Lipalo 29
29
Litabelo za Mukiti wa Silimo se Sinca
(Malivi 23.23-25)
1Ka lizazi la pili mwa kweli ya busupa, mu kopane kwa sebelezo, mi mu si ke mwa eza musebezi. Ka lona lizazi leo ku lizwe litolombita. 2Mu ezeze Muñ'a Bupilo sitabelo sa ku cisa, sa muunko o mu tabisa, ili pohwana i liñwi, poho ya ngu i liñwi, ni mankomwana a supile a lingu za silimo si li siñwi, ili ze si na fo li nyazahala. 3Mu tise mpo ye lukela ya lico za bupi bo bu nekile, bo bu lubilwe ka mafula a olive. Mu tise sizuma sa bupi bo bu nekile fa poho, ni sizumanyana fa poho ya ngu. 4Mu tise ni mukeke wa bupi fa nkomwana ni nkomwana ya ngu. 5Hape mu tise ni poho ya puli ya sitabelo sa ku zwisa libi, mi ka mukwa wo mu eze sebelezo ya ku kenisa sicaba. 6Mu eze litabelo ze, ili ku ekeza kwa sitabelo sa ku cisa se si ezwa ka lizazi la Moonda, hamoho ni mpo ya sona ya lico. Hape mu eze ni sitabelo sa ka zazi ni zazi, sa ku cisa, hamoho ni limpo za sona za lico ni za waine. Limpo ze, za lico, li na ni muunko o tabisa Muñ'a Bupilo.
Litabelo za Lizazi la Swalelo
(Malivi 23.26-32)
7 #
Malivi 16.29-34
Mu kopane kwa sebelezo ka lizazi la bulishumi mwa kweli ya busupa. Mu si ke mwa ca lico, mi mu si ke mwa sebeza. 8Mu ezeze Muñ'a Bupilo sitabelo sa ka cisa, ili sa muunko o mu tabisa. Si be sa poho ye nca, poho ya ngu, ni lingunyana za mapulwana ze supile, ze na ni silimo si li siñwi, ze si na fo li nyazahala kaufel'a zona. 9Mu eze sitabelo sa mpo ya lico ze lukela, ili bupi bo bu lubilwe ka mafula a olive. Bupi bo, i be bo bu taza sizuma fa poho, ni sizumanyana fa poho ya ngu. 10Mu tise ni mukeke fa ngunyana ni ngunyana. 11Hape mu tise ni poho ya puli i liñwi ya sitabelo sa ku zwisa libi, ku ekeza fa puli ya sitabelo sa ku kenisa sicaba, ni sitabelo se si ciswa ka zazi ni zazi hamoho ni sa lico ni waine.
Litabelo za Mukiti wa Minganda
(Malivi 23.33-44)
12 #
Malivi 23.34; Mul 16.13-15 Mu kopane kwa sebelezo ka la bulishumi ka a ketalizoho, mwa kweli ya busupa. Mu eze mukiti wo ka mazazi a supile, ili ku kuteka Muñ'a Bupilo, mi mu si ke mwa sebeza. 13Ka lona lizazi le, la pili, mu fe Muñ'a Bupilo limpo za lico, ili za muunko o mu tabisa, ili lipohwana ze lishumi ka ze talu, lipoho ze peli za lingu, ni mankomwana a lingu a lishumi ka a mane a na ni silimo si li siñwi, ili ze si na fo li nyazahala kaufel'a zona. 14Mu fitise mpo ya lico ye lukela ya bupi bo bu nekile, bo bu lubilwe ka mafula a olive. Mu tise sizuma fa poho ni poho, ni sizumanyana fa poho ni poho ya ngu. 15Mu tise ni mukeke fa nkomwana ni nkomwana ya ngu, hamohocwalo ni limpo ze tokwahala za waine. 16Hape mu tise ni poho ya puli i liñwi ya sitabelo sa ku zwisa libi. Mu tise zeo kaufela ku ekeza fa sitabelo sa ku cisa sa ka zazi ni zazi hamoho ni mpo ya sona ya lico ni ya waine.
17Ka lizazi la bubeli, mu tise lipoho ze nca ze lishumi ka ze peli, lipoho ze peli za lingu, ni mankomwana a lingu a lishumi ka a mane a na ni silimo si li siñwi. I be ze si na fo li nyazahala kamukan'a zona. 18Mu fitise mpo ya lico ye lukela ya bupi bo bu nekile, bo bu lubilwe ka mafula a olive. Mu tise sizuma fa poho ni poho, ni sizumanyana fa poho ni poho ya ngu. Mu tise ni mukeke fa nkomwana ni nkomwana ya ngu, hamohocwalo ni limpo ze tokwahala za waine. 19Hape mu tise ni poho ya puli i liñwi ya sitabelo sa ku zwisa libi. Mu tise zeo kaufela ku ekeza fa sitabelo sa ku cisa sa ka zazi ni zazi hamoho ni mpo ya sona ya lico ni ya waine.
20Ka lizazi la bulalu, mu tise lipoho ze nca ze lishumi ka i liñwi, lipoho ze peli za lingu, ni mankomwana a lingu a lishumi ka a mane a silimo si li siñwi. I be ze si na fo li nyazahala kaufel'a zona. 21Mu fitise mpo ya lico ye lukela ya bupi bo bu nekile, bo bu lubilwe ka mafula a olive. Mu tise sizuma fa poho ni poho, ni sizumanyana fa poho ni poho ya ngu. Mu tise ni mukeke fa nkomwana ni nkomwana ya ngu, hamohocwalo ni limpo ze tokwahala za waine. 22Hape mu tise ni poho ya puli i liñwi ya sitabelo sa ku zwisa libi. Mu tise zeo kaufela ku ekeza fa sitabelo sa ku cisa sa ka zazi ni zazi hamoho ni mpo ya sona ya lico ni ya waine.
23Ka lizazi la bune, mu tise lipoho ze lishumi ze nca, lipoho ze peli za lingu, ni mankomwana a lingu a lishumi ka a mane a na ni silimo si li siñwi. I be ze si na fo li nyazahala kaufel'a zona. 24Mu fitise mpo ya lico ye lukela ya bupi bo bu nekile, bo bu lubilwe ka mafula a olive. Mu tise sizuma fa poho ni poho, ni sizumanyana fa poho ni poho ya ngu. Mu tise ni mukeke fa nkomwana ni nkomwana ya ngu, hamohocwalo ni limpo ze tokwahala za waine. 25Hape mu tise ni poho ya puli i liñwi ya sitabelo sa ku zwisa libi. Mu tise zeo kaufela ku ekeza fa sitabelo sa ku cisa sa ka zazi ni zazi hamoho ni mpo ya sona ya lico ni ya waine.
26Ka lizazi la buketalizoho, mu tise lipoho ze supile ka ze peli ze nca, lipoho ze peli za lingu, ni mankomwana a lingu a lishumi ka a mane, a silimo si li siñwi. I be ze si na fo li nyazahala kaufel'a zona. 27Mu fitise mpo ya lico ye lukela ya bupi bo bu nekile, bo bu lubilwe ka mafula a olive. Mu tise sizuma fa poho ni poho, ni sizumanyana fa poho ni poho ya ngu. Mu tise ni mukeke fa nkomwana ni nkomwana ya ngu, hamohocwalo ni limpo ze tokwahala za waine. 28Hape mu tise ni poho ya puli i liñwi ya sitabelo sa ku zwisa libi. Mu tise zeo kaufela ku ekeza fa sitabelo sa ku cisa sa ka zazi ni zazi hamoho ni mpo ya sona ya lico ni ya waine.
29Ka lizazi la busilela, mu tise lipoho ze supile ka i liñwi ze nca, lipoho za lingu ze peli, ni mankomwana a lingu a lishumi ka a mane a silimo si li siñwi. I be ze si na fo li nyazahala kaufel'a zona. 30Mu fitise mpo ya lico ye lukela ya bupi bo bu nekile, bo bu lubilwe ka mafula a olive. Mu tise sizuma fa poho ni poho, ni sizumanyana fa poho ni poho ya ngu. Mu tise ni mukeke fa nkomwana ni nkomwana ya ngu, hamohocwalo ni limpo ze tokwahala za waine. 31Hape mu tise ni poho ya puli i liñwi ya sitabelo sa ku zwisa libi. Mu tise zeo kaufela ku ekeza fa sitabelo sa ku cisa sa ka zazi ni zazi hamoho ni mpo ya sona ya lico ni ya waine.
32Ka lizazi la busupa, mu tise lipoho ze supile ze nca, lipoho za lingu ze peli, ni mankomwana a lingu a lishumi ka a mane a silimo si li siñwi. I be ze si na fo li nyazahala kaufel'a zona. 33Mu fitise mpo ya lico ye lukela ya bupi bo bu nekile, bo bu lubilwe ka mafula a olive. Mu tise sizuma fa poho ni poho, ni sizumanyana fa poho ni poho ya ngu. Mu tise ni mukeke fa nkomwana ni nkomwana ya ngu, hamohocwalo ni limpo ze tokwahala za waine. 34Hape mu tise ni poho ya puli i liñwi ya sitabelo sa ku zwisa libi. Mu tise zeo kaufela ku ekeza fa sitabelo sa ku cisa sa ka zazi ni zazi hamoho ni mpo ya sona ya lico ni ya waine.
35Ka lizazi la busupa ka li li liñwi, mu kopane mwa sebelezo, mi mu si ke mwa sebeza. 36Mu ezeze Muñ'a Bupilo sitabelo sa ku cisa, ili mpo ya lico, ya muunko o mu tabisa. Mu tise poho ye nca, poho ya ngu ni mankomwana a lingu a supile a silimo si li siñwi. I be ze si na fo li nyazahala kaufel'a zona. 37Mu fitise mpo ya lico ye lukela ya bupi bo bu nekile, bo bu lubilwe ka mafula a olive. Mu tise sizuma fa poho ni poho, ni sizumanyana fa poho ni poho ya ngu. Mu tise ni mukeke fa nkomwana ni nkomwana ya ngu, hamohocwalo ni limpo ze tokwahala za waine. 38Hape mu tise ni poho ya puli i liñwi ya sitabelo sa ku zwisa libi. Mu tise zeo kaufela ku ekeza fa sitabelo sa ku cisa sa ka zazi ni zazi hamoho ni mpo ya sona ya lico ni ya waine.
39Ze, ki zona lika ze mu ta fa Muñ'a Bupilo ka nako ya mikiti ya mina ye tomilwe, ya litabelo za ku cisa, za limpo za lico, za limpo za waine, ni za limpo za buitumelo. Ze ki za ku ekeza feela fahalimw'a limpo ze mu fa ha mu taleleza buitamo, kamba limpo ze mu fa ka tato ya mina.
40Cwale Mushe a taluseza batu ba Isilaele lika kamukana z'a n'a laezwi ki Muñ'a Bupilo.
Lozi Interconfessional Bible, Catholic Edition © Bible Society of Zambia, 2009.