Lipalo 3
3
Bana ba Aruni
1Lo, ki lona lusika lwa Aruni ni Mushe ku fitela f'a bulelela Muñ'a Bupilo ku Mushe fa Lilundu la Sinai. 2#Lipa 26.60 Aruni n'a na ni bana ba bashimani ba bane, ili Nadabi, mweli wa hae, Abihu, Eliazare ni Itamare. 3Ne ba tozizwe ni ku beiwa fa buprisita. 4#Malivi 10.1-2; Lipa 26.61 Kono Nadabi ni Abihu ne ba bulailwe mwa Lihalaupa la Sinai ha ne ba tiselize Muñ'a Bupilo mulilo o n'o si ka kena. Ne ba si na bana. Cwale Eliazare ni Itamare ba sebeza ba li baprisita ka nako y'a n'a sa pila ndat'a bona Aruni.
Malivi ba ketelwa ku tusa baprisita
5Muñ'a Bupilo a li ku Mushe, 6“Tisa ba lusika lwa Livi kwa pili, mu u ba kete kuli ba be batusi ba muprisita Aruni. 7Ba ta eza musebezi o tokwahala mwa Tende ya Kopano, ba nze ba tusa baprisita ni sicaba kamukana. 8Ba ta tokomela lisebeliso za mwa Tende ni ku peta misebezi kaufela ya Maisilaele ba bañwi. 9Buikalabelo feela bwa Malivi ki bwa ku tusa Aruni ni bana ba hae. 10Kono Aruni ni bana ba hae u ta ba ketela ku eza misebezi ya buprisita. Mutu kaufela ya ta lika ku eza misebezi ya bona yeo u ta bulaiwa.”
11Muñ'a Bupilo a li ku Mushe, 12“Cwale ni nga Malivi mwa sibaka sa baeli kaufela ba sicaba sa Isilaele, mi ba ta ba ba ka. 13#Mut 13.2 Ni eza cwalo kakuli baeli ba bashimani kamukana ki ba ka. Ha ne ni bulaile baeli kaufela ba mwa Egepita, n'e li ku ikungela mweli mwa mba ni mba ya Maisilaele kamukana, ni maizibulo a limunanu kaufela. Ki na Muñ'a Bupilo.”
Ku balwa kwa Malivi
14Mwa Lihalaupa la Sinai, Muñ'a Bupilo a fa Mushe litaelo. 15N'a na ni ku ñola Malivi ka limba ni ka mishiku ya bona, a nz'a kenya mwa buka bashimani kaufela ku kala ka ya na ni kweli i liñwi, kamba ku fita fo. 16Mi Mushe a eza cwalo. 17Livi n'a na ni bana ba bashimani ba balalu, ili bo Gerishoni, Kohati ni Merari. 18Bao, n'e li bona bo kukw'a batu ba mishiku ye na ni mabizo a bona. Gerishoni n'a na ni bana ba babeli ba bashimani, ili bo Libini ni Shimei. 19Kohati yena n'a na ni ba bane, ili bo Amirami, Izari, Heberoni ni Uziele. 20Haili Merari, yena, n'a na ni ba babeli, ili bo Mahali ni Mushi. Bao, n'e li bona bo kukw'a batu ba masika a na ni mabizo a bona.
21Limba ze peli n'e li za mushiku wa Gerishoni, ili mba ya Libini ni ya Shimei. 22Palo ya bana ba bashimani ba kweli i liñwi ni ba ba fitelela fo, ba ba ne ba ñozwi, n'e li ba likiti ze supile ni mianda i ketalizoho. 23Ba mushiku wo ne ba swanezi ku tibelela kwa mulaho a Tende ili kwa neku la wiko. 24Eliasafi, mwan'a Laele, n'e li nduna wa mushiku wa bona. 25Ne ba na ni buikalabelo ka za Tende ya Kopano, ze apesa Tende kaufela, ni lisila la fa munyako. 26Hape ne ba na ni buikalabelo ka za masila a kwa malibela a potolohile Tende ni katala, ni lisila la fa munyako wa malibela. Ne ba na ni maata fa misebezi kaufela ye amana ni lika zeo kamukana.
27Limba ze ne n'e li za mushiku wa Kohati, ili za Maamirami, Maizari, Maheberoni ni Mauziele. 28Palo ya bana ba bashimani ba kweli i liñwi kamba ku fita fo, ba ba ne ba ñozwi, n'e li ba likiti ze supile ka si li siñwi ni mianda ye silezi. 29Ba mushiku wo, ne ba swanezi ku tibelela kwa neku la mboela wa Tende. 30Elizafani mwan'a Uziele n'e li nduna wa bona. 31Ne ba na ni buikalabelo ka za Likwati la Bulikani, tafule, sipahekelo sa lilampi, tutala, lika ze ne ba sebelisa baprisita mwa Sibaka se si Kenile, lisila la kwa munyako wa Sibaka se si Kenile Hahulu, ni misebezi kamukana ye amana ni zeo.
32Nduna wa Malivi n'e li Eliazare, mwan'a muprisita Aruni. N'a li muzamaisi wa ba ba ne ba sebeza mwa Sibaka se si Kenile.
33Limba ze peli n'e li za mushiku wa Merari, ili ya Mamahali ni ya Mamushi. 34Palo ya bana ba bashimani ba ba ne ba ñozwi, ba kweli i liñwi kamba ku fita fo, n'e li ba likiti ze silezi ni mianda ye mibeli. 35Nduna wa lusika lo n'e li Zuriele, mwan'a Abihaili. Lusika lo ne lu swanezi ku tibelela kwa neku la mutulo wa Tende. 36Ne ba filwe maata a ku talima za likota za tende, miambeso ya yona, misumo, matomelo, ze nungahanisa kaufela ni misebezi kamukana ye amana ni lika zeo. 37Hape ne ba na ni buikalabelo fahalimw'a misumo, matomelo, likonkwani ni mihala ya lapa.
38Mushe, Aruni ni bana ba hae ne ba swanezi ku tibelela fapil'a Tende ya Kopano kwa neku la upa. Ne ba na ni maata a ku zamaisa lisebelezo za sicaba sa Isilaele ze n'e ezezwa mwa Sibaka se si Kenile. Mañi ni mañi ya n'a lika ku eza cwalo n'a bulaiwa. 39Palo ya bana ba Malivi ba bashimani ba kweli i liñwi kamba ku fita fo, b'a n'a ñolisize Mushe ka mishiku, ili ka taelo ya Muñ'a Bupilo, n'e li likiti ze mashumi a mabeli ka ze peli.
Ku balwa kwa baeli
40Muñ'a Bupilo a li ku Mushe, “Ñola baeli kaufela ba Maisilaele ka mabizo a bona ku kala ku ba kweli i liñwi kamba ku fita fo. 41Ki na Muñ'a Bupilo. Ni iketela Malivi kuli ba be ba ka, mwa sibaka sa baeli kamukana ba bashimani, mi hape ni iketela ni likomu za Malivi mwa sibaka sa maizibulo a likomu kaufela.” 42Mushe a eza se ne si laezwi, mi a ñola baeli ba bashimani kaufela. 43Kih'a kala ku ba kweli i liñwi ku isa ku ba bahulu. Palo ya bona ya ba likiti ze mashumi a mabeli ka ze peli ni mianda ye mibeli ka mashumi a supile ni ba balalu.
44Muñ'a Bupilo a li ku Mushe, 45“Cwale u ni sumekele Malivi kuli ba be ba ka mwa sibaka sa baeli ba Maisilaele ba bashimani kamukana. Hape u ni sumekele ni likomu za Malivi mwa sibaka sa maizubulo a likomu za Maisilaele. 46Kakuli palo ya baeli ba Maisilaele i fita ya Malivi ka mianda ye mibeli ka mashumi a supile ni ba balalu, u swanezi ku lekulula bana ba palo yeo. 47Ku yo muñwi ni yo muñwi, u zwise butanu bwa muwaya-waya wa silivela, ka ku ya ka teko ye tomilwe 48Mali ao, u a fe Aruni ni bana ba hae.” 49Mushe a eza cwalo. 50A nga mali a eza sikiti si li siñwi ni mianda ye milalu ka mashumi a silezi ni ze ketalizoho ya muwaya-waya wa silivela. 51A a fa Aruni ni bana ba hae, sina mw'a n'a laelezwi ki Muñ'a Bupilo.
Lozi Interconfessional Bible, Catholic Edition © Bible Society of Zambia, 2009.