Lipalo 16
16
Petuhelo ya Kora, Datani ni Abirami
1 #
Litu 45.18-20;
Juda 11
Kora, mwan'a Izari wa Mulivi, ili wa mushiku wa Kohati, ni ba balalu ba lusika lwa Rubeni, ili Datani ni Abirami bana ba Eliabi, ni Ono mwan'a Peleti, ba ba ni mandabala. 2Ba fetuhela Mushe. Kwa bona kwa t'o kena ni Maisilaele ba bañwi ba ba eza mianda ye mibeli ni mashumi a ketalizoho, ili baeteleli ba ba zibahala, ba ba ne ba ketilwe ki sicaba. 3Ba t'o kopana fapil'a Mushe ni Aruni, mi ba li ku bona, “Se mu na ni muipo hahulu mina! Batu ba sicaba kaufela ki ba Muñ'a Bupilo, mi Muñ'a Bupilo u inzi ni luna kamukana. Kiñihe cwale, wena Mushe ha u ipeya fahalimw'a sicaba sa Muñ'a Bupilo?”
4Mushe h'a utwa cwalo a ikwiseza fafasi, mi a lapela. 5Cwale a li ku Kora ni balateleli ba hae, “Kamuso kakusasa Muñ'a Bupilo u ta lu supeza ye li wa hae. U ta lumelela kuli yena mutu yo y'a iketezi, a mu sutelele kwa katala. 6Wena ni balateleli ba hao mu nge mañetana a mulilo. 7Kamuso kakusasa, mu beye mashala a cisa ni insense mwateñi, mi mu li ise kwa katala. Cwale kihona lu ta bona kuli ki mañi ku luna ya ketilwe ki Muñ'a Bupilo. Mina Malivi ki mina ba ba ikuhumusa hahulu!”
8Mushe a zwelapili ku bulelela Kora, a li, “Mu teeleze, mina Malivi! 9Kana mu hupula kuli ki nto ye nyinyani, Mulimu wa Isilaele h'a mi ketile mwa sicaba kaufela, ili kuli mu kone ku mu sutelela, mu eze misebezi ya mina mwa Tende ya Kopano bwa Muñ'a Bupilo, ni ku sebeleza sicaba? 10U lumelezi mina ni Malivi ba bañwi kaufela ku mu sutelela, mi cwale mu bata ku ikungela ni buprisita cwalo! 11Ha mu bilaela ka Aruni, ki niti kuli mu lwanisa Muñ'a Bupilo ni kuli mina ni balateleli ba mina mu bafetuheli.”
12Cwale Mushe a lumela Datani ni Abirami, kono bona ba li, “Ha lu na ku taha! 13Kikuli ha ku likani ha u lu zwisize mwa naha ya Egepita ye nunile ku t'o lu bulaela mwa lihalaupa mo, nji? Mi hape u sa ekeza ku ipeya mulen'a luna! 14Kaniti ha u si ka lu tisa mwa naha ye nunile kamba ku lu fa litima ni masimu a likota za veine kuli li be liluwo la luna, mi cwale u bata ku lu puma. Ha lu tahi koo!”
15Mushe a nyema, mi a li ku Muñ'a Bupilo, “U si ke wa amuhela mpo ifi ni ifi ye ka tiswa ki batu ba. Ha ni si ka foseza nihaili a li muñwi ku bona. Ha ni si ka nga nihaili ili ñwi ya limbongolo za bona.”
16Mushe a li ku Kora, “Kamuso, wena ni balateleli ba hao ba mianda ye mibeli ni mashumi a ketalizoho mu te kwa Tende ya Kopano. Aruni ni yena u ta ba teñi. 17Yo muñwi ni yo muñwi wa mina u ta nga liñetana la hae la mulilo, a beye insense mwateñi, mi a li fitise fapil'a Muñ'a Bupilo.” 18Cwale mutu ni mutu a nga liñetana la hae la mulilo, a beya mashala a tuka ni insense mwateñi, mi a y'o yema kwa munyako wa Tende ya Kopano hamoho ni Mushe ni Aruni. 19Cwale Kora a kopanya sicaba kaufela, mi ba yema ba talimani ni Mushe ni Aruni kwa munyako wa Tende. Kapili-pili liseli le li benya, ili le li supeza kuli Muñ'a Bupilo u teñi, la bonahala kwa sicaba kamukana. 20Mi Mun'a Bupilo a li ku Mushe ni Aruni, 21“A mu sutelele kwahule ni batu ba, kakuli ni ka tuha ni ba yundisa hona cwale fa.”
22Kono Mushe ni Aruni ba inamela fafasi, mi ba li, “Wena Mulimu, ki wena simuluho ya bupilo kaufela. Haiba mutu a li muñwi feela a eza sibi, kikuli u ta nyemela sicaba kaufela, nji?”
23Muñ'a Bupilo a li ku Mushe, 24“Bulelela batu kuli ba zwe kwa litende za bo Kora, Datani ni Abirami.”
25Cwale Mushe a sindeketwa ki baeteleli ba Isilaele, mi ba ya ku Datani ni Abirami. 26A li kwa batu, “A mu zwe kwa litende za batu ba, ba ba maswe, mi mu si ke mwa swala sifi ni sifi s'e li sa bona. Hakusicwalo mu ka yundiselezwa hamoho kabakala libi za bona.” 27Kiha ba se ba zwa kwa litende za bo Kora, Datani ni Abirami.
Datani ni Abirami ne ba zwile mi ne ba yemi mwa minyako ya litende za bona hamoho ni basali ni bana ba bona. 28Mushe a li kwa batu, “Cwale, kihona mu ta ziba kuli Muñ'a Bupilo u ni lumile ku t'o eza lika ze kamukana, ni kuli h'a si na ya iketezi ku li eza. 29Haiba batu ba, ba ka ishwela feela ku si na tupa ye zwa ku Mulimu, fohe mu zibe kuli Muñ'a Bupilo h'a si ka ni luma. 30Kono haiba Muñ'a Bupilo a ka eza makazo ye si ka bonahala kale kuli mane lifasi li atame, li ba mizeleze ni ze ba luile kamukana, ba yelele mwa naha ya ba ba shwile ba nze ba pila, fohe mu ta ziba kuli batu ba, ba hanile Muñ'a Bupilo.
31A sa feza feela ku bulela, mubu f'a n'a yemi Datani ni Abirami wa pazuha. 32Wa ba miza ni mabasi a bona, hamoho ni balateleli ba Kora ni tutu ya bona kaufela. 33Cwale ba ya mwa lifasi la ba ba shwile ba nze ba pila, hamoho ni tutu ya bona. Lifasi la ba kwahela, mi ba yelela. 34Batu ba Isilaele kamukana ba ba ne ba li teñi fo, ba saba ha ba utwa ku lila kwa bona, mi ba huwa, ba li, “Saba! Ni luna lu ka swana lwa mizwa ki lifasi!”
35Cwale, Muñ'a Bupilo a lumela mulilo o tuka, mi wa t'o cisa batu ba mianda ye mibeli ka mashumi a ketalizoho ba ba ne ba tisize insense.
Mañetana a mulilo
36Cwale Muñ'a Bupilo a li ku Mushe, 37“Bulelela Eliazare, mwan'a muprisita Aruni, ku zwisa mañetana a mulilo a kopa, mwahal'a litupu za ba ba cisizwe, mi a y'o sulelela mulola o mwa mañetana ku sili, kakuli mañetana ao a kenile. 38A bile a kenile h'a tiswa fapil'a katala ka Muñ'a Bupilo. Cwale, u nge mañetana a batu ba, ba ba bulailwe kabakala libi za bona. U a tule ka bupapati bo busisani, mi u a eze sikwahelo sa fa katala. I ta ba temuso kwa batu ba Isilaele.” 39Cwale Muprisita Eliazare a nga mañetana a mulilo, mi a' tula ku eza masenge a masisani a sikwahelo sa katala. 40Kezo ye, ya ba temuso kwa Maisilaele kuli ha ku na, ye ne si wa lusika lwa Aruni, ya n'a ka taha kwa katala ku t'o cisa insense fapil'a Muñ'a Bupilo. Hakusicwalo n'a ka bulaiwa sina Kora ni batu ba hae. Zeo kaufela za ezahala sina mw'a n'a laelezwi Eliazare ki Muñ'a Bupilo ka Mushe.
Aruni u pilisa batu
41Habusa, sicaba kaufela sa bilaela ka Mushe ni Aruni, mi sa li, “Mu bulaile batu ba bañwi ba Muñ'a Bupilo.” 42Ha ba se ba kopani kaufela ku t'o bilaela ku Mushe ni Aruni, ba talima kwa Tende ya Kopano, mi ba bona kuli n'e kwahezwi ki lilu, ni kuli liseli le li benya, le ne li bonisa kuli Muñ'a Bupilo u mwateñi, ne li bonahala. 43Mushe ni Aruni ba y'o yema fapil'a Tende. 44#But 18.20-25 Mi Muñ'a Bupilo a li ku Mushe, 45“Mu zwe kwa batu ba! Ni ka tuha ni ba bulaela hona foo!”
Bona ba boola, ba inamela fafasi. 46Mi Mushe a li ku Aruni, “Nga liñetana la hao la mulilo, beya mwateñi mashala a tuka a zwa fa katala, mi u beye insense fa mashala. Cwale u akufele kwa batu, mi u y'o eza sebelezo ya ku ba kenisa. Akufa! Bunyemi bwa Muñ'a Bupilo bu se bu kalile, mi ziezi i se i keni.” 47Aruni a lumela, a nga liñetana la hae, mi a matela mwahal'a batu ba ba ne ba kopani. H'a bona kuli kozi n'e s'e kalisize, a beya insense fa mashala, mi a eza sebelezo ya ku kenisa batu. 48Kezo yeo ya felisa kozi, mi yena a siyala a yemi mwahal'a ba ba pila ni ba ba shwile. 49Palo ya ba ba ne ba shwile, n'e li likiti ze lishumi ka ze ne ni mianda ye supile, ku sa balwi ba ba ne ba timezi mwa petuhelo ya Kora. 50Kozi ha i se i felile, Aruni a kutela ku Mushe kwa munyako wa Tende ya Kopano.
Lozi Interconfessional Bible, Catholic Edition © Bible Society of Zambia, 2009.