Lipalo 31
31
Ndwa ye kenile ya ku lwanisa Mamidiani
1Muñ'a Bupilo a li ku Mushe, 2“U lwanise Mamidiani ka se ba ezize kwa batu ba Isilaele. Ha u s'o ezize cwalo, u ta shwa.”
3Cwale Mushe a li kwa batu, “A mu itukiseze ndwa, kuli mu y'o lwanisa Mamidiani, mi mu ba utwise butuku ka se ba ezize ku Muñ'a Bupilo. 4Mwa lusika lo luñwi ni lo luñwi lwa Isilaele ku zwe banna ba sikiti si li siñwi ba ba ta ya kwa ndwa.”
5Cwalehe, banna ba sikiti ba ketiwa mwa lusika ni lusika, mi palo ya banna kaufela ba ba ne ba itukiselize ndwa ya ba likiti ze lishumi ka ze peli. 6Mushe a ba lumela kwa ndwa, ba nze ba zamaiswa ki Finehasi mwan'a muprisita Eliazare, ya n'a tokomela libyana ze kenile ni litolombita za litemuso. 7Ba lwanisa Mamidiani, sina Muñ'a Bupilo ha n'a laezi Mushe, mi ba bulaya banna kaufela. 8Ba bulaya cwalo ni malena ba ketalizoho ba Midiani, ili bo Evi, Rekemi, Zuri, Huri ni Reba. Ba bulaya cwalo ni Balaami mwan'a Beori.
9Batu ba Isilaele ba hapa basali ni bana ba Mamidiani. Ba hapelela ni likomu, mitapi ya lingu ni bufumu bwa bona kamukana. 10Ba cisa minzi ni mafulo a bona kaufela. 11Ba nga tutu kamukana ye ne ba hapile, hamoho ni batanga ni limunanu. 12Ba li tisa ku Mushe ni Eliazare ni kwa sicaba sa batu ba Isilaele, ba ba ne ba li mwa mafulo mwa Mabala a Moabi, mwabuse bwa Jordani ku zwa kwa Jeriko.
Mpi ya kuta
13Mushe, Eliazare, ni baeteleli kamukana ba sicaba ba zwa mwa mafulo ku y'o katanyeza mpi. 14Mushe a nyemela manduna, balauli ba makolo ni litopa, ba ba ne ba zwa kwa ndwa. 15A ba buza, a li, “Kiñi ha mu pilisize basali kaufela? 16#Lipa 25.1-9 Mu hupule kuli n'e li bona basali ba ba ne ba latelezi litaelo za Balaami, ba ba ne ba kenyelize batu moya wa ku sa sepahala ku Muñ'a Bupilo kwa Peori. Ki sona se ne si tisize kozi kwa batu ba Muñ'a Bupilo. 17Cwale mu bulaya bashimani kamukana, mi mu bulaye ni bona basali kaufela ba ba se ba fosize ni banna. 18Kono mu ipulukele basali kaufela ba ba sa li balyanjo. 19Cwale mina kaufela ba ba bulaile batu kamba ba ba sweli litupu, mu swanezi ku ina cwalo sunda mutumbi kwand'a mafulo. Ka lizazi la bulalu ni ka lizazi la busupa mu ikenise hamohocwalo ni basali be mu il'o hapa. 20Mu swanezi ku keniseleza cwalo liapalo ni lika kaufela ze ezizwe ka litalo, ka boya bwa puli kamba ka kota.”
21Muprisita Eliazare a li kwa batu ba ba ne ba kutile kwa ndwa, “Ki ye milao ye filwe Mushe ki Muñ'a Bupilo. 22Gauda, silivela, kopa, sipi, senge kamba loto li swanezi ku keniswa ka ku li cisa mwa mulilo. 23Lika ze ñwi kaufela ze sa ci li swanezi ku keniswa ka ku li ciswa mwa mulilo. Hape li swanezi ku keniswa ka mezi a kenisa. Kono ze ñwi kaufela li swanezi ku keniswa ka mezi a kenisa. 24Ka lizazi la busupa, mu swanezi ku tapisa liapalo za mina. Fohe, mu ta be mu kenile, mi mu ta lumelelwa ku kena mwa mafulo.”
Ku abiwa ze hapilwe
25Muñ'a Bupilo a li ku Mushe, 26“Wena ni Eliazare ni baeteleli ba bañwi ba sicaba, mu lukela ku bala lika kamukana ze hapilwe, ku kopanyeleza ni batu ni limunanu. 27Mu abe lika ze hapilwe kaufela, ka likalulo ze peli ze likana. Kalulo ye ñwi i ye ku ba ba ne ba ile kwa ndwa, mi ye ñwi kwa sicaba. 28Kwa kalulo ya masole, mu buluke mutelo wa Muñ'a Bupilo, ili mutu a li muñwi ku ba ba eza mianda i ketelizoho ya ba ba hapilwe, ni palo ye swana kwa likomu, limbongolo, lingu ni lipuli. 29Mu li fe muprisita Eliazare, i be nubu ya Muñ'a Bupilo. 30Kwa kalulo ye filwe batu, mu nge a li muñwi mwa batanga ba mashumi a ketalizoho, ni palo ye swana kwa likomu, limbongolo, lingu ni lipuli. Mu li fe Malivi ba ba tokomela Tende ya Kopano ya Muñ'a Bupilo. 31Mushe ni Eliazare ba eza mw'a n'a ba laelezi Muñ'a Bupilo.
32Ki wo mukoloko wa ze ne hapilwe ki masole, fahalimw'a ze ne ba ipulukezi: lingu ni lipuli ze likiti ze mianda ye silezi ka mashumi a supile ni ze ketalizoho, 33likomu ze likiti ze mashumi a supile ka ze peli, 34limbongolo ze likiti ze mashumi a silezi ka si li siñwi, 35ni balyanjo ba likiti ze mashumi a malalu ka ze peli.
36Licika za zona ze, ili kabelo ya masole n'e li lingu ni lipuli ze likiti ze mianda ye milalu ka mashumi a malalu ni ze supile ka mianda i ketalizoho, 37mi mutelo wa Muñ'a Bupilo n'e li ze mianda ye silezi ka mashumi a supile ni ze ketalizoho, 38likomu ze likiti ze mashumi a malalu ka ze silezi za masole mi mutelo wa Muñ'a Bupilo n'e li ze mashumi a supile ka ze peli, 39limbongolo ze likiti ze mashumi a malalu ka mianda i ketalizoho za masole mi mutelo wa Muñ'a Bupilo n'e li mashumi a silezi ka i liñwi, 40basizana ba likiti ze lishumi ka ze silezi ba masole, ni ba mashumi a malalu ka ba babeli ba mutelo wa Muñ'a Bupilo.
41Cwale Mushe kiha s'a fa Eliazare mutelo, ili nubu ya Muñ'a Bupilo, sina mw'a n'a laelezi Muñ'a Bupilo.
42Kalulo ye n'e filwe kwa sicaba ne i likana ni kalulo ye n'e filwe kwa masole. 43Kabelo ya sicaba n'e li lingu ni lipuli ze likiti ze mianda ye milalu ka mashumi a malalu ni ze supile ka mianda i ketalizoho, 44likomu ze likiti ze mashumi a malalu ka ze silezi, 45limbongolo ze likiti ze mashumi a malalu ka mianda i ketalizoho, 46ni balyanjo ba likiti ze lishumi ka ze silezi. 47Ku yona kalulo yeo Mushe a nga mutanga a li muñwi ku ba mashumi a ketalizoho, ni kwa limunanu cwalo, mi sina mw'a n'a laelezi Muñ'a Bupilo. Mushe a li fa Malivi ba ba ne ba babalela Tende ya Kopano ya Muñ'a Bupilo.
48Cwale manduna, ba ba ne ba laela mpi, ba ya ku Mushe. 49Mi ba y'o biha, ba li, “Muñ'a ka, lu balile masole be ne lu laula, mi ha ku na nihaili a li muñwi ya siyo. 50Cwale lu tisa mikabo ya gauda, ya kwa mazoho, ya mwa milala, ya kwa minwana, ni ya kwa lizebe ye n'e ngilwe ki yo muñwi ni yo muñwi wa luna. Lu i fa Muñ'a Bupilo kuli i be tifo ya bupilo bwa luna, ili kuli a te a lu sileleze.”
51Mushe ni Eliazare ba amuhela gauda yeo, mi kaufel'a yona n'e li mikabo feela. 52Bukiti bwa kabelo ya manduna kaufela ne bu fitelela likilo ze mianda ye mibeli. 53Be n'e si manduna ba ipulukela bufumu bo ne ba hapile. 54Cwale Mushe ni Eliazare ba isa gauda kwa Tende ya Kopano, ili kuli Muñ'a Bupilo a te a sileleze sicaba sa Isilaele.
Lozi Interconfessional Bible, Catholic Edition © Bible Society of Zambia, 2009.