Lipalo 20
20
Ze ezahalile kwa Kadeshi
(Mut 17.1-7)
1Mwa kweli ya pili, sicaba sa Isilaele kamukana sa taha mwa Lihalaupa la Zini, mi sa tibelela mwa Kadeshi. Miriame a shwa, mi a bulukwa hona mo.
2 #
Mut 17.1-7
Batu ne ba si na mezi, cwale ba t'o kubukana ku Mushe ni Aruni. 3Ba bilaela, ba li, “Ne i ka be i bile hande kabe ne lu shwezi fapil'a Tende ya Kopano bwa Muñ'a Bupilo, hamoho ni banabahabo luna Maisilaele. 4Mu lu tiselizeñi mwa lihalaupa le? Kanti n'e li kuli lu t'o shwela mwateñi ni limunanu za luna, nji? 5Mu lu zwiselizeñi mwa Egepita ku lu tisa mwa sibaka se si maswe cwana mo ku si na se si ka mela mwateñi? Ha ku na mabele, lifeiga, miselo ya veine, nihaili ligaraneti. Mane ha ku na nihaili mezi a ku nwa!” 6Mushe ni Aruni ba zwa fapil'a batu, mi ba y'o yema kwa munyako wa Tende ya Kopano. Ba boola, ba inamezi fafasi, mi liseli le li benya, ili le li supeza kuli Muñ'a Bupilo u teñi, la bonahala fapil'a bona.
7Muñ'a Bupilo a li ku Mushe, 8“Nopa mulamu o fapil'a Likwati la Bulikani, mi cwale wena ni Aruni mu kopanye sicaba kamukana. Hona fo, fapil'a bona kaufela, u laele licwe lani, mi li ta tisa mezi. Kamukwaocwalo, u ta zwiseza batu mezi mwa licwe, ili kuli bona ni limunanu za bona ba nwe!” 9Mushe a ya, mi a nopa mulamu, sina mw'a n'a laelezi Muñ'a Bupilo.
10Yena ni Aruni ba kopanya sicaba fapil'a licwe, mi Mushe a li, “Mu teeleze, mina bafetuheli! Kana lu ka mi zwiseza mezi mwa licwe le, nji?” 11#But 11.4 Cwale Mushe a nanula mulamu, a nata licwe habeli, mi kwa zwa mabubela a mezi. Batu kamukana ba nwa, ni limunanu cwalo.
12Kono Muñ'a Bupilo a kalimela Mushe ni Aruni, a li, “Kakuli ha mu si ka bonahaza maata a ka a kenile kwa batu ba Isilaele, ka tumelo ye tiile, ha mu na ku y'o ba fitisa mwa naha ye ni ba sepisize.”
13Zeo ne li ezahalezi mwa Meriba, ko ne ba bilaelezi batu ba Isilaele ku Muñ'a Bupilo, ni mw'a n'a boniselize kuli yena u kenile.
Mulena wa Edomo u hanisa Maisilaele ku fita
14Ha ba li mwa Kadeshi, Mushe a lumela linumwana ku mulena wa Edomo. Ba y'o li, “Manzwi a, ki a zwa ku luna banabahenu, ili ona masika a Isilaele. U ziba butata kaufela bo bu lu tahezi. 15Bo kukw'a luna ba ile kwa Egepita, ko lu il'o pila lilimo ze ñata. Maegepita ba ba nyandisize, ni luna cwalo. 16Lwa itilelela ku Muñ'a Bupilo kuli a lu tuse. A utwa sililo sa luna, mi a luma lingeloi, le li til'o lu zwisa mwa Egepita. Cwale lu mwa Kadeshi, munzi o kwa museto ni naha ya hao. 17Muñ'a ka, u lu lumelele ku fita mwa naha ya hao. Luna, ni mitapi ya luna, ha lu na ku keluha mwa nzila kamba ku ya kwa masimu a mina a likota za veine, mi ha lu na ku nwa mwa liliba za mina. Lu ta zamaya cwalo mwa likululu ku fitela lu zwa mwa naha ya hao.”
18Kono Maedomo ba alaba, ba li, “Ha lu lati kuli mu fite mwahal'a naha ya luna! Haiba mu ka eza cwalo, lu ka t'o mi lwanisa.”
19Batu ba Isilaele ba li, “Lu ta zamaya feela mwa likululu, mi haiba luna kamba likomu za luna li ka nwa kwa mezi a mina, lu ta lifa. Se lu bata feela ki ku fita.”
20Maedomo ba kutela, ba li, “Batili, ha lu lati!” Cwale ba zwa ni mpi ye maata ku y'o ba lwanisa. 21Kakuli Maedomo ne ba hanisa Maisilaele ku fita mwa naha ya bona, Maisilaele kiha ba fetuha, ba nga nzila i sili.
Lifu la Aruni
22Sicaba kamukana sa Isilaele sa zwa mwa Kadeshi, mi sa y'o fita kwa Lilundu la Hori. 23Hona mo, kwa museto wa Edomo, Muñ'a Bupilo a li ku Mushe ni Aruni, 24“Aruni h'a na ku y'o kena mwa naha ye ni sepisize ku i fa Maisilaele. U ta shwa kakuli bubeli bwa mina ne mu fetuhezi taelo ya ka kwa Meriba. 25Wena Mushe, isa Aruni ni mwan'a hae Eliazare kwa Lilundu la Hori. 26U tubule Aruni liapalo za buprisita, mi u li apese Eliazare. Aruni u ta y'o shwela hona koo.” 27Mushe a eza mw'a n'a laelezwi ki Muñ'a Bupilo. Ba kambama fa Lilundu la Hori, sicaba kamukana si nze si talimezi. 28#Mut 29.29; Lipa 33.38; Mul 10.6 Mushe a tubulisa Aruni liapalo za buprisita, mi a li apesa Eliazare. Aruni a shwela hona fo, fahalimw'a lilundu, mi Mushe ni Eliazare ba shetumuka. 29Ba sicaba kaufela ba ziba kuli Aruni u shwile, mi kaufel'a bona ba mu silisa mazazi a mashumi a malalu.
Lozi Interconfessional Bible, Catholic Edition © Bible Society of Zambia, 2009.