Lipalo 33
33
Musipili wa ku zwa Egepita ku ya Moabi
1Mukoloko o tatama ki wa mabizo a libaka mo ne ba tibelezi Maisilaele ha ba zwa mwa Egepita, ba etelezwi ki Mushe ni Aruni. 2Ka taelo ya Muñ'a Bupilo, Mushe a ñola mabizo a libaka mo ne ba nze ba tibelela ka nako ni nako.
3Batu ba Isilaele ba fundukile mwa Egepita ka la bulishumi ni a ketalizoho la kweli ya pili ya silimo, ili ka lizazi le li tatama la Paseka ya pili. Ba zwa mwa Ramisese, ka pababelo ya Muñ'a Bupilo, ba nze ba bonwa ki Maegepita kaufela. 4Maegepita ne ba pumbeka baeli ba bona ba bashimani, ba ba ne ba bulailwe ki Muñ'a Bupilo. Ka ku eza cwalo, Muñ'a Bupilo a bonisa kuli n'a na ni maata hahulu ku fita milimu ya Egepita.
5Batu ba Isilaele ba funduka mwa Ramisese, mi ba y'o tibelela mwa Sukoti. 6Ha ba se ba zwile mwa Sukoti, ba y'o tibelela mwa Etami, kwa museto wa lihalaupa. 7Ku zwa fo ba sikuluhela kwa Pi-Hahiroti, kwa upa wa Baale-Zefoni, mi ba tibelela fakaufi ni Migidoli. 8Ba zwa mwa Pi-Hahiroti, mi ba sila Liwate le Lifubelu ku liba mwa lihalaupa. Ha ba se ba zamaile mazazi a malalu mwa Lihalaupa la Etami, ba y'o tibelela kwa Mara. 9Ku zwa mo, ba ya kwa Elimi, ko ba il'o tibelela, kakuli ne ku na ni mawelu-welu a mezi a lishumi ni a mabeli, ni likota za nzalu ze mashumi a supile.
10Ba funduka mwa Elimi, mi ba y'o tibelela fakaufi ni Liwate le Lifubelu. 11Mafulo a bona a tatama a y'o tomwa mwa Lihalaupa la Sini. 12Cwale ba y'o tibelela kwa Dofoka. 13Mi ku zwa fo ba ya mwa Alushi. 14A tatama a tomwa mwa Refidimi, mo ne ku si na mezi a ku nwa.
15Ku zwa Refidimi ba tibelela mwa Lihalaupa la Sinai. 16Mi ku zwa Lihalaupa la Sinai ba toma mafulo mwa Kiburoti-Hatava.
17Ku zwa Kiburoti-Hatava ba tibelela mwa Hazeroti. 18Mi ku zwa Hazeroti ba toma mafulo mwa Ritima.
19Ku zwa Ritima ba tibelela mwa Rimoni-Perezi. 20Mi ku zwa Rimoni-Perezi ba toma mafulo mwa Libina.
21Ku zwa Libina ba tibelela mwa Risa. 22Mi ku zwa Risa ba toma mafulo mwa Kehelata.
23Ku zwa Kehelata ba tibelela mwa Lilundu la Sheferi. 24Mi ku zwa Lilundu la Sheferi ba toma mafulo mwa Harada.
25Ku zwa Harada ba tibelela mwa Makeloti. 26Mi ku zwa Makeloti ba toma mafulo mwa Tahati.
27Ku zwa Tahati ba tibelela mwa Tera. 28Mi ku zwa Tera ba toma mafulo mwa Mitika.
29Ku zwa Mitika ba tibelela mwa Ashimona. 30Mi ku zwa Ashimona ba toma mafulo mwa Moseroto.
31Ku zwa Moseroto ba tibelela mwa Bene-Jakana. 32Mi ku zwa Bene-Jakana ba toma mafulo mwa Hori-Hagidigadi.
33Ku zwa Hori-Hagidigadi ba tibelela mwa Jotobata. 34Mi ku zwa Jotobata ba toma mafulo mwa Aburona.
35Ku zwa Aburona ba tibelela mwa Ezioni-Geberi. 36Mi ku zwa Ezioni-Geberi ba toma mafulo mwa Kadeshi ili mwa Lihalaupa la Zini.
37Ku zwa Kadeshi ba tibelela fakaufi ni Lilundu la Hori, kwa museto wa naha ya Edomo.
38 #
Lipa 20.22-28; Mul 10.6; 32.50 Ka taelo ya Muñ'a Bupilo, muprisita Aruni a kambama fa Lilundi la Hori, mi a y'o shwela hona fo, ili ka lizazi la pili mwa kweli ya buketalizoho ya silimo sa bumashumi a mane, Maisilaele ha ba se ba zwile mwa Egepita. 39A y'o shwela fa Lilundu la Hori a nz'a na ni lilimo ze mwanda ka mashumi a mabeli ni ze talu.
40 #
Lipa 21.1
Mulena wa Aradi, kwa mboela wa Kanana, a utwa kuli Maisilaele ba taha. 41Ku zwa kwa Lilundu la Hori ba tibelela mwa Zalumona. 42Mi ku zwa Zalumona ba toma mafulo mwa Punoni.
43Ku zwa Punoni ba tibelela mwa Oboto. 44Mi ku zwa Oboto ba toma mafulo mwa matota a Abarimi kwa museto wa naha ya Moabi.
45Ku zwa matota a Abarimi ba tibelela mwa Diboni-Gadi. 46Mi ku zwa Diboni-Gadi ba toma mafulo mwa Alumoni-Dibilataimi.
47Ku zwa Alumoni-Dibilataimi ba tibelela mwa Malundu a Abarimi fakaufi ni Lilundu la Nebo. 48Mi ku zwa Malundu a Abarimi ba toma mafulo mwa Mabala a Moabi, mwabuse bwa Nuka ya Jordani ku zwelela kwa Jeriko. 49Mwa Mabala a Moabi ba toma mafulo mwabuse bwa Nuka ya Jordani mwahal'a Beti-Jeshimoti ni mulapo wa Abele-Shitimi.
Litemuso ze filwe Maisilaele ba si ka sila kale Jordani
50Hona mwa Mabala a Moabi mo, mwabuse bwa Jordani ku zwelela kwa Jeriko, Muñ'a Bupilo a fa Mushe litemuso. 51Mushe n'a na ni ku bulelela Maisilaele kuli, “Mu ka sila Jordani ku kena mwa naha ya Kanana. 52Mu swanezi ku leleka ba ba yahile mwateñi kaufela. Mu tubaka milimu ya bona ya macwe ni ya lisipi, ni libaka za bona mo ba lapelela kaufela. 53Mu nge naha mi mu yahe mwateñi, kakuli na, na mi fa yona. 54#Lipa 26.54-56 Mu abe naha ye ka masika ni mishiku ka ku laula. Mu fe naha ye tuna ku ba bañata mwa mushiku, ni ye nyinyani kwa mushiku wa ba banyinyani. 55Kono ha mu sa leleki bañi ba naha yeo, ba ba ta siyala ba ta mi kataza sina tutowati mwa meeto, kamba miutwa mwa liteka za mina. Ba ta mi lwanisa. 56Haiba mu sa ba leleki, ni ta mi felisa, sina mo ni lelezi ku ba yundisa.”
Lozi Interconfessional Bible, Catholic Edition © Bible Society of Zambia, 2009.