Lipalo 18
18
Misebezi ya baprisita ni Malivi
1Muñ'a Bupilo a li ku Aruni, “Wena, bana ba hao ba bashimani, ni ba mba ya hao, mu ta ba ni buikalabelo ka sifi ni sifi se si ka fosahala mwa Tende ya Kopano, ni buikalabelo kwa neku la musebezi wa buprisita. 2Kono mu tise bahabo mina, ba lusika lwa Livi, ba t'o sebeza ni mina ni ku mi tusa, wena ni bana ba hao ha mu nze mu sebeza fapil'a Tende ya Kopano. 3Ba swanezi ku peta liswanelo za bona ku wena ni ku ikalabela ka za mwa Tende, kono ba si ke ba sutelela kwa libyana ze kenile ze mwa Sibaka se si Kenile, kamba kwa katala. Haiba ba ka eza cwalo, bona hamoho ni wena mu ta bulaiwa. 4Ba ta sebeza ni mina, mi ba kondise misebezi ya bona kamukana mwa Tende, kono ya si ka lumelelwa a si ke a sebeza ni mina. 5Wena ni bana ba hao feela, ki mina mu ta eza misebezi ya mwa Sibaka se si Kenile ni ya mwa katala, ili kuli bunyemi bwa ka bu si ke bwa tahela hape batu ba Isilaele. 6Ki na ya ku ketezi Malivi, bahenu, mwahal'a Maisilaele kamukana, kuli ba be mpo ya hao. Ba sumekezwi na, kuli ba eze misebezi ya bona mwa Tende ya Kopano. 7Kono wena ni bana ba hao feela, ki mina mu ta eza liswanelo za mina kaufela za buprisita ze amana ni katala ni ze mwa Sibaka se si Kenile Hahulu. Lika ze, li mwa pababelo ya mina, kakuli ni mi file mpo ya buprisita. Mutu ufi ni ufi ya si ka lumelelwa u ta bulaiwa h'a ka sutelela kwa libyana ze kenile.”
Kabelo ya baprisita
8Muñ'a Bupilo a li ku Aruni, “U hupule kuli ni ku fa limpo ze nde kamukana ze ni fiwa ili ze sa ezwi litabelo za ku cisa. Ni ku fa zona, wena ni baikulu ba hao, li be kabelo ye abezwi mina kuya kuile. 9Kwa limpo ze kenile hahulu, ili ze sa ciswi fa katala, z'e li za hao ki ze: limpo za lico, limpo za ku zwisa libi, ni limpo za litifo. Sifi ni sifi se ni tisezwa ka mukwa wa sitabelo se si kenile, ki sa hao ni bana ba hao. 10U swanezi ku cela lika ze mwa sibaka se si tompeha, li ciwe feela ki banna. U li nge kuli ki ze kenile.
11“Fahalimw'a zeo, limpo kamukana ze ni fiwa ki Maisilaele li ta ba za hao. Ni li fa wena ni bana ba hao ba bashimani ni ba basizana kuya kuile. Mañi ni mañi ya kenile wa mba ya hao wa kona ku li ca.
12“Ni ku fa ze nde kaufela za kutulo ya pili ye ba ni fa Maisilaele ka silimo ni silimo, ili mafula a olive, waine ni lico cwalo. 13Kaufel'a zona ki za hao. Mañi ni mañi ya kenile wa mba ya hao wa kona ku li ca.
14 #
Malivi 27.28
“Sifi ni sifi, mwa Isilaele, se si ketezwi Muñ'a Bupilo ki sa hao.
15“Mweli kaufela, kamba folofolo ya maizibulo ye ba ni fa Maisilaele, ki ya hao. Kono u swanezi ku amuhela tifo ya ku t'o lekulula mweli kaufela, mi hape u amuhele tifo ya ku lekulula ni folofolo ya maizibulo kaufela ye si ka kena ka mulao. 16Bana ba ta lekululwa, ha ba se ba na ni kweli i liñwi. Ba lekululwe ka teko ye tomilwe, ya mali a muwaya-waya wa silivela a ketalizoho. 17Kono maizibulo a likomu, lingu ni lipuli, ao, h'a na ku lekululwa. Kaufel'a ona ki a ka, mi a swanezi ku eziwa litabelo. U fafaze mali a ona fa katala, mi u cise lisuzo la ona sina mpo ya lico, ili ya muunko o ni tabisa. 18Nama ya limunanu zeo ki ya hao mane ni sona sifuba ni silupi sa kwa silyo cwalo.
19“Ni fa wena, ni bana ba hao ba bashimani ni ba basizana, limpo ze ketilwe kamukana ze ni tisezwa ki Maisilaele, kuli li be za hao kuya kuile. Bo, ki bulikani bo bu si na ku sinyiwa ni kamuta, bo ni itamile ni wena hamoho ni baikulu ba hao.”
20Muñ'a Bupilo a li ku Aruni, “Ha u na ku fiwa liluwo lifi kapa lifi le li ka yoliwa, mi ha ku na kalulo ya naha ya Isilaele y'o ta abelwa. Na, Muñ'a Bupilo, ki na feela y'o tokwa.”
Kabelo ya Malivi
21 #
Malivi 27.30-33; Mul 14.22-29 Muñ'a Bupilo a li, “Ni file Malivi kalulo ya bulishumi kaufela ye ba ni fa batu ba Isilaele. Ye ki yona tifo ya musebezi wa bona wa ku tokomela Tende ya Kopano. 22Maisilaele ba si ke ba lika ku sutelela kwa Tende hape, kakuli ha ba ka eza cwalo ba ka ipatela mulatu o ka ba tiseza lifu. 23Mushe n'a na ni ku bulelela Malivi kuli, “Ku kala cwale, Malivi ba ta babalela Tende, mi ba be ni buikalabelo bo bu tezi ka yona. Wo ki mulao wa kamita, o ta tama ni baikulu ba mina. Malivi ha ba na ku ba ni liluwo le li ka yolwa mwa Isilaele. 24Ni ba file kalulo ya bulishumi ye ba ni ketezi Maisilaele, kuli i be lona liluwo la bona. Kikabakaleo ha ni ba bulelezi kuli ha ba na ku ba ni liluwo le li ka yolwa mwa Isilaele.”
Kabelo ya bulishumi
25Muñ'a Bupilo a fa Mushe litaelo. 26Mushe n'a na ni ku bulelela Malivi kuli, “Ha mu amuhela kalulo ya bulishumi kwa Maisilaele, y'a mi fa Muñ'a Bupilo kuli i be liluwo la mina, mu swanezi ku fitisa kabelo ya yona ya bulishumi ku Muñ'a Bupilo, i be mpo ya hae. 27Mpo ye, i ta ngiwa kuli i swana hande ni mpo ya lico ni ya waine ye nca, ili limpo ze zwiswa ki mulimi. 28Kamukwaocwalo, ni mina mu ta zwisa mpo ya Muñ'a Bupilo kwa likalulo za bulishumi kaufela, ze mu amuhela kwa Maisilaele. Ku ze mu amuhela, mu swanezi ku fa mpo ya Muñ'a Bupilo ku muprisita Aruni. 29Mu swanezi ku mu ketela ze nde ku ze mu amuhela. 30Cwale ha mu se mu fitisize kalulo ye nde, mwa kona ku ipulukela se si siyezi, sina mulimi h'a ipulukela se si siyezi ha s'a zwisize mpo ya hae. 31Mina ni mabasi a mina mu kona ku li cela kai ni kai, kakuli ki mupuzo wa mina ka musebezi o mu eza mwa Tende. 32Ha mu na ku beiwa mulatu ha mu li ca, haiba mu file pili Muñ'a Bupilo ze nde ka ku fitisisa. Mu si ke mwa silafaza limpo ze kenile za Maisilaele ka ku ca ze ñwi za limpo, pili mu si ka fitisa kalulo ye nde hahulu. Hakusicwalo mu ta bulaiwa.”
Lozi Interconfessional Bible, Catholic Edition © Bible Society of Zambia, 2009.