Lipalo 2
2
Tukiso ya masika mwa mafulo
1Muñ'a Bupilo a fa Mushe ni Aruni litaelo ze. 2Maisilaele ha ba toma mafulo, mutu ni mutu a tome tende ya hae mwatas'a ndembela ya sitopa sa hae, ni ndembela ya mushiku wa habo. Mafulo a swanezi ku beya Tende ya Kopano mwahali.
3Kwa neku la upa ko ku pazuha lizazi, ba ba kwatas'a ndembela ya mafulo a Juda ba tome litende za bona. Nduna wa lusika lwa Juda ki Nashoni mwan'a Aminadabi. 4Mwa likolo la hae ba ba ñolilwe ne li ba ba eza ba likiti ze mashumi a supile ka ze ne ni mianda ye silezi. 5Ku bapana ni bona ku ka ba lusika lwa Isakare. Nduna wa lusika lwa Isakare ki Nataneele mwan'a Zuari. 6Mwa likolo la hae ba ba ñolilwe ne li ba ba eza ba likiti ze mashumi a ketalizoho ka ze ne ni mianda ye mine. 7Ku bapana ni bona ku ka ba lusika lwa Zebuloni. Nduna wa lusika lwa Zebuloni ki Eliabi mwan'a Heloni. 8Mwa likolo la hae ba ba ñolilwe ne li ba ba eza ba likiti ze mashumi a ketalizoho ka ze supile ni mianda ye mine. 9Ba ba ñolilwe mwa mafulo a Juda ki ba ba eza likiti ze mwanda ka mashumi a supile ni si li siñwi ka ze silezi ni mianda ye mine ka makolo a bona.
Ku ta funduka pili makolo ni mafulo a Juda.
10Kwa neku la mboela, ba ba kwatas'a ndembela ya mafulo a Rubeni ba tome litende za bona. Nduna wa lusika lwa Rubeni ki Elizuri mwan'a Shedeuri. 11Mwa likolo la hae ba ba ñolilwe ne li ba ba eza ba likiti ze mashumi a mane ka ze silezi ni mianda i ketalizoho. 12Ku bapana ni bona ku ka ba lusika lwa Simioni. Nduna wa lusika lwa Simioni ki Shelumiele mwan'a Zurishadai. 13Mwa likolo la hae ba ba ñolilwe ne li ba ba eza ba likiti ze mashumi a ketalizoho ka ze supile ni ze peli ka mianda ye milalu. 14Ku bapana ni bona ku ka ba lusika lwa Gadi. Nduna wa lusika lwa Gadi ki Eliasafi mwan'a Reule. 15Mwa likolo la hae ba ba ñolilwe ne li ba ba eza ba likiti ze mashumi a mane ka ze ketalizoho ni mianda ye silezi ka mashumi a ketalizoho. 16Ba ba ñolilwe mwa mafulo a Rubeni ki ba ba eza likiti ze mwanda ka mashumi a ketalizoho ni si li siñwi ka mianda ye mine ni mashumi a ketalizoho ka makolo a bona.
Makolo ni mafulo a Rubeni a ta latelela a pili.
17Cwale mwahal'a mafulo a mabeli a pili ni a mabeli a mafelelezo, ki hona mo ba ta zamaya Malivi, ba nze ba lwezi Tende ya Kopano. Mafulo a mañwi ni a mañwi a ta zamaya ka mukwa o swana ni wa ku tibelela, lusika ni lusika mwa sibaka sa lona ili mwatas'a ndembela ya lona.
18Kwa neku la wiko ba ba kwatas'a ndembela ya mafulo a Eferaimi ba tome litende za bona. Nduna wa lusika lwa Eferaimi ki Elishama mwan'a Amihudi. 19Mwa likolo la hae ba ba ñolilwe ne li ba ba eza ba likiti ze mashumi a mane ka mianda i ketalizoho. 20Ku bapana ni bona ku ka ba lusika lwa Manase. Nduna wa lusika lwa Manase ki Gamaliele mwan'a Pedazuri. 21Mwa likolo la hae ba ba ñolilwe ne li ba ba eza ba likiti ze mashumi a malalu ka ze peli ni mianda ye mibeli. 22Ku bapana ni bona ku ka ba lusika lwa Benjamine. Nduna wa lusika lwa Benjamine ki Abidani mwan'a Gidioni. 23Mwa likolo la hae ba ba ñolilwe ne li ba ba eza ba likiti ze mashumi a malalu ka ze ketalizoho ni mianda ye mine. 24Ba ba ñolilwe mwa mafulo a Eferaimi ki ba ba eza likiti ze mwanda ka ze supile ni si li siñwi ka mwanda u li muñwi ka makolo a bona.
Mafulo a Eferaimi a ta ba ona a bulalu.
25Kwa neku la mutulo ba ba kwatas'a ndembela ya mafulo a Dani ba tome litende za bona. Nduna wa lusika lwa Dani ki Akiezele mwan'a Amishadai. 26Mwa likolo la hae ba ba ñolilwe ne li ba ba eza ba likiti ze mashumi a silezi ka ze peli ni mianda ye supile. 27Ku bapana ni bona ku ka ba lusika lwa Asere. Nduna wa lusika lwa Asere ki Pagiele mwan'a Okurani. 28Mwa likolo la hae ba ba ñolilwe ne li ba ba eza ba likiti ze mashumi a mane ka si li siñwi ni mianda i ketalizoho. 29Ku bapana ni bona ku ka ba lusika lwa Nafetali. Nduna wa lusika lwa Nafetali ki Akira mwan'a Enani. 30Mwa likolo la hae ba ba ñolilwe ne li ba ba eza ba likiti ze mashumi a ketalizoho ka ze talu ni mianda ye mine. 31Ba ba ñolilwe mwa mafulo a Dani ki ba ba eza likiti ze mwanda ka mashumi a ketalizoho ni ze supile ni mianda ye silezi ka makolo a bona.
Mafulo a Dani a ta ba a mafelelezo.
32Palo ya batu ba Isilaele kamukana, ba ba ñozwi mwa masika a bona ka litopa-topa, n'e li likiti ze mianda ye silezi ka ze talu ni mianda i ketalizoho ka mashumi a ketalizoho. 33Kono, sina Muñ'a Bupilo mw'a n'a laelezi Mushe, Malivi ne ba si ka ñolwa hamoho ni Maisilaele kamukana.
34Cwalehe, batu ba Isilaele ba eza lika kamukana z'a n'a laezwi Mushe ki Muñ'a Bupilo. Ba bañwi ni ba bañwi ba toma mafulo mwatas'a ndembela ya bona, mi yo muñwi ni yo muñwi a zamaya ni ba mushiku wa habo.
Lozi Interconfessional Bible, Catholic Edition © Bible Society of Zambia, 2009.