Lipalo 35
35
Minzi ye abezwi Malivi
1 #
Josh 21.1-42
Mwa Mabala a Moabi, ili mwabuse bwa Jordani ku zwelela kwa Jeriko, Muñ'a Bupilo a li ku Mushe, 2“Bulelela Maisilaele kuli kwa liluwo le ba fumana ba swanezi ku fa Malivi minzi ye miñwi mo ba ta pila, hamoho ni naha ya mafulelo ye potolohile minzi yeo. 3Minzi ye, i ta ba ya Malivi, mi ba ta pila mwateñi. Mafulelo a ta ba a likomu hamoho ni limunanu za bona kaufela. 4Mafulelo a kalele kwa mandamino ku liba mwa naheñi. I be sibaka se si eza mihato ye mianda i ketalizoho mwa maneku kaufela ku zwa kwa lukwakwa lwa munzi. 5Ku lukela ku likanywa ka butelele bo bu eza mihato ye sikiti si li siñwi ili kuli ku likanelele mwa maneku kamukana, munzi u nz'o li fahali. 6Mu lukela ku fa Malivi minzi ye silezi ya masabelo, kw'a ta kona ku pilela mutu, h'a ta bulaya yo muñwi ka kozi. Hape mu ba fe minzi ye miñwi ye mashumi a mane ka ye mibeli. 7Hamoho i be minzi ye mashumi a mane ka ye supile ni u li muñwi, ni mafulisezo a yona. 8Palo ya minzi ya Malivi mwa lusika ni lusika i lukiswe ku ya ka fo i kuma naha ya lona lusika lo.”
Minzi ya masabelo
(Mul 19.1-13; Josh 20.1-9)
9 #
Mul 19.2-4; Josh 20.1-9 Muñ'a Bupilo a fa Mushe litaelo. 10Mushe n'a na ni ku taluseza batu ba Isilaele kuli, “Mu ka sila Nuka ya Jordani ni ku kena mwa naha ya Kanana. 11Mu kete minzi ya masabelo ko ku ta pilela mutu ya bulaile yo muñwi, isiñi ka mulelo. 12Moo, u ta y'o silelezwa kwa banabahabo mufu ba ba bata ku mu kutiseza ka kezo y'a ezize. Mutu ya zekiswa ka pulao ya mutu h'a bulaiwi pili a si ka zekiswa fa kuta. 13Mu kete minzi ye silezi. 14Ye milalu i be kwa upa wa Jordani, ni ye milalu i be mwa naha ya Kanana. 15Minzi ye, i ta ba ya masabelo a Maisilaele ni balicaba ba ba til'o pota kamba ba ba inelezi. Mañi ni mañi ya bulaya yo muñwi, isiñi ka bomu, u kona ku sabela ku o muñwi wa yona.
16“Nihakulicwalo, haiba mutu a itusisa silemanu sa sipi, ku bulaya yo muñwi, u na ni mulatu wa pulao, mi u lukela ku bulaiwa. 17Ya itusisa silemanu sa licwe, u na ni ku bulaiwa. 18Mi ya itusisa silemanu sa kota, u na ni ku bulaiwa. 19Mwanahabo mufu u na ni tukelo ya ku bulaya mubulai yo. H'a ka mu fumana, a mu bulaye.
20“Mutu wa kona ku toya yo muñwi, ni ku mu bulaya ka ku mu wiseza fafasi, kamba ka ku mu nepa ka sika. 21Wa kona ku mu lindaula ka liñindi. Yo u na ni mulatu wa pulao, mi u swanezi ku bulaiwa. Mwanahabo mufu u na ni tukelo ya ku bulaya mubulai yo. Haiba a mu fumana, a mu bulaye.
22“Kono mwendi lu bulele kuli mutu u bulaya y'a n'a si ka toya, ili ka kozi, i ka ba ka ku mu wiseza fafasi kamba ka ku mu nepa sika. 23I ka ba mwendi ka ku posa licwe a si ka talima u y'o bulaya mutu ye n'e si sila sa hae, mi a si ka lela ku mu bulaya. 24Mwa litaba ze cwalo, sicaba si ta atulela ya bulaile, mi isiñi mwanahabo mufu ya bata ku mu kutiseza bumaswe. 25Sicaba si ta pilisa mutu yo, ya na ni mulatu wa pulao, ku mwanahabo mufu, mi ba mu kutiseza mwa munzi wa masabelo kw'a n'a tobezi. U swanezi ku y'o ina mwateñi ku fitela lifu la mutu ya li muprisita yo muhulu ka nako yeo. 26Kamba mwendi lu bulele mutu ya na ni mulatu wa pulao a zwa mwa munzi wa masabelo, mw'a n'a sabezi. 27Haiba a fumanwa ki mwanahabo mufu, mi yo a mu bulaya, kezo yeo ya ku kutiseza bumaswe ha si pulao. 28Mutu ya na ni mulatu wa pulao u swanezi ku ina mwa munzi wa masabelo ku fitela nako ya lifu la muprisita yo muhulu, kono mwamulaho, wa kona ku kutela habo. 29Milao ye i tomezwi mina ni baikulu ba mina kai ni kai ko mu ta y'o pila.
30 #
Mul 17.6; 19.15 “Mutu ya zekiswa ka pulao u kona feela ku fiwa mulatu ni ku bulaiwa ka bupaki bwa batu ba babeli kamba ku fita. Bupaki bwa mutu a li muñwi ha bu likani ku tiisa katulo ya pulao. 31Mubulai u swanezi ku bulaiwa. H'a koni ku picuka katulo yeo ka ku lifa mali. 32Mu si ke mwa lumelela mutu ya sabezi mwa munzi wa mapilelo ku lifa mali kuli a kutele kwa hae, muprisita yo muhulu a si ka shwa kale. 33Ha mu ka eza cwalo, mu ta silafaza naha mo mu pila. Pulao i silafaza naha, mi ha ku na mukwa wa ku kenisa naha mo ku bulaezwi mutu, konji ka lifu la mubulai. 34Mu si ke mwa silafaza naha mo mu yahile, kakuli na, ni Muñ'a Bupilo, mi ni pila mwahal'a batu ba Isilaele.”
Lozi Interconfessional Bible, Catholic Edition © Bible Society of Zambia, 2009.