Lipalo 26
26
Ku balwa kwa bubeli kwa sicaba sa Isilaele
1 #
Lipa 1.1-46
Mwamulaho a ziezi yeo, Muñ'a Bupilo a li ku Mushe ni Eliazare, mwan'a Aruni, 2“Mu bale banna ba sicaba sa Isilaele kamukana ka limba, ku kala ka ba lilimo ze mashumi a mabeli ni ba bahulu ku bao, ili ba ba lukela ku kena mwa busole.” 3Mushe ni Eliazare ba utwa mi ba kopanya batu hamoho, ili ba lilimo ze mashumi a mabeli ni ku fita. Ba kopanela mwa Mabala a Moabi mwabuse bwa Nuka ya Jordani ku zwa mwa Jeriko. 4Mushe ni Eliazare mwan'a Aruni, ne ba bulelela ni bona, ba li, “Mu bale banna ba sicaba sa Isilaele kamukana, ku kala ka ba lilimo ze mashumi a mabeli ni ba bahulu ku bao, sina Muñ'a Bupilo n'a laelezi Mushe.”
Bana ba Isilaele ba ba ne ba zwile kwa Egepita ki ba.
5Ba lusika lwa Rubeni, yena mweli wa Jakobo, n'e li ba mishiku ya Hanoki, Palu, 6Hezironi ni Karami. 7Mishiku ye kaufela ne i fita fa banna ba ba eza likiti ze mashumi a mane ka ze talu ni mianda ye supile ka mashumi a malalu. 8Baikulu ba Palu n'e li Eliabi, 9ni bana ba hae bo Nemuele, Datani ni Abirami. Ba, ki bona bo Datani ni Abirami ba ba ne ba ketilwe ki sicaba. Ne ba lwanisize Mushe ni Aruni, mi ba kena kwa balateleli ba Kora, ha ne ba fetuhezi Muñ'a Bupilo. 10Mubu wa pazuha mi wa ba miza. Ba shwa hamoho ni Kora ni balateleli ba hae, mulilo ha s'o bulaile batu ba mianda ye mibeli ka mashumi a ketalizoho. Banna bao ba ba temuso kwa sicaba. 11Kono bana ba Kora ne ba si ka bulaiwa.
12Lusika lwa bubeli i n'e li lwa Simioni, ili mishiku ya Memuele, Jamini, Jakini, 13Zera, ni Shaule. 14Mishiku ye kaufela ne i fita fa banna ba likiti ze mashumi a mabeli ka ze peli ni mianda ye mibeli.
15Ba lusika lwa Gadi, n'e li mishiku ya Zefoni, Hagi, Shuni, 16Ozoni, Heri, 17Arodi ni Areli. 18Mishiku ye kaufela ne i fita fa banna ba ba eza likiti ze mashumi a mane ka mianda i ketalizoho.
19Bana ba Juda ba babeli, bo Eri ni Onani, ne ba shwezi mwa naha ya Kanana. Ba lusika lwa Juda 20n'e li mishiku ya Shela, Perezi, Zera, 21Hezironi ni Hamule. 22Mishiku ye kaufela ne i fita fa banna ba likiti ze mashumi a supile ka ze silezi ni mianda i ketalizoho.
23Ba lusika lwa Isakare, n'e li mishiku ya Tola, Puva, 24Jashubi ni Shimironi. 25Mishiku ye kaufela ne i fita fa banna ba likiti ze mashumi a silezi ka ze ne ni mianda ye milalu.
26Ba lusika lwa Zebuloni, n'e li mishiku ya Seredi, Eloni ni Jaleele. 27Mishuki ye kaufela ne i fita fa banna ba likiti ze mashumi a silezi ka mianda i ketalizoho.
28Masika a Josefa, yena ya n'a pepile bana ba babeli, n'e li bo Manase ni Eferaimi.
29Ba lusika lwa Manase n'e li Makiri, mwan'a Manase ya n'a pepile Giliadi, mi mishiku ye tatama i simuluhile ku yena Giliadi, 30ili mishiku ya Jezeri, Heleki, 31Aziriele, Sikemi, 32Shemida, ni Heferi. 33Zelofehadi, mwan'a Heferi, n'a si na bana ba bashimani, haisi ba basizana feela. Mabizo a bona n'e li bo Maala, Noa, Hogula, Milika ni Tiriza. 34Mishiku ye kaufela ne i eza banna ba likiti ze mashumi a ketalizoho ka ze peli ni mianda ye supile.
35Ba lusika lwa Eferaimi, n'e li mishiku ya Shutela, Bekeri ni Tahani. 36Mushiku wa Erani n'o simuluha ku Shutela. 37Mishiku ye kaufela ne i na ni banna ba ba eza likiti ze mashumi a malalu ka ze peli ni mianda i ketalizoho.
38Ba lusika lwa Benjamine, n'e li mishiku ya Bela, Ashibele, Akirami, 39Shefufami ni Hufami. 40Mishiku ya Arada ni Naamani ne i simuluha ku Bela. 41Mishiku ye kaufela ne i na ni banna ba ba fita fa likiti ze mashumi a mane ka ze ketalizoho ni mianda ye silezi.
42Ba lusika lwa Dani, n'e li mushiku wa Shuhami 43o n'o eza palo ya banna ba likiti ze mashumi a silezi ka ze ne ni mianda ye mine.
44Ba lusika lwa Asere, n'e li mishiku ya Jimina, Jishivi ni Beria. 45Mishiku ya Hebere, ni Malikiele ne i simuluha ku Beria. 46Asere n'a na ni mwana wa musizana ya n'a bizwa Sera. 47Mishiku ye kaufela ne i fita fa banna ba likiti ze mashumi a ketalizoho ka ze talu ni mianda ye mine.
48Ba lusika lwa Nafetali, n'e li mishiku ya Jazeele, Guni, 49Jezeri, ni Shilemi. 50Mishiku ye kaufela ne i fita fa banna ba likiti ze mashumi a mane ka ze ketalizoho ni mianda ye mine.
51Palo kamukana ya banna ba Maisilaele n'e li likiti ze mianda ye silezi ka si li siñwi ni mianda ye supile ka mashumi a malalu.
52 #
Lipa 34.13; Josh 14.1-2 Muñ'a Bupilo a li ku Mushe, 53“U abele masika naha ye, ili ka ku ya ka fo ba kuma. 54U abe naha ka ku ya ka lipalo za mishiku, mi u fe naha ye tuna kwa lusika lo luñata, ni naha ye nyinyani kwa lusika lo lunyinyani. 55Mu bone kuli naha i abiwa ka ku laula. Kaluo yeo i ta fumanwa i ta ba ka ku ya ka libizo la bo ndat'a bona. 56Kabelo ye ñwi ni ye ñwi i ta fiwa ka ku latelela butuna kapa bunyinyani bwa lusika.”
57Lusika lwa Livi ne lu kopanyize mishiku ya bo Gerishoni, Kohati ni Merari. 58Malivi ba bañwi n'e li ba limba ze n'e simuluha ku Libina, Heberoni, Mahali, Mushi, ni Kora. Kohati n'e li yena ndat'ahe Amirami. 59Amirami n'a nyezi mwan'a Livi ya n'a bizwa Jokebedi, ili ya n'a il'o pepelwa mwa Egepita. Jokebedi yo, a pepela Amirami bashimani ba babeli, bo Aruni ni Mushe, ni musizana ya bizwa Miriame kaizel'a bona. 60#Lipa 3.2 Aruni n'a na ni bana ba bane, ili bo Nadabi, Abihu, Eliazare ni Itamare. 61#Malivi 10.1-2; Lipa 3.4 Nadabi ni Abihu ba shwa kabakala ku tisa mulilo o n'o si ka kena fapil'a Muñ'a Bupilo. 62Malivi ba banna ne ba fita fa likiti ze mashumi a mabeli ka ze talu ku kala ku ba kweli i liñwi ku isa ku ba bahulu. Bona ne ba ñolezwi kwatuko ili ku ba kauhanya ni Maisilaele kamukana, kakuli bona ne ba si ka fiwa liluwo mwa Isilaele.
63Mishiku yeo kaufela ne i ñozwi ki Mushe ni Eliazare, ha ba bala palo ya Maisilaele mwa Mabala a Moabi, ili mwabuse bwa Jordani ku zwelela kwa Jeriko. 64Ne ku si na mutu, nihaili a li muñwi feela, ya n'a siyezi ku bona bani ba ba ne ba ñozwi ki Mushe ni Aruni mwa Lihalaupa la Sinai. 65#Lipa 14.26-35 Muñ'a Bupilo n'a bulezi kuli kaufel'a bona ba ta shwela mwa lihalaupa, mi ba shwa kamukana, konji Kalebu mwan'a Jefune, ni Joshua mwan'a Nuni.
Lozi Interconfessional Bible, Catholic Edition © Bible Society of Zambia, 2009.