Lipalo 34
34
Miseto ya naha
1Muñ'a Bupilo a fa Mushe likelezo. 2Mushe n'a na ni ku taluseza likelezo ze, kwa sicaba sa Isilaele kuli, “Ha mu kena mwa naha ya Kanana, miseto ya naha ya mina i ta ba cwana. 3Museto wa kwa mboela u ta zwa kwa Lihalaupa la Zini ku fita mwa museto wa Edomo. U ta kalela kwa neku la upa, ili kwa mboela wa Liwate la Lizwai. 4Cwale u ta liba kwa mboela, ku ya kwa ñambamo ya Akarabimi, mi u fitelele Zini, ku ya kwa mboela wa Kadeshi-Baranea. Cwale kihona u ta liba kwa mutulo wa wiko wa Hazari-Adari, mane ni kwa Azimoni. 5U ta y'o kwenuha ku liba kwa nuka ya kwa mululwani ni Egepita, u y'o felela kwa Liwate la Mediteranea.
6“Museto kwa wiko u ta ba Liwate la Mediteranea.
7“Museto wa kwa mutulo u ta latelela mubamba o zwa kwa Liwate la Mediteranea ku y'o fita kwa Lilundu la Hori. 8Ku zwa fo u ta ya ñambamo ya Hamati. U ta zwelapili ku ya kwa Zedadi. 9Ku zwa kwa Zifuroni u ka y'o felela kwa Hazari-Enani.
10“Museto wa kwa upa a ta latelela mulaini o zwa kwa Hazari-Enani ku ya kwa Shefami. 11Cwale u ta liba kwa mboela kwa Ribila, ili kwa upa wa Aini, mi cwale u name cwalo ku liba malundu a fa munanga wa kwa upa wa Lisa la Kinereti. 12Ku zwa fo u ta liba mboela mwa Nuka ya Jordani ku be ku y'o fita kwa Liwate la Lizwai.
“Ye, i ta ba yona milulwani ya naha ya mina.”
13 #
Lipa 26.52-56
#Josh 14.1-5 Mushe kiha s'a li kwa Maisilaele, “Ye, ki yona naha ye mu ta fiwa ka ku laula ka mabizo, naha y'a abezi Muñ'a Bupilo masika a supile ka a mabeli ni licika. 14Masika a Rubeni ni Gadi, ni licika le li kwa upa la lusika lwa Manase, ba se ba fumani liluwo la ona, le li abilwe ka limba za ona. 15Liluwo le, li kwa neku la upa wa Jordani.”
Manduna ba ba swanezi ku aba naha
16Muñ'a Bupilo a li ku Mushe, 17“Muprisita Eliazare ni Joshua mwan'a Nuni, ba ta ku tusa kwa ku aba naha. 18Hape, u kete nduna mwa lusika ni lusika. Ba mi tuse ku i aba ka mukwa wo. 19Ku ketwe Kalebu mwan'a Jefune mwa lusika lwa Juda, 20Shemiele mwan'a Amihudi ku lwa Simioni, 21Eliadadi mwan'a Kisiloni ku lwa Benjamine, 22Buki mwan'a Jogeli ku lwa Dani, 23Haniele mwan'a Efoda ku lwa Manase, 24Kemuele mwan'a Shitani ku lwa Eferaimi, 25Elizafani mwan'a Paranaki ku lwa Zebuloni, 26Palatiele mwan'a Agani ku lwa Isakare, 27Amihudi mwan'a Shelomi ku lwa Asere, 28ni Padaheli mwan'a Amikudi ku lwa Nafetali.”
29Ba, ki bona batu ba n'a ketile Muñ'a Bupilo ku aba liluwo la sicaba sa Isilaele mwa naha ya Kanana.
Lozi Interconfessional Bible, Catholic Edition © Bible Society of Zambia, 2009.