mwa Tende ya Kopano, mi a u sele mwa mezi. 18Cwale muprisita u ta tatulula milili ya musali yo, mi a beye mpo ya bupi mwa mazoho a hae. Kihona a ta swala mukeke wa mezi a baba a tisa sikuto. 19U ta konkisa musali. U ta li ku yena, ‘Haiba u si ka fosa ni munna, ha u na ku holofazwa ki sikuto se si ka tiswa ki mezi a. 20Kono mwendi u fosize! 21Fohe, Muñ'a Bupilo a fetule libizo la hao sikuto mwahal'a banabahenu. A kwale zwalo ya hao, mi a luluhise mba ya hao. 22Mezi a, a kena mwa mba ya hao, a i luluhisa. Mi hape a kwale ni zwalo ya hao.’
“Musali u ta alaba, a li, ‘Na lumela. Muñ'a Bupilo a eze cwalo.’
23“Cwale muprisita u ta ñola sikuto seo, mi a tapise muñolo wo mwa mukeke wa mezi a baba. 24Muprisita u ka nwisa musali mezi ao, kuli a mu utwise butuku. 25Kono pili a si ka eza cwalo u ta nga mpo ya bupi mwa mazoho a musali, a bu nanulele mwahalimu ili ku bu fitisa ku Muñ'a Bupilo, mi a bu beye fa katala. 26Cwale u ta ñwata mwateñi lizoho le li tezi, kuli i be mpo ya kupuzo, mi a bu ciseze fa katala. Kwa mafelelezo, u ta nwisa musali mezi ao. 27Haiba a fosize, mezi a ta mu utwisa hahulu butuku, mba ya hae i ta luluha, mi zwalo ya hae i ta kwaleha. Libizo la hae li ta ba sikuto mwahal'a bahabo. 28Kono haiba a si na mulatu, h'a na ku holofala, mi u ta kona ku ipelela hande.
29“Wo, ki ona mulao wa lifufa. Musali ya li mwa maata a munn'a hae wa kona ku izamaela ni ku isinya. 30Hape munna wa kona ku nahanela musal'a hae kuli u fosize. U ta yemisa musal'a hae fapil'a Muñ'a Bupilo, mi muprisita u ta eza sebelezo yeo ka mulao. 31Munna, yena, h'a na ku ba ni mulatu, kono haiba musali a na ni mulatu, u swanezi ku utwiswa butuku.”
Lozi Interconfessional Bible, Catholic Edition © Bible Society of Zambia, 2009.