Lipalo 17
17
Mulamu wa Aruni
1Muñ'a Bupilo a li ku Mushe, 2“Bulelela batu ba Isilaele kuli ba ku fe milamu ye lishumi ka ye mibeli. O muñwi ni o muñwi u zwe ku mueteleli wa lusika lo luñwi ni lo luñwi. U ñole libizo la mutu ni mutu fa mulamu wa hae. 3Mi cwale, u ñole libizo la Aruni fa mulamu wa lusika lwa Livi. Ku be ni mulamu wa mueteleli wa lusika lo luñwi ni lo luñwi. 4U i beye mwa Tende ya Kopano fapil'a Likwati la Bulikani, fo ni kopanelanga ni mina. 5Ibehe, mulamu wa mutu ye ni ketile u ta mela. Ka mukwa wo, ni ta felisa lipilaelo ze sa feli za Maisilaele ba, ba ba bilaela ku wena.”
6Cwale Mushe a bulelela Maisilaele, mi yo muñwi ni yo muñwi wa baeteleli ba bona a mu fa mulamu u li muñwi mwa lusika ni lusika. Ya ba milamu ye lishumi ka ye mibeli hamoho, mi mulamu wa Aruni wa kopanywa ni yona. 7Cwale Mushe a beya milamu yeo mwa Tende, fapil'a Likwati la Muñ'a Bupilo la Bulikani.
8 #
Maheb 9.4
Habusa, Mushe h'a y'o kena mwa Tende, a bona kuli mulamu wa Aruni, o n'o yemi bakeñisa lusika lwa Livi, n'o shoshezi. N'o fumbatile, u tubuzi, mi n'o s'o beile miselo ye buzwize ya alumondi! 9Mushe a nga milamu kaufela, mi a i supeza Maisilaele. Ba bona se ne si ezahezi, mi mueteleli yo muñwi ni yo muñwi a nga mulamu wa hae. 10Muñ'a Bupilo a li ku Mushe, “Kutiseza mulamu wa Aruni fapil'a Likwati la Bulikani. U ta bulukelwa kuli u be temuso kwa Maisilaele ba bafetuheli kuli ba ta shwa ha ba sa tuheli lipilaelo za bona.” 11Mushe a eza mw'a n'a laelezi Muñ'a Bupilo.
12Batu ba Isilaele ba li ku Mushe, “Fohe, ki ona mafelelezo a luna! 13Haiba mañi ni mañi ya sutelela feela kwa Tende ya Kopano a swanela ku shwa, hakulicwalo kaufel'a luna lu shwile!”
Lozi Interconfessional Bible, Catholic Edition © Bible Society of Zambia, 2009.