Lipalo 4
4
Misebezi ya ba mushiku wa Kohati
1Muñ'a Bupilo a fa Mushe litaelo. 2Mushe n'a na ni ku bala Malivi ba mushiku wa Kohati, ka masika ni limba za bona. 3N'a na ni ku ñola banna kamukana ba lilimo ze mwahal'a ze mashumi a malalu ni ze mashumi a ketalizoho, ba ba ne ba swanezi ku sebeza mwa Tende ya Kopano. 4Musebezi wa bona ki wa lika ze kenile hahulu.
5Muñ'a Bupilo a fa Mushe litaelo ze, a li, “Ha s'e li nako ya ku yahulula mafulo, Aruni ni bana ba hae ba ta kena mwa Tende, ba pahulule lisila le li fapil'a Likwati la Bulikani, mi ba apese likwati ka lona. 6Ba ta kwahela likwati ka litalo le linde, mi fahalimw'a lona ba apese lisila le litala, kihona ba ta comeka mitiyo.
7“Ba ta yala lisila le litala fa tafule fo ku beiwa linkwa ze fiwa Muñ'a Bupilo. Hape ba beye fateñi mikeke, mikeke ya kwiti ya ku ciseza insense, mikeke ya kwiti ya limpo, ni linkwana za limpo za waine. Linkwa li ta siiwa fa tafule. 8Zeo kamukana li kwahelwe ka lisila le lifubelu, mi ku apeswe litalo le linde fahalimu. Kihona ku ta comekiwa mitiyo.
9“Ba ta nga lisila le litala, mi ba apese sipahekelo sa lilampi hamoho ni malampi a sona, mamangato, mañetana a mulilo, ni lilibelo za mafula a olive. 10Ba ta si putela mwa litalo le linde hamoho ni lisebeliso za sona, mi kihona ba ta si beya fa mutiyo.
11“Ku zwa fo, ba ta kwahela katala ka gauda ka lisila le litala, mi fahalimw'a lona ba ta apesa litalo le linde, mi kihona ba ta comeka mitiyo. 12Ba ta nga lika kaufela ze sebeliswa mwa Sibaka se si Kenile, ba li putele mwa lisila le litala, ba kwahele fahalimu ka litalo le linde, mi ba li beye fa mutiyo. 13Ba ta olela mulola fa katala, mi ba ka apese ka lisila le litala. 14Cwale ba ta beya fateñi lika kamukana ze sebeliswa kwa katala ili mañetana a mulilo, tushuto, lifocolo ni likotolo. Cwale, ba li apese ka litalo le linde, mi ba comeke mitiyo.
15“Nako ya ku yahulula mafulo ha i se i fitile, ba mushiku wa Kohati ba ka taha ku t'o lwala libyana ze kenile, Aruni ni bana ba hae ha ba se ba felize ku li apesa hamoho ni lisebeliso za zona kamukana. Ba mushiku wa Kohati ba si ke ba lika ku swala nihaili si li siñwi sa libyana ze kenile. Ha ba ka eza cwalo, ba ka shwa.
“Ze, ki zona ze ba ka lwala ba mushiku wa Kohati ha ku shimbululwa Tende ya Kopano.
16“Eliazare, mwan'a muprisita Aruni, ki yena ya ka talima za Tende kaufela hamoho ni mafula a mwa malampi, insense, limpo za lico, mafula a ku tozisa ni lika kamukana za mwa Tende ze ketezwi Muñ'a Bupilo.”
17Muñ'a Bupilo a li ku Mushe ni Aruni: 18“Mu bone kuli ha mu kauhani Makohati kwa Malivi. 19Ba si ke ba bulaiwa bakeñisa ku sutelela kwa libyana ze, ze kenile hahulu. Kuli ku si ke kwa ezahala cwalo, Aruni ni bana ba hae ba ta kena mwahali ku y'o fa mutu ni mutu musebezi wa hae, ni ku mu bulelela s'a swanezi ku lwala. 20Kono haiba Makohati ba kena mwa Tende, mi ba bona baprisita ha ba lukisa libyana ze kenile zeo ze tutiswa, ba ta shwa.”
Misebezi ya ba mushiku wa Gerishoni
21Muñ'a Bupilo a fa Mushe litaelo. 22Mushe n'a na ni ku bala Malivi ba mushiku wa Gerishoni ka mishiku ni limba za bona. 23Hape Mushe n'a ni ku ñola banna kaufela ba lilimo ze mwahal'a ze mashumi a malalu ni ze mashumi a ketalizoho, ba ba ne ba lukela ku sebeza mwa Tende ya Kopano. 24Ba lukela ku lwala libyana ze. 25Tende ya Kopano, lisila la yona ni litata la litalo la mwahali ni la litalo le linde la fahalimu, lisila la kwa munyako, 26masila ni mihala ya lapa le li potolohile Tende ni katala, masila a kwa munyako wa lapa ni lika kamukana ze itusiswa ku ngungahanya lika ze. Ba ta eza misebezi ye tokwahala kamukana. 27Mushe ni Aruni ba swanezi ku bona kuli Magerishoni ba eza misebezi kaufela ni ku lwala lika kamukana ze ba laelwa ki Aruni ni bana ba hae. 28Ye, ki yona misebezi ya ba mushiku wa Gerishoni mwa Tende ya Kopano. Ba ta eza misebezi yeo ka zamaiso ya Itamare, mwan'a muprisita Aruni.
Misebezi ya mushiku wa Merari
29Muñ'a Bupilo a bulelela Mushe ku bala Malivi ba mushiku wa Merari, ka mishiku ni limba za bona. 30Mushe n'a ni ku ñola banna kaufela ba lilimo ze mwahal'a ze mashumi a malalu ni ze mashumi a ketalizoho, ba ba lukela ku sebeza mwa Tende ya Kopano. 31Ba, ki bona ba ba ta lwala mabala, mabalelo, misumo ni matomelo a Tende, 32misumo ye potoloha lapa, matomelo a yona, likonkwani ni mihala ya lapa le li potolohile Tende, hamoho ni lika kamukana ze itusiswa ku ngungahanya lika zeo. Mutu ni mutu u ta bulelelwa s'a swanezi ku lwala. 33Ye ki yona misebezi ya ba mushiku wa Merari mwa Tende ya Kopano. Ba ta eza misebezi yeo ka zamaiso ya Itamare, mwan'a muprisita Aruni.
Palo ya Malivi
34Ka ku latelela taelo ya Muñ'a Bupilo, Mushe, Aruni ni baeteleli ba sicaba ba bala mushiku wa Kohati ka limba za ona. 35Ba ñola banna kamukana ba lilimo ze mwahal'a ze mashumi a malalu ni ze mashumi a ketalizoho, ba ba ne ba lukela ku sebeleza mwa Tende ya Kopano. 36Ba ba balilwe ku bona ka limba za bona ki ba ba eza likiti ze peli ka mianda ye supile ni mashumi a ketalizoho. 37Ba, ki ba ba ñolwa mwa mushiku wa Kohati kaufela ba ba ne ba lukela ku sebeleza mwa Tende ya Kopano. Ba ñolilwe ki Mushe ni Aruni sina mw'a n'a laelezi Muñ'a Bupilo.
38Ka ku latelela taelo ya Muñ'a Bupilo, Mushe, Aruni ni baeteleli ba sicaba ba bala mushiku wa Gerishoni ka limba za ona. 39Ba ñola banna kamukana ba lilimo ze mwahal'a ze mashumi a malalu ni ze mashumi a ketalizoho, ba ba ne ba lukela ku sebeleza mwa Tende ya Kopano. 40Ba ba balilwe ku bona ka limba za bona ki ba ba eza likiti ze peli ka mianda ye silezi ni mashumi a malalu. 41Ba, ki ba ba ñolwa mwa mushiku wa Gerishoni kaufela ba ba ne ba lukela ku sebeleza mwa Tende ya Kopano. Ba ñolilwe ki Mushe ni Aruni sina mw'a n'a laelezi Muñ'a Bupilo.
42Ka ku latelela taelo ya Muñ'a Bupilo, Mushe, Aruni ni baeteleli ba sicaba ba bala mushiku wa Merari ka limba za ona. 43Ba ñola banna kamukana ba lilimo ze mwahal'a ze mashumi a malalu ni ze mashumi a ketalizoho, ba ba ne ba lukela ku sebeleza mwa Tende ya Kopano. 44Ba ba balilwe ku bona ka limba za bona ki ba ba eza likiti ze talu ka mianda mibeli. 45Ba, ki ba ba ñolwa mwa mushiku wa Merari kaufela ba ba ne ba lukela ku sebeleza mwa Tende ya Kopano. Ba ñolilwe ki Mushe ni Aruni sina mw'a n'a laelezi Muñ'a Bupilo.
46Ibe Mushe, Aruni ni baeteleli ba sicaba ba ñola Malivi kaufela ka mishiku ni limba za bona. 47Ba ñola banna kamukana ba lilimo ze mwahal'a ze mashumi a malalu ni ze mashumi a ketalizoho, ba ba ne ba lukela ku sebeleza mwa Tende ya Kopano. 48Ba ba ñolilwe ka mishiku ya bona ba eza likiti ze supile ka si li siñwi ni mianda i ketalizoho ka mashumi a supile ni li li liñwi.
49Munna ni munna a fiwa musebezi wa hae wa mwa Tende kamba ku lwala, ili ka taelo ya Muñ'a Bupilo ka Mushe, mi yo muñwi ni yo muñwi a ñolwa sina mw'a n'a laelezwi Mushe ki Muñ'a Bupilo.
Lozi Interconfessional Bible, Catholic Edition © Bible Society of Zambia, 2009.