Lipalo 23
23
1A li ku Balaki, “U ni yahele tutala to tu supile fa, mi hape u ni tiseze lipoho ze supile ni lipuli ze supile.”
2Balaki a eza mw'a n'a bulelezwi, mi yena ni Balaami ba beya mpo ya poho ni puli fa katala ka kañwi ni ka kañwi. 3Cwale Balaami a li ku Balaki, “Yema fa, kwatuko a sitabelo sa hao sa ku cisa, na, ha ni sa y'o bona haiba Muñ'a Bupilo u ta ni katanyeza. Ni ta ku bulelela s'a ta ni bonisa kaufela.” Kih'a ya fa ñambamo fo ku sweu. 4Mi Mulimu a mu katanyeza. Balaami a li ku yena, “Ni yahile tutala to tu supile, mi ni beile poho ni ngu ku ka kañwi ni ka kañwi.”
5Muñ'a Bupilo a alaba, a li, “Kutela ku Balaki, u y'o mu taluseza manzwi a ka.” 6Cwale a ya, mi a fumana Balaki ni manduna ba Moabi kamukana, ba sa yemi kwatuko a sitabelo sa hae sa ku cisa.
7Balaami a polofita cwana, a li,
“Balaki mulena wa Moabi,
u ni tisize kwanu
ku zwa kwa Siria, kwa malundu
a kwa upa.
A li, ‘Taha, u t'o bulela mwa sibaka sa ka.
Kuta batu ba Isilaele.’
8Ni ta kuta cwañi
s'a si ka kuta Mulimu,
kamba ku nyaza,
Mulimu yena a si ka eza cwalo?
9Ni kona ku ba bona
ni li fahalimw'a macwe.
Ni kona ku ba talima
ni li fa malundu.
Ki sicaba se si ipilela si nosi.
Ba ziba kuli ba fuyauzwi ku fita
macaba a mañwi.
10Baikulu ba Isilaele ba swana ni liluli.
Ki ba bañata hahulu,
mane ha ba konwi ku balwa.
Kabe ni feleleza mazazi a ka
sina yo muñwi wa batu ba Mulimu.
Ni shwe ka kozo
sina batu ba ba lukile.”
11Cwale Balaki a li ku Balaami, “U ni ezize cwañi? Ni ku tisize kwanu ku t'o kuta lila za ka, kono s'o ezize feela fa, ki ku ba fuyaula.”
12A alaba, a li, “Ni kona feela ku talusa s'a ni bulelela Muñ'a Bupilo.”
Bupolofita bwa Balaami bwa bubeli
13Cwale Balaki a li ku Balaami, “A lu ye kaufela mwa sibaka se siñwi m'o ta y'o bona kalulo feela ya Maisilaele. U y'o ni kutela bona hona koo.” 14A mu isa mwa simu ya Zofimi, fahalimw'a Lilundu la Pisiga. Ni hona foo hape a yaha tutala to tu supile, mi a eza sitabelo sa poho ni puli fa katala ka kañwi ni ka kañwi.
15Balaami a li ku Balaki, “Yema kwatuko a sitabelo sa hao sa ku cisa, mi na, ni sa y'o katanyeza Mulimu kwani.”
16Muñ'a Bupilo a kopana ni Balaami, a mu bulelela s'a ta talusa, mi a mu kutiseza ku Balaki ku y'o mu taluseza manzwi a hae. 17Cwale a kuta, mi a fumana Balaki ni manduna ba Moabi ba sa yemi kwatuko a sitabelo sa hae sa ku cisa. Balaki a buza s'a bulezi Muñ'a Bupilo. 18Mi Balaami a polofita cwana, a li,
“Taha, Balaki mwan'a Zipori,
mi u teeleze se ni ta bulela.
19Mulimu h'a swani ni batu,
ba ba puma.
Ha si mutu ya fetuha.
S'a sepisa kaufela, wa si eza.
S'a bulela s'a ezahala.
20Ni laezwi ku fuyaula,
mi Mulimu h'a fuyaula,
na, ha ni koni ku kuta.
21Ni bona kuli nako ya Isilaele
ye taha
ha i na ku tisa bumai kamba manyando.
Muñ'a Bupilo, Mulimu wa bona,
u inzi ni bona.
Ba bulela kuli ki yena feela mulen'a bona.
22Mulimu u ba zwisize mwa naha
ya Egepita.
U ba lwanela sina nali.
23Ha ku na suunduma, ha ku na buloi
bo bu ka sebeliswa kwa ku lwanisa
sicaba sa Isilaele.
Cwale batu ba ta li ka Isilaele,
‘A mu bone s'a ezize Mulimu!’
24Sicaba sa Isilaele si swana
inge tau ye tata.
Ha i pumuli konji ha i se i pulile
ni ku miza,
konji ha i se i kapile mali
a z'e bulaile.”
25Cwale Balaki kiha s'a li ku Balaami, “Wa hana ku kuta batu ba Isilaele, konohe, u si ke wa ba fuyaula.”
26Balaami a alaba, a li, “Kikuli ha ni si ka ku bulelela kuli ni swanezi ku eza lika kaufela z'a ni bulelela Muñ'a Bupilo, nji?”
Bupolofita bwa Balaami bwa bulalu
27Balaki a li, “A lu ye kaufela, mi ni ta ku isa kwa sibaka se siñwi. Mwendi kwateñi Mulimu u ka y'o tabela kuli u ni kutele bona.” 28Cwale a isa Balaami fahalimw'a Lilundu la Peori, le li ukumezi lihalaupa. 29Balaami a li ku yena, “U ni yahele tutala to tu supile fa, mi u ni tiseze lipoho ze supile ni lipuli cwalo.” 30Balaki a eza mw'a n'a bulelezwi, mi a tisa poho ni puli fa katala ka kañwi ni ka kañwi.
Lozi Interconfessional Bible, Catholic Edition © Bible Society of Zambia, 2009.