Lipalo 32
32
Masika a kwa upa wa Jordani
(Mul 3.12-22)
1Masika a bo Rubeni ni Gadi n'a na ni likomu ze ñata hahulu. Ne ba boni bunde bwa naha ya Jazeri ni ya Giliadi kwa likomu. 2Ba ya ku Mushe, Eliazare ni kwa baeteleli ba bañwi ba sicaba, mi ba li, 3“A mu bone naha ye bapani ni minzi ya bo Ataroti, Diboni, Jazeri, Nimira, Heshiboni, Eleale, Sebami, Nebo ni Beoni! 4Sibaka se, s'a file Muñ'a Bupilo Maisilaele kuli ba yahe mwateñi, ki se sinde kwa likomu, mi luna lu na ni likomu ze ñata. 5Muñ'a ka, u lu fe naha ye kuli i be lona liluwo la luna, mi u si ke wa lu silisa Nuka ya Jordani kuli lu y'o yaha kwateñi.”
6Mushe a alaba, a li, “Kikuli mu bata ku siyala kwanu, banabahabo mina Maisilaele ha ba ya kwa ndwa, nji? 7Mu zwafisezañi batu ba Isilaele ku sila Nuka ya Jordani ni ku ya mwa naha y'a ba file Muñ'a Bupilo? 8Kihona mo ne ba ezelize bo ndat'a mina ha ne ni ba lumile ku zwa mwa Kadeshi-Baranea, ku y'o twela naha. 9#Lipa 13.17-33 Ne ba ile ni ku y'o fita kwa Musindi wa Eshikoli mi ba y'o bona naha yeo, kono ha ba kuta, ba t'o zwafisa batu kuli ba kene mwa naha y'a n'a ba file Muñ'a Bupilo. 10#Lipa 14.26-35 Ka lona lizazi leo Muñ'a Bupilo a nyema, mi a itama, a li, 11‘Na konka ni li, kakuli ne ba si ka ni sepa, ha ku na ya na ni lilimo ze mashumi a mabeli ni ku fita, ku ba ba ne ba zwile mwa Egepita, ya ta kena mwa naha ye ni sepisize bo Abrahama, Isaka ni Jakobo.’ 12Luci lo, ne lu kopanyeleza batu kaufela, haisi Kalebu mwan'a Jefune wa Mukenizi ni Joshua mwan'a Nuni, ili ba ba kile ba sepahala ku Muñ'a Bupilo. 13Muñ'a Bupilo a nyemela batu, mi a ba yembanisa mwa lihalaupa ka lilimo ze mashumi a mane, ku fitela lusika lo kaufela lo lu ne lu si ka mu tabisa lu fela ku shwa. 14Mi cwale ki mina ba ba ngile sibaka sa bo ndat'a mina, mu li lusika lo lunca lwa batu ba ba tezi sibi, ba ba itukiselize ku tisa buhali bo bu sabisa bwa Muñ'a Bupilo ku Isilaele hape. 15Haiba mina batu ba Rubeni ni Gadi mu sa mu lateleli hona fa, u ta kutela hape ku tuhela sicaba se kaufela mwa lihalaupa, mi ki mina ba ba ta ba ni buikalabelo ka lifu la sona.”
16Ba sutelela ku Mushe, mi ba li, “Pili u lu lumelele ku yahela lingu za luna milaka ya macwe mo, ni minzi ye silelelizwe ya batu ba luna. 17Fohe, lu ta be lu itukiselize ku ya ni Maisilaele ba ku luna mwa lindwa, ni ku etelela ndwa ku fitela lu y'o ba kenya mwa naha ye ta ba ya bona. Ka nako yeo, bana ba luna ba ta ina kwanu mwa minzi ye silelelizwe, ku si na kozi ye ka zwa kwa batu ba naha ye. 18Ha lu na ku kutela kwa minzi ya luna ku fitela Maisilaele kaufela ha ba se ba ngile naha ye ba abezwi. 19Ha lu na ku nga liluwo ku bona mwabuse bwa Jordani, kakuli lu se lu fumani kabelo ya luna kwanu mwa upa wa Jordani.”
20Mushe a alaba, a li, “Haiba luli ze mu bulela ki niti, cwale hona fa, fapil'a Muñ'a Bupilo, mu itukiseze ku ya kwa ndwa. 21Batabani ba mina kamukana ba ta sila Jordani mi, ka taelo ya Muñ'a Bupilo mu lwanise lila za luna mane a li tule. 22Mi ka ku tula, Muñ'a Bupilo u ka ikungela naha. Mwamulaho a fo mwa kona ku kuta, kakuli mu ta be mu talelelize buitamo bwa mina ku Muñ'a Bupilo ni kwa banabahabo mina Maisilaele. Kihona Muñ'a Bupilo a ta lumela kuli naha ye kwa upa wa Jordani ki ya mina. 23Kono ni mi lemusa kuli haiba mu sa buluki sepiso ya mina, mu ta foseza Muñ'a Bupilo. Mu tokomele, kakuli mu ta natelwa sibi sa mina. 24Cwale mu yahe minzi ya mina ni milaka ya lingu za mina, kono mu eze se mu sepisize.”
25Batu ba Gadi ni Rubeni ba li, “Muñ'a ka, lu ta eza m'o lu laelela. 26Basali ba luna ni bana, likomu ni lingu za luna, li ta siyala hona mo, mwa minzi ya Giliadi. 27Kono kaufel'a luna lu itukiselize ku ya kwa ndwa ka taelo ya Muñ'a Bupilo. Lu ta sila Jordani, mi lu lwane sina m'o bulelezi.”
28 #
Josh 1.12-15
Cwale Mushe a fa litaelo ze ku Eliazare, Joshua, ni baeteleli ba bañwi ba Isilaele, a li, 29“Haiba batu ba Gadi ni Rubeni ba sila Jordani ku y'o lwana ka taelo ya Muñ'a Bupilo, mi haiba, ka tuso ya bona mu ka tula naha, fohe, mu ba fe naha ya Giliadi, i be liluwo la bona. 30Kono haiba ba sa sili Jordani, ni ku y'o lwana hamoho ni mina, ba ta fumana kabelo ya bona mwa naha ya Kanana, sina mina.”
31Batu ba Gadi ni Rubeni ba alaba, ba li, “Muñ'a ka, lu ta eza sina mw'a laelezi Muñ'a Bupilo. 32Ka taelo ya hae, lu ta silela mwa naha ya Kanana ni ku y'o lwana, ili kuli lu ipulukele liluwo la luna kwanu kwa upa wa Jordani.”
33Cwale Mushe a abela masika a Gadi ni Rubeni, ni kalulo ya lusika lwa Manase, naha kaufela ya Mulena Sihoni wa Maamori ni ya Mulena Ogo wa Bashani, hamohocwalo ni minzi ni naha kamukana ye ba beile mwahali.
34Lusika lwa Gadi lwa yaha sinca minzi ye silelelizwe ya Giboni, Ataroti, Aroere, 35Ataroti-Shofani, Jazeri, Jogobeha 36Beti-Nimira, ni Beti-Harani. 37Lusika lwa Rubeni, lona lwa yaha sinca Heshiboni, Eleale, Kiryataimi, 38Sibima, ni minzi ye filwe mabizo a mañwi ili Nebo, ni Baala-Meoni. Minzi ye ne ba yahile ba i beya mabizo a manca.
39Ba mushiku wa Makiri mwan'a Manase ba y'o lwanisa naha ya Giliadi, ba i nga, mi ba leleka Maamori ba ba ne ba li mwateñi. 40Mushe a fa ba mushiku wa Makiri naha ya Giliadi, mi ba yaha mwateñi. 41Jairi, wa lusika lwa Manase, a lwanisa ni ku hapa minzi ye miñwi, mi a i biza Minzi ya Jairi. 42Noba a lwanisa ni ku hapa Kenati ni minzinyana ya ona, mi a ipeeleza ka yona libizo la Noba.
Lozi Interconfessional Bible, Catholic Edition © Bible Society of Zambia, 2009.