Lipalo 28
28
Litabelo za ka zazi ni zazi
(Mut 29.38-46)
1Muñ'a Bupilo a fa Mushe litaelo. 2Mushe n'a na ni ku taluseza Maisilaele ku ba ni niti, kuli ka linako ze ketilwe, ba zwiseze Mulimu limpo za lico ze tokwahala, ze mu tabisa.
3Ze, ki zona limpo za lico ze ta fiwa Muñ'a Bupilo. Limpo za sitabelo se si ciswa ka zazi ni zazi ki mankomwana a lingu a mabeli a silimo si li siñwi, ili a si na f'a nyazahala. 4U eze ngunyana ya pili sitabelo sa kakusasa, ni ya bubeli sa manzibwana. 5Ye ñwi ni ye ñwi i tiswe ni bupinyana bo bu nekile, bo bu lubilwe ka mafula a mande a olive. 6Se ki sitabelo sa ku cisa, sa ka zazi ni zazi, se ne si kalile ku ezezwa fa Lilundu la Sinai, ili sitabelo sa lico, sa muunko o tabisa Muñ'a Bupilo. 7Haili ka mpo ya waine ye tiswa ni ngu ya pili, sela fa katala likomoki ze peli za waine. 8Manzibwana, eza sitabelo sa ngu ya bubeli ka mukwa o swana ni wa kakusasa, hamoho ni mpo ya waine. Ni sona seo ki sitabelo sa lico, sa muunko o tabisa Muñ'a Bupilo.
Sitabelo sa la Pumulo
9Ka la Pumulo, ku tiswe lingunyana ze peli za silimo si li siñwi feela, ili ze si na fo li nyazahala, ni sizumanyana sa bupi bo bu nekile, bo bu lubilwe ka mafula a olive, mi li eziwe sitabelo sa lico ni sa waine. 10Sitabelo se sa ku cisa si lukela ku eziwa ka la Pumulo ye ñwi ni ye ñwi, kwand'a sitabelo sa ka zazi ni zazi hamoho ni nubu ya sona ya waine.
Sitabelo sa lizazi la moonda
11Mu ezeze Muñ'a Bupilo sitabelo sa ku cisa kwa makalelo a kweli ye ñwi ni ye ñwi ka lipohwana ze peli, poho ya ngu, ni mankomwana a lingu a supile a silimo si li siñwi, ili limunanu ze si na fo li nyazahala. 12Haili ka mpo ya lico, i be bupi bo bu lubilwe ka mafula a olive. Fa poho ye ñwi ni ye ñwi mu beye sizuma sa bupi bo bu nekile. Fa poho ya ngu i be sizumanyana sa bupi. 13Kono fa ngunyana ye ñwi ni ye ñwi i be likomoki ze peli za bupi. Litabelo ze, za ku cisa, ki litabelo za lico, ili za muunko o tabisa Muñ'a Bupilo. 14Mpo ye lukela ya waine ki likomoki ze ne za waine fa poho ni poho, ze talu fa poho ya ngu, ni ze peli fa ngunyana ye ñwi ni ye ñwi. Wo, ki ona mulao wa litabelo za ku cisa ka zazi la pili la kweli ni kweli mwa silimo kaufela. 15Hape ka ku ekeza kwa sitabelo se si ciswa ka zazi ni zazi hamoho ni mpo ya sona ya waine, ku tiswe poho ya puli i liñwi, i be ya sitabelo sa ku zwisa libi.
Litabelo za Mukiti wa Paseka
(Malivi 23.5-14)
16 #
Mut 12.1-13; Mul 16.1-2 Mukiti wa Paseka wa ku kuteka Muñ'a Bupilo, u ta eziwa ka lizazi la bulishumi ni a mane mwa kweli ya pili. 17#Mut 12.14-20; 23.15; 34.18; Mul 16.3-8 Mukiti wo wa silumeli u ta kala ka lizazi la bulishumi ni a ketalizoho, mi u ta nga mazazi a supile. Ku ona mazazi ao ku ta ciwa feela linkwa ze si na mumela. 18Ka lizazi la pili la mukiti mu na ni ku kopana kwa sebelezo, mi ku si ke kwa ezwa musebezi ni o mukana. 19Mu ezeze Muñ'a Bupilo sitabelo sa ku cisa sa lico, ili lipohwana ze peli, poho ya ngu, ni mankomwana a lingu a supile a na ni silimo si li siñwi feela, ze si na fo li nyazahala. 20Mu eze sitabelo sa mpo ya lico ze lukela. I be bupi bo bu nekile, bo bu lubilwe ka mafula a olive, ili sizuma fa poho ni poho, ni sizumanyana fa poho ya ngu. 21Mu tise ni likomoki ze peli za bupi fa ngunyana ye ñwi ni ye ñwi. 22Hape mu tise ni poho ya puli i liñwi ya sitabelo sa ku zwisa libi, mi ka mukwa wo, mu eze sebelezo ya ku kenisa batu. 23Mu tise zeo ili za ku ekeza fa sitabelo se si ciswa kakusasa ka zazi ni zazi. 24Kamukawaoswana, mu fe Muñ'a Bupilo ka mazazi a supile limpo za lico za muunko o mu tabisa. Mu eze cwalo, ili ku ekeza kwa sitabelo sa ku cisa ni sa waine se si eziwa ka zazi ni zazi. 25Mu kopanele kwa sebelezo ka lizazi la busupa, mi mu si ke mwa eza musebezi ni o mukana.
Litabelo za Mukiti wa Kutulo
(Malivi 23.15-22)
26 #
Mut 23.16; 34.22; Mul 16.9-12 Ka lizazi la pili la Mukiti wa Kutulo, ha mu fitisa limpo za lico ze nca ku Muñ'a Bupilo, mu lukela ku kopana kwa sebelezo, mi ku si ke kwa eziwa musebezi ni o mukana. 27Mu eze sitabelo sa ku cisa sa muunko o tabisa Muñ'a Bupilo. I be lipohwana ze peli, poho ya ngu, ni mankomwana a lingu a supile a silimo si li siñwi, ili ze si na fo li nyazahala. 28Hape ku tiswe ni mpo ya lico ye lukela, ili ya bupi bo bu nekile, bo bu lubilwe ka mafula a olive. Bupi bo, i be bo bu taza sizuma fa poho ni poho, sizumanyana fa poho ya ngu. 29Bu taze ni mukeke fa ngunyana ye ñwi ni ye ñwi. 30Hape mu tise ni poho ya puli ya sitabelo sa ku zwisa libi, mi ka mukwa wo, mu eze sebelezo ya ku kenisa sicaba. 31Mu tise ze, ni mpo ya waine, ku ekeza kwa litabelo za ka zazi ni zazi za ku cisa, ni za lico cwalo.
Lozi Interconfessional Bible, Catholic Edition © Bible Society of Zambia, 2009.