Lipalo 27
27
Bana ba Zelofehadi ba basizana
1Mahala, Noa, Hogula, Milika ni Tiriza n'e li bana ba basizana ba Zelofehadi, mwan'a Heferi, mwan'a Giliadi, mwan'a Makiri, mwan'a Manase, mwan'a Josefa. 2Basizana ba ba y'o yema fapil'a Mushe, muprisita Eliazare, baeteleli ni sicaba kaufela se ne si li kwa munyako wa Tende ya Kopano, ba li, 3“Ndat'a luna u shwezi mwa lihalaupa, a si ka siya bana ba bashimani. N'a siyo mwa sitopa sa Kora, se ne si fetuhezi Muñ'a Bupilo. N'a ishwezi feela ka sibi sa hae. 4Kikabakalañi libizo la ndat'a luna ha li fela mwa lusika lwa hae, kakuli n'a si na bana ba bashimani? U lu fe liluwo, ni luna, mwahal'a banabahabo ndat'a luna.”
5Mushe a fitisa taba ya bona fapil'a Muñ'a Bupilo. 6Muñ'a Bupilo a li ku yena, 7#Lipa 36.2 “Kupo ya bana ba Zelofehadi i lukile. U ba fe liluwo mwahal'a banabahabo ndat'a bona. Lifa la hae li yolwe ki bona. 8Bulelela batu ba Isilaele kuli haiba mutu a shwa, a si na mwana wa mushimani, wa musizana u swanezi ku yola lifa la hae. 9Haiba a si na mwana wa musizana, banyani ba hae ba li yole. 10Haiba a si na banyani ba hae ba bashimani, liluwo leo li yoliwe ki banyani ba ndat'ahe. 11Haiba a si na banyani kamba malum'ahe, fohe mwanahabo luli a li yole, mi a li nge kuli ki liluwo la hae luli. Batu ba Isilaele ba swanezi ku tokomela mulao wo, sina na, Muñ'a Bupilo, ha ni ku laezi cwalo.”
Joshua u ketiwa ku yola Mushe
(Mul 31.1-8)
12 #
Mul 3.23-27; 32.48-52 Muñ'a Bupilo a li ku Mushe, “Kambama fa Lilundu la Abarimi, mi u bone naha ye ni fa Maisilaele. 13Ha u s'o i boni, u ta shwa, sina mw'a shwezi muhulwan'a hao Aruni. 14U ka shwa kakuli bubeli bwa mina ha mu si ka buluka taelo ya ka mwa Lihalaupa la Sini. Sicaba kamukana ha si kile sa bilaela ka na kwa Meriba, u hanile ku zibahaza fapil'a bona maata a ka a kenile.” Meriba ki musindi o kwa Kadeshi mwa Lihalaupa la Sini.
15Mushe a lapela, a li, 16“Mulimu, Muñ'a Bupilo, wena simbule sa bupilo kamukana, na ku lapela, keta mutu ya ka etelela sicaba. 17#1 Male 22.17; Ezek 34.5; Mat 9.36; Mar 6.34 A si zamaise mwa ndwa, kuli sicaba sa hao si si ke sa swana ni mutapi wa lingu o si na mulisana.”
18 #
Mut 24.13
Muñ'a Bupilo a li ku Mushe, “U nge Joshua mwan'a Nuni, munna ya sepahala, mi u mu beye mazoho fa toho. 19U mu yemise fapil'a muprisita Eliazare ni sicaba kamukana, mi hona fo, fapil'a bona kamukana, u mu zibahaze kuli ki yena shwana wa hao. 20U mu fe kwa maata a hao, kuli a utwiwe ki sicaba sa Isilaele kaufela. 21#Mut 28.30; 1 Sam 14.41; 28.6 U ta itinga ku muprisita Eliazare, ya ta ituta tato ya ka, ka ku itusisa Urimi ni Tumimi. Ka mukwa wo, Eliazare u ta zamaisa Joshua ni sicaba sa Isilaele kamukana mwa litaba za bupilo bwa bona kaufela.” 22Mushe a eza mw'a n'a mu laelezi Muñ'a Bupilo. A yemisa Joshua fapil'a muprisita Eliazare ni sicaba kamukana. 23#Mul 31.23 A beya mazoho a hae fa toho ya Joshua, mi a mu zibahaza kuli ki yena shwana wa hae.
Lozi Interconfessional Bible, Catholic Edition © Bible Society of Zambia, 2009.