Lipalo 25
25
Batu ba Isilaele kwa Peori
1Maisilaele ha ne ba tibelezi mwa Shitimi, banna ba kala ku fosa ni basali ba Moabi. 2Basali bao ba kala ku ba memela kwa mikiti ya litabelo, ko ne ku lapelwa mulimu wa Moabi. Maisilaele ba ca lico ni ku lapela mulimu. 3Ba lapela yena Baale wa Peori. Muñ'a Bupilo a ba nyemela. 4A li ku Mushe, “U kopanye baeteleli ba sicaba kaufela, mi bafosi mwa masika a bona ba bulaiwe patalaza fapil'a ka, kuli ni si ke na ba nyemela hape.” 5Mushe a li kwa baatuli, “Yo muñwi ni yo muñwi wa mina a bulaye mutu kaufela wa mwa lusika lwa habo ya keni mwa bulapeli bwa Baale wa Peori.”
6Yo muñwi wa Maisilaele a nga musali wa Mumidiani. A mu kenya mwa tende ya hae, mwa meeto a Mushe ni sicaba kamukana, ha ne ba nze ba lila kwa munyako wa Tende ya Kopano. 7Cwale Finehasi, mwan'a Eliazare, muikulu wa muprisita Aruni, h'a bona kezo yeo, a yema, mi a siya kopano. Kih'a nopa lilumo. 8A latelela munna yo ni musali mwa tende, mi a ba patahanya ka lilumo bubeli bwa bona. Ka mukwa wo, ncwa ye n'e feza Maisilaele ya fela. 9Kono ne i se i bulaile batu ba likiti ze mashumi a mabeli ka ze ne.
10Muñ'a Bupilo a li ku Mushe, 11“Finehasi u yemisize bunyemi bwa ka kwa batu ba Isilaele. U hanile ku talimela feela sebelezo ya milimu i sili kwand'a ya ka, mi ki kabakaleo ha ni si ka ba yundisa mwa ku halifa kwa ka. 12Cwalehe, u mu bulelele kuli ni iswala ni yena bulikani bo bu tiile, bo bu ta inelela kuya kuile. 13Yena ni baikulu ba hae ba ta ba baprisita kamita, kakuli h'a si ka lumelela kuli ku be ni ba ba itikanya ni na, mi u tahisize swalelo ya sibi sa sicaba.”
14Libizo la Muisilaele ya n'a bulailwe ni musali wa Mumidiani n'e li Zimiri, mwan'a Salu, ili toho ya mba mwa lusika lwa Simioni. 15Libizo la musali n'e li Kozobi. Zuri ndat'ahe, n'e li nduna wa sitopa sa mishiku ya Mamidiani.
16Muñ'a Bupilo a laela Mushe, a li, 17“Lwanisa Mamidiani, mi u ba timise. 18U eze cwalo kabakala bumaswe bo ba ku ezize ha ba ku pumile kwa Peori, ni kabakala Kozobi, ya n'a bulailwe ka nako ya ncwa kwa Peori.”
Lozi Interconfessional Bible, Catholic Edition © Bible Society of Zambia, 2009.