Lipalo 24
24
1Fo, Balaami n'a s'a zibile kuli Muñ'a Bupilo n'a bata kuli a fuyaule batu ba Isilaele. Kabakaleo h'a si ka y'o bata liponiso, sina mw'a n'a ezelize pili. A talima kwa lihalaupa. 2Kih'a bona Maisilaele ba tibelezi ka masika a bona. Moya wa Mulimu wa taha ku yena. 3Mi cwale a polofita cwana, a li,
“Ki a manzwi a Balaami mwan'a Beori,
manzwi a mutu ya na ni pono sakata.
4Ki manzwi a ya kona ku utwa
s'a bulela Mulimu,
mutu ya cuulisisa hande mwa moya
lipono ze zwa
ku Mulimu ya Maata Kaufela.
5Litende za Maisilaele ki ze nde
ka ku fitisisa.
6Ki ze nde sina mibamba ye mitelele
ya linzalu,
kamba masimu a kwatuko a nuka,
sina likota za hopani ze cezwi
ki Muñ'a Bupilo,
kamba likota za sidare kwatuko
a mezi.
7Mpi ya Maisilaele i kuñisa macaba,
mi Isilaele i busa batu ba bañata.
Mulen'a bona u ta fita Agagi
kwa butuna
mi mubuso wa hae u ta ekezeha
mwa butelele ni mwa bupala.
8Mulimu u ba zwisize mwa Egepita.
U ba lwanela sina nali.
Ba miza lila za bona,
ba tubaka masapo a bona.
Ba lobaka ni masho a bona.
9 #
Sim 12.3; 49.9 Sicaba si swana ni tau ye tata.
Ha i lobezi, ha ku na ya ka lika
ku i zusa.
Mañi ni mañi ya fuyaula Isilaele,
ni yena u ta fuyaulwa.
Ni mañi ni mañi ya kuta Isilaele,
ni yena u ta kutiwa.”
10Balaki a puta liñondo za hae ka buhali, mi a li ku Balaami, “Ni ku bizelize ku t'o kuta lila za ka, kono cwale s'e li halalu u nz'o ba fuyaula. 11Cwale, zwa, u ye kwa hae! Ne ni sepisize ku ku lifa, kono cwale Muñ'a Bupilo u ku hanisize ku fumana mupuzo.”
12Balaami a alaba, a li, “Ne ni lemusize linumwana z'o n'o lumile. 13Niha u ka ni fa silivela ni gauda kaufela ze mwa ndu ya hao, ha ni na ku hanyeza taelo ya Muñ'a Bupilo ka ku ikezeza lika ili na ni nosi. Ni ka talusa feela se ni bulelelwa ki Muñ'a Bupilo.”
Bupolofita bwa Balaami bwa mafelelezo
14Balaami a li ku Balaki, “Cwale na kutela kwa banababahesu, kono pili ni si ka ya, na ku lemusa se ba ta eza Maisilaele kwa batu ba hao, ka nako ye taha.” 15Cwale a polofita cwana, a li,
“Manzwi a Balaami mwan'a Beori,
manzwi a mutu ya na ni pono sakata!
16Manzwi a ya kona ku utwa
s'a bulela Mulimu,
ni ku fumana zibo ye zwa
ku Muambakani ya Pahami,
mutu ya cuulisisa hande mwa moya
lipono ze zwa ku Mulimu
ya Maata Kaufela!
17Ni talima ku ze sa taha,
mi ni bona sicaba sa Isilaele.
Mulena, ya swana ni naleli
ye benya,
u ka taha ku sona sicaba seo.
U ka taha mwa Isilaele sina naleli
ye muhata.
U ta nata manduna ba Moabi,
mi u ta koma ba ba ikuhumusa
ni ba mifili-fili kaufela.
18U ta tula lila za hae mwa Edomo.
Naha ya bona u ta i eza ya hae,
Isilaele h'a nz'a zwelapili ku tula
cwalo.
19Sicaba sa Isilaele
si ta ba hatikela.
Mi si fiyele mataokela
a ba ba bandukile.”
20Cwale Balaami, mwa pono ya hae, a bona Maamaleke, mi a polofita cwana, a li,
“Maamaleke n'e li sicaba se si
maata hahulu ku fita a mañwi kaufela.
Kono kwa mafelelezo si ta fela mbuu
kuya kuile.”
21Mwa pono ya hae a bona Makeni, mi a polofita cwana, a li,
“Sibaka se mu yahile ku sona
si iketile.
Si iketile sina siyaleto
se si fa ngo ya licwe le litelele.
22Kono mina Makeni, mu ta yundiswa,
Maasiria ha ba ta mi hapa.”
23Balaami a polofita cwana hape, a li,
“Batu ba, ba ba kopana
kwa mutulo, ki bo mañi?
24Batabani ba ta fuula
ku zwa kwa Sipera.
Ba ta tula Asiria ni Babilona.
Kono ni bona ba ta fela kuya kuile.”
25Cwale Balaami a funduka ku kutela kwa hae, mi Balaki ni yena a ikela.
Lozi Interconfessional Bible, Catholic Edition © Bible Society of Zambia, 2009.