Lipalo 22
22
Mulena wa Moabi u lumela Balaami
1Maisilaele ba funduka, mi ba y'o tibelela mwa Mabala a Moabi, kwa upa wa Jordani, ku talimana ni Jeriko.
2Mulena Balaki, mwan'a Zipori, n'a boni se ne ba ezize Maisilaele kwa Maamori. 3Yena, hamohocwalo ni batu ba Moabi, ba sabiswa hahulu ki Maisilaele kakuli n'e li ba bañata hahulu. 4Mamoabi ba li kwa baeteleli ba Mamidiani, “Linyambangeti ba, ba tuha ba bulaya lika kamukana ze lu potolohile, sina poho ye fula mwa mafulelo.” 5#Lipa 31.8; 2 Pit 2.15-16; Juda 11 Cwale Mulena Balaki a luma linumwana ku y'o biza Balaami, mwan'a Beori, ya n'a li kwa Petori fakaufi ni Nuka ya Yuferati mwa naha ya Amawo. Ba mu tiseza manzwi a li, “Ni bata ku ku zibisa kuli ku tile sicaba kamukana se si zwa kwa Egepita. Batu ba sona ba hasanela kai ni kai, mi ba fubmela ku hapa naha ya luna. 6Ba lu fita kwa buñata. Cwale mulikani, taha u t'o ni kutela bona, mwendi lu ka kona ku ba tula ni ku ba leleka mwa naha ya luna. Ni ziba kuli ha u fuyaula, batu ba ba ni limbuyoti, mi ha u ba kuta, ba kutehile.”
7Cwalehe, baeteleli ba Moabi ni Midiani ba lwala tifo ya sikuto, ba ya ku Balaami, mi ba mu fa manzwi a Balaki. 8Balaami a li ku bona, “Mu lobale, mi kamuso ni ta mi taluseza s'a ta ni bulelela Muñ'a Bupilo.” Cwale manduna ba Moabi ba ina ni Balaami.
9Mulimu a taha ku Balaami, mi a buza, a li, “Batu ba, ba ba inzi ni wena, ki bo mañi?”
10A alaba, a li, “Ki ba Mulena Balaki wa Moabi ba ba lumilwe ku t'o ni fa liñusa. 11Ba bulela kuli sicaba se si zwa kwa Egepita si se si hasani mwa naha kaufela. U bata kuli ni mu kutele sona, ili kuli a kone ku si lwanisa ni ku si leleka.”
12Mulimu a li ku Balaami, “U si ke wa ya ni batu ba, mi hape u si ke wa kuta batu ba Isilaele, kakuli ba na ni limbuyoti za ka.”
13Habusa, Balaami a ya kwa linumwana za Balaki, mi a li, “Mu kutele habo mina. Muñ'a Bupilo u ni hanisize ku ya ni mina.” 14Cwale ba kutela ku Balaki, mi ba mu bulelela kuli Balaami u hanile ku taha ni bona.
15Cwale Balaki a luma sitopa-tuna sa manduna ba ba kutekeha hahulu. 16Ba ya ku Balaami, mi ba y'o mu taluseza manzwi a Balaki, ba li, “Mulikani, u si ke wa paleliswa ki se siñwi ku taha ku na! 17Ni ta ku lifa hande hahulu, ni ku eza s'o ta ni laela kaufela. Cwale mulikani, na ku lapela, u t'o ni kutela batu ba!”
18Kono Balaami a alaba, a li, “Balaki nih'a ka ni fa silivela ni gauda kamukana ye mwa ndu ya hae, ha ni na ku tula taelo ya Muñ'a Bupilo, Mulimu wa ka, niha i ka ba mwa katabanyana feela. 19Kono balikani, mu lobale sina mo ne ba ezelize ba bañwi, ili kuli ni zibe haiba Muñ'a Bupilo u na ni s'a ka ni bulelela hape.”
20Bona busihu bo, Mulimu a taha ku Balaami, mi a li, “Haiba batu ba, ba til'o ku kupa kuli u ye ni bona, u itukise mi u funduke, kono u eze feela se ni ku bulelela.” 21Cwale habusa Balaami a lukisa mbongolo ya hae, mi a ya ni manduna ba Moabi.
22Mulimu a nyemiswa ki musipili wa Balaami, mi Balaami ha n'a nz'a pahami fa mbongolo cwalo, a sindektwa ki babeleki ba hae ba babeli, lingeloi la Muñ'a Bupilo la yema kwapili, ku mu kwalela nzila. 23Mbongolo ha i bona lingeloi, li yemi mwa nzila li sweli mukwale, ya keluha mwa nzila mi ya liba mwa masimu. Balaami a nata mbongolo, mi a i kutiseza mwa nzila. 24Lingeloi la y'o yema fo ne i kumbani nzila mwahal'a masimu a mabeli a likota za veine, a na ni mamota a macwe kafa ni kafa. 25Mbongolo ha i bona lingeloi, ya sutelela kwa limota, mi ya huta lihutu la hae fa limota. Balaami hape a nata mbongolo. 26Hape lingeloi la tutela fo ne ku kumbani hahulu, fo ne ku si na makeluhelo kafa ni kafa, mi la yema mwa nzila. 27Ka nako yeo, mbongolo ha i bona lingeloi, ya buta. Balaami a nyema, mi a kala ku nata mbongolo ka mulamu wa hae. 28Cwale Muñ'a Bupilo a bulelisa mbongolo, mi ya li ku Balaami, “Kanti ni ku foselize sika mañi? U ni natakeziñi cwana halalu?”
29Balaami a alaba, a li, “Kakuli u ni boni bukuba! Kabe ni na ni mukwale ne ni ka ku bulaya.”
30Mbongolo ya alaba, ya li, “Kikuli ha si na mbongolo y'o n'o pahamanga nako ye kaufela, nji? Kana ni kile na ku eza ka mukwa wo, naa?”
A alaba, a li, “Batili.”
31Cwale Muñ'a Bupilo a bonisa Balaami lingeloi le ne li yemi fo, li sweli mukwale wa lona. Mi Balaami a ikwiseza fafasi ka pata. 32Lingeloi la buza, la li, “U nateziñi mbongolo ya hao halalu cwana? Ni til'o kwala nzila ya hao, kakuli ha u lukeli ku nga musipili wo! 33Kono mbongolo ya hao i ni boni, mi i ni keluhile halalu. Kabe ne i si ka keluha, ne ni ka ku bulaya, mi ni pilise mbongolo ya hao.”
34Balaami a alaba, a li, “Ni fosize. Ne ni sa zibi kuli u yemi mwa nzila ku ni hanisa. Kono cwale, haiba u bona kuli ha ni ya kwateñi ku fosahahile, ni ta kutela kwa hae.”
35Kono lingeloi la li, “Zamaya ni batu ba, kono u y'o talusa ze ni ta ku bulelela feela.” Cwale Balaami a ya ni bona.
Balaki u amuhela Balaami
36Balaki h'a utwa kuli Balaami wa taha, a y'o mu katanyeza kwa Ari, munzi o kwa Nuka ya Arinoni, ili kwa museto wa Moabi. 37Balaki a li ku Balaami, “Kiñi ha n'o si ka taha ha ne ni ku lumezi? Kikuli n'o hupula kuli ne ni si ke na kona ku ku lifa hande, nji?”
38Balaami a alaba, a li, “Ni tile, nji ha ku cwalo? Kono feela ku talusa s'a ni bulelela Mulimu.” 39Cwale Balaami a ya ni Balaki kwa munzi wa Kiryati Huzoti. 40Balaki a y'o taba likomu ni lingu, mi a lumela nama ye ñwi ku Balaami ni manduna b'a n'a tile ni bona.
Bupolofita bwa Balaami bwa pili
41Habusa kakusasana Balaki a isa Balaami kwa Bamoti Baale. Hona koo Balaami a bona kalulo ye ñwi ya batu ba Isilaele.
Lozi Interconfessional Bible, Catholic Edition © Bible Society of Zambia, 2009.