Lipalo 30
30
Milao bakeñisa buitamo
1Mushe a fa baeteleli ba masika a Isilaele litaelo zeo ze tatama. 2#Mul 23.21-23; Mat 5.33 Mutu h'a itama kuli u ta fa Muñ'a Bupilo sika, kamba ku itama kuli h'a na ku eza sa kuli, h'a swaneli ku sinya sepiso yeo, kono u swanezi ku eza lika kamukana z'a sepisize kuli u ta li eza.
3Kalibe ya sa inzi mwa ndu ya bashemi ba hae wa kona ku itama ka se siñwi fapil'a Muñ'a Bupilo. 4U swanezi ku eza lika kaufela z'a itamile kamba z'a sepisize, konji ndat'ahe h'a ka hana. 5Kono haiba ndat'ahe a mu hanisa ku taleleza buitamo bwa hae, ha ku sa tokwahala kuli a bu buluke. Muñ'a Bupilo u ta mu swalela, kakuli ndat'ahe u mu hanisize ku bu buluka.
6Musali ya si ka nyalwa wa kona ku itama, i ka ba ka bomu kamba ka ku sa yela seli, mi ku zwa fo wa nyalwa. 7U swanezi ku taleleza buitamo kamba lisepiso za hae, konji munn'a hae h'a ka hana, ha s'a li utwile. 8Kono haiba munn'a hae a mu hanisa ku taleleza buitamo bwa hae ha s'a bu utwile, fohe, ha ku sa tokwahala kuli a bu buluke. Muñ'a Bupilo u ta mu swalela.
9Mbelwa kamba musali ya kauhani ni munna, u swanezi ku taleleza buitamo ni lisepiso za hae kaufela.
10Musali ya nyezwi wa kona ku itama kamba ku sepisa ku ambuka lika ze ñwi. 11U swanezi ku eza lika kaufela z'a itamile, konji munn'a hae h'a ka hana, ha s'a li utwile. 12Kono haiba munn'a hae ya mu hanisize ku buluka sepiso ya hae, Muñ'a Bupilo u ta mu swalela. 13Munn'a hae u na ni tukelo ya ku tiisa kamba ku felisa buitamo bwa hae. 14Kono haiba ku fita lizazi, munn'a hae a nz'a bu utwile buitamo bo, mi a si ka hana, musali yo u swanezi ku taleleza buitamo bwa hae kamukana. Munna u tiisize buitamo bo ka ku sa bu hana ha s'a bu utwile. 15Kono haiba munna a felisa buitamo mwamulaho a mazazi a nz'a bu utwile, u swanezi ku fiwa mulatu o n'o lukela musali ka ku mu hanisa ku taleleza buitamo bo.
16Ye ki yona milao ya n'a filwe Mushe ki Muñ'a Bupilo ka za buitamo bo bu ezizwe ki musali ya nyezwi, kamba ya si ka nyalwa mi ya pila mwa lapa la bashemi ba hae.
Lozi Interconfessional Bible, Catholic Edition © Bible Society of Zambia, 2009.