Lipalo 36
36
Lifa la basali ba ba nyezwi
1Litoho za limba mwa lusika lwa Giliadi mwan'a Makiri, ili muikulu wa Manase mwan'a Josefa, ba ya ku Mushe ni baeteleli ba bañwi. 2#Lipa 27.7 Ba li, “Muñ'a Bupilo u ku laezi ku abela Maisilaele naha ka ku laula ka mabizo. Hape u ku laezi kuli u fe liluwo la mwanahabo luna Zelofehadi kwa bana ba hae ba basizana. 3Kono, u hupule kuli haiba ba nyalwa ki banna ba lusika lu sili, liluwo la bona li ta ba la lusika lo, mi kabelo ya se lu abezwi luna i ta kutela mwamulaho. 4Mwa silimo seo, maluwo kamukana a n'a lekisizwe ha s'a tola ku kutela kwa bañi ba ona luli, liluwo la bana ba Zelofehadi li ta ekezwa ku la lusika lo lu ba nyezi, mi li zwiswe mwa lusika lwa luna kuya kuile.”
5Mushe kiha s'a fa batu ba Isilaele taelo ya zwa ku Muñ'a Bupilo. A bulela, a li, “Se si bulelwa ki ba lusika lwa Manase ki niti. 6Mi cwale Muñ'a Bupilo u laele kuli bana ba Zelofehadi ba lukuluhile ku inyalelwa ki ufi kapa ufi ye ba lata, kono i be feela wa mwa lusika lwa bona. 7Liluwo la Muisilaele kaufela li ta siyala cwalo ku ba lusika lwa habo. 8Musali kamukana ya yola liluwo mwa lusika lwa Isilaele, u swanezi ku nyalwa ki munna wa mwa lusika lwa habo. Kamukwaocwalo, Muisilaele kaufela u ta yola liluwo la bo kukw'a hae. 9Kamukwaocwalo liluwo ha li na ku shimbuluka mwa masika. Lusika ni lusika lu ta zwelapili ku luwa liluwo la lona cwalo.”
10Cwale bana ba Zelofehadi ba basizana ba eza sina mw'a n'a laezwi Mushe ki Muñ'a Bupilo. 11Bo Mahala, Tiriza, Hozula, Milika ni Noa, ili bana ba Zelofehadi ba basizana, ba nyalwa ki banabahabo bona. 12Ba nyalwa ki mishiku ya lusika lwa Manase, mwan'a Josefa, mi liluwo la bona la inelela cwalo mwa lusika lwa ndat'a bona.
13Yeo ki yona milao ni litaelo ze n'e filwe Maisilaele ki Muñ'a Bupilo ka Mushe mwa Mabala a Moabi, ili mwabuse bwa Jordani ku zwelela kwa Jeriko.
Lozi Interconfessional Bible, Catholic Edition © Bible Society of Zambia, 2009.