Lipalo 19
19
Mashala a nkomwana ye kunwana
1Muñ'a Bupilo a fa Mushe ni Aruni litaelo. 2Mushe ni Aruni ba na ni ku taluseza Maisilaele milao yeo ye tatama, kuli ba tise nkomwana ye kunwana ye si ka holofala kamba ku sebeliswa. 3Ba i fe muprisita Eliazare. I swanezi ku zwisezwa kwand'a mafulo, mi i y'o bulaelwa fapil'a hae. 4Cwale Eliazare u ta cupwa munwana mwa mali a yona, mi a' fafaze hasupile kwa neku la Tende ya Kopano. 5Haili nkomwana kaufela hamoho ni litalo, nama, mali ni mala li na ni ku cisezwa fapil'a muprisita. 6Cwale u ta nga likota ze ñwi za sidare, mitai ya hisopa ni bwanda bo bufubelu, mi a li nepele mwa mulilo. 7Mwamulaho a zeo, u ka tapisa liapalo za hae ni ku icubaela mezi, mi kihona a ta kena mwa mafulo. Kono u ta ba ya si ka kena cwalo ku fitela nako ya manzibwana. 8Mutu ya cisize komu u swanezi ku tapisa liapalo za hae ni ku icubaela mezi, kono ni yena cwalo u ta ba ya si ka kena ku fitela manzibwana. 9#Maheb 9.13 Cwalehe, mutu ya kenile u ta olela mashala ao a nkomwana ni ku y'o a beya mwa sibaka se si tompeha, kwand'a mafulo, kw'a ta bulukelwa sicaba sa Isilaele, kuli ku ezwe ka ona mezi a ku tapisa bumaswe. Ku ikenisa ko ku ezezwa ku zwisa sibi. 10Mutu ya olela mashala u swanezi ku tapisa liapalo za hae, kono u ta ba ya si ka kena cwalo ku fitela manzibwana. Mulao wo, ki wa nako kaufela, kwa Maisilaele ni ku balicaba ba ba pila mwahal'a bona.
Ku swala situpu
11Mañi ni mañi ya swala situpu u ta nga mazazi a supile a nz'a si ka kena. 12U swanezi ku ikenisa ka mezi a kenile ka lizazi la bulalu ni la busupa, mi cwale u ta be a kenile. Kono h'a sa ikenisi ka lizazi la bulalu ni la busupa, h'a na ku kena. 13Ufi ni ufi ya swala situpu, mi a sa ikenisi, u ta ina cwalo a nz'a silafezi, kakuli h'a si ka selwa mezi a kenile. U silafaza Tende ya Kopano ya Muñ'a Bupilo, mi h'a sa na ku balelwa kwa batu ba Mulimu.
14Mutu h'a ka shwela mwa Tende, mañi ni mañi ya mwa Tende mo, kamba ya kena mwateñi, ni yena h'a si ka kena mane ku fite mazazi a supile. 15Piza kamba jaki kaufela ye si ka kwahelwa, ni yona i ta ba ye si ka kena. 16Kamukwaoswana, mañi ni mañi ya swala mutu ya bulailwe, kamba ya ishwezi feela fande, kamba ufi ni ufi ya swala lisapo la mutu kamba libita, ni yena u ta ba ya si ka kena ka mazazi a supile.
17Ka ku sa kena kwa mufuta wo, ku ngiwe kwa mashala a nkomwana ye ciselizwe ku zwisa libi, a beiwe mwa piza, mi ku seliwe mwateñi mezi a mande. 18Ka libaka la pili, mutu ya kenile a nge mutai wa hisopa, a u cupwe mwa mezi, mi a fafaze Tende, lika kamukana ni batu ba ba ne ba li mwateñi. Haili ka libaka la bubeli, mutu ya kenile a fafaze ka mezi mutu ya n'a sweli lisapo la mutu, situpu kamba libita. 19Ka zazi la bulalu ni la busupa, mutu ya kenile u swanezi ku fafaza ka mezi mutu ya si ka kena. Ka la busupa kihona a ta kenisa mutu yo, ha s'a tapisize liapalo za hae ni ku icubaela ka mezi. Cwale, lizazi ha li likela, mutu yo u ta ba ya kenile, ka mulao.
20Mañi ni mañi ya si ka kena, mi a sa ikenisi, u ta ina cwalo a si ka kena, kakuli h'a si ka seliwa mezi a kenisa. U silafaza Tende ya Kopano bwa Muñ'a Bupilo, mi h'a sa na ku balelwa kwa batu ba Mulimu. 21Mulao wo u tomezwi mina kuya kuile. Mutu ya fafaza mezi a kenisa ni yena u swanezi ku tapisa liapalo za hae. Ufi ni ufi ya swala mezi ao u ta ina cwalo a si ka kena ku fitela manzibwana. 22Sifi ni sifi se si swalwa ki mutu ya si ka kena, ni sona ha si si ka kena, ni mañi ni mañi ya si swala u ta ina cwalo a si ka kena ku fitela manzibwana.
Lozi Interconfessional Bible, Catholic Edition © Bible Society of Zambia, 2009.