Lipalo 15
15
Milao bakeñisa litabelo
1Muñ'a Bupilo a fa Mushe litaelo. 2Mushe n'a na ni ku bulelela batu litaelo zeo ze tatama kuli batu ba Isilaele ba li buluke mwa naha y'a n'a y'o ba fa. 3“Poho, ngu, kapa puli i kona ku ezezwa Muñ'a Bupilo sitabelo sa ku cisa, sa ku tiisa buitamo, sa mpo feela, kamba mpo ya kwa mikiti ya mina ya kamita ya bulumeli. Muunko wa litabelo za lico, u tabisa Muñ'a Bupilo. 4Mañi ni mañi ya ezeza Muñ'a Bupilo sitabelo se si cwalo, u swanezi ku tisa ni mpo ya lico, ili likomoki ze peli za bupi bo bu lubilwe ka mafula a olive a likana tukomoki to tubeli. 5Ka sitabelo se siñwi ni se siñwi sa ku cisa, u swanezi ku tisa likomoki ze peli za waine ka ngunyana ye ñwi ni ye ñwi. 6Ha ku ezwa sitabelo sa poho ya ngu, ku tiswe bupi bo bu taza sizuma, ni tukomokinyana to tulalu twa mafula a olive. Ze, li fitiswe sina mpo ya lico. 7Ku tiswe hape ni likomoki ze talu za waine. Muunko wa litabelo zeo u tabisa Muñ'a Bupilo. 8Mu ezeze Muñ'a Bupilo sitabelo sa poho sa ku cisa, kamba sitabelo sa ku tiisa buitamo, kamba sitabelo sa buitumelo. 9Ku tiswe ni nubu ya mabele, ni bupi bo bu taza likomoki ze silezi, bo bu lubilwe ka mafula a olive, a taza tukomoki to tu ketalizoho. 10Ku tiswe ni likomoki ze ne za waine. Muunko wa sitabelo seo u tabisa Muñ'a Bupilo.
11“Ki zona ze ta fitiswa ha ku ezwa sitabelo sa poho ye ñwi, i ka ba sa poho ya ngu, sa ngunyana, kamba sa puli. 12Haiba ku fiwa limunanu ze peli kamba ku fita zeo, limpo ze ka tiswa hamoho ni zona li ekezwe ka mo ku tomezwi. 13Ya li Muisilaele kaufela ka sipepo u swanezi ku eza cwalo h'a tisa mpo ya sitabelo sa lico sa ku cisa, sa muunko o tabisa Muñ'a Bupilo. 14Mi haiba, ka nako ifi kamba ifi, mulicaba ya yahile ni mina, i ka ba mupoti kamba ya inelezi, a tisa limpo za lico, za muunko o tabisa Muñ'a Bupilo, u swanezi ku zamaya ka yona milao yeo. 15Mwa linako ze taha kaufela, yona milao yeo, ya mi tama hamoho ni balicaba ba ba yahile ni mina. Mina ni bona mwa swana fapil'a Muñ'a Bupilo. 16#Malivi 24.22 Mina ni bona mu zamaiswa ki milao ye swana.”
17Muñ'a Bupilo a fa Mushe litaelo. 18Mushe n'a na ni ku zibisa batu kuli batu ba Isilaele ba li buluke mwa naha y'a n'a ta ba fa yona. 19“Ha ku ciwa lico ze limilwe mwateñi, ze ñwi za zona li swanezi ku beiwa kwatuko ku ba mpo ye ketezwi feela Muñ'a Bupilo. 20Mwamulaho a kutulo ya silimo ni silimo, sinkwa si li siñwi sa linkwa za makalelo ze ezizwe ka lico ze nca si be mpo ye ketezwi Muñ'a Bupilo. Sinkwa seo si swanezi ku fitiswa ka mukwa o swana sina mpo ye ñwi ye mu fa kwa mabele a mu pula. 21Ka linako kamukana ze taha, mpo ye i swanezi ku fiwa Muñ'a Bupilo, ili liñende la pili kwa bupi bo bu lubilwe mwamulaho a kutulo.
22“Kono mutu wa kona ku palelwa, isiñi ka bomu, ku buluka o muñwi wa milao ye y'a n'a filwe Mushe ki Muñ'a Bupilo. 23Hape, ka linako ze sa taha sicaba sa kona ku palelwa ku eza lika kamukana z'a laezi Muñ'a Bupilo ka Mushe. 24Lifoso zeo ha li eziwa ka ku sa ziba kwa sicaba, batu ba swanezi ku tisa poho ya sitabelo sa ku cisa, ili sa muunko o tabisa Muñ'a Bupilo. Ba tise hape ni limpo za mabele ni za waine. Ba si ke ba libala ku ekeza fateñi poho ya puli, ili mpo ya sitabelo sa ku zwisa libi. 25Muprisita u ta eza sebelezo ya ku kenisa sicaba, mi ba ta swalelwa, kakuli foso i n'e si ya ka bomu, mi hape ba tiselize Muñ'a Bupilo mpo ya bona ya sitabelo sa ku zwisa libi, ili sitabelo sa lico. 26Sicaba sa Isilaele kamukana, ni balicaba ba ba yahile ni bona, ba ta swalelwa kakuli mañi ni mañi n'a keni mwa foso yeo.
27 #
Malivi 4.27-31
“Haiba mutu a ka eza sibi, isiñi ka bomu, u swanezi ku tisa nkomwana ya puli ya silimo si li siñwi, ili ya sitabelo sa ku zwisa libi. 28Muprisita u ta ezeza sebelezo ya ku kenisa mutu yo kwa sibi sa hae, fapil'a Muñ'a Bupilo, mi u ta swalelwa. 29Mulao wo u sebeza ku mañi ni mañi ya eza sibi isiñi ka bomu, a ka ba Muisilaele ka sipepo, kamba mulicaba y'a s'a yahelezi.
30“Kono ufi ni ufi ya eza sibi ka bomu, a ka ba Muisilaele ka sipepo kamba mulicaba, yo, u nyaziseza Muñ'a Bupilo, mi u ta bulaiwa. 31U hanile s'a bulezi Muñ'a Bupilo, mi u tuzi o muñwi wa milao ya hae ka bomu. Ki yena ya na ni buikalabelo ka lifu la hae.”
Mutu ya tuzi mulao wa Lizazi la Pumulo
32Ka nako ye ñwi, Maisilaele ha ne ba sa li mwa lihalaupa, ba fumana mutu ya n'a lwalela likota ka la Pumulo. 33Ba mu isa ku Mushe ni Aruni ni sicaba kaufela. 34Ba mu fa balibeleli kakuli ne ba sa zibi mw'a n'a ka ezezwa. 35Cwale Muñ'a Bupilo a li ku Mushe, “Mutu yo u swanezi ku bulaiwa. Sicaba kamukana si y'o mu pobaula ka macwe kwand'a mafulo.” 36Cwale sicaba kaufela sa mu zwisa mwa mafulo, mi sa y'o mu bulaya ka macwe, mi a shwa sina mw'a n'a laelezi Muñ'a Bupilo.
Milao bakeñisa minganja
37Muñ'a Bupilo a fa Mushe litaelo. 38#Mul 22.12 Mushe n'a na ni ku bulelele batu ba Isilaele kuli, “Mu eze minganja mwa maneku kaufela a liapalo za mina, mi mu tame ku o muñwi ni o muñwi kahala ka katala. Mu swanezi ku eza cwalo ka linako kaufela ze sa taha. 39Minganja yeo i ta ba yona ye ta mi hupulisanga milao ya ka, mi nako kaufela ha mu i bona, mu ta hupula ni ku buluka litaelo za ka kaufela. Fohe, ha mu na ku ni fulalela ni ku latelela litakazo za mina. 40I ta mi hupulisa ku buluka litaelo za ka kaufela, mi mu ta ba batu ba ka luli. 41Ki na Muñ'a Bupilo, Mulimu wa mina. Ni mi zwisize mwa Egepita ku t'o ba Mulimu wa mina. Ki na Muñ'a Bupilo.”
Lozi Interconfessional Bible, Catholic Edition © Bible Society of Zambia, 2009.