Lipalo 14
14
Batu ba tongoka
1Batu ba huwa busihu kaufela ba zielehile. 2Ba tongoka ka Mushe ni Aruni, mi ba li, “Ne i ka be i bile hande hahulu kabe lu shwezi mwa Egepita, kamba hona mwa lihalaupa mo! 3Muñ'a Bupilo u lu isezañi mwa naha yeo? Lu ta bulaiwa mwa ndwa, mi basali ni ba bana ba luna ba ta hapiwa. Kana ne ku si ke kwa ba hande ku kutela kwa Egepita, naa?” 4Cwale ba ambolisana, ba li, “A lu keteñi mueteleli, mi lu kutele kwa Egepita!”
5Cwale bo Mushe ni Aruni ba boola fafasi fapil'a batu kamukana. 6Mi Joshua mwan'a Nuni, ni Kalebu mwan'a Jefune, ili ba bañwi ba matwela bani, ba pazula liapalo za bona kaufela kabakala maswabi. 7Mi ba li kwa batu, “Naha ye lu il'o twela ki ye nde ka ku fitisisa. 8Haiba Muñ'a Bupilo a tabiswa ki luna, u ta lu isa mwateñi ni ku y'o lu fa naha yeo ye nde, ye nunile. 9#Maheb 3.16 Mu si ke mwa fetuhela Muñ'a Bupilo, mi hape mu si ke mwa saba batu ba ba yahile mwateñi. Lu ta ba tula ka bunolo. Muñ'a Bupilo u na ni luna, mi s'a bulaile milimu ye n'e ba sileleza. Cwalehe, mu si ke mwa saba.” 10Sicaba kaufela ne si fumbela ku ba pobaula ka macwe kono, kapili-pili, batu ba bona liseli le li benya le li bonisa kuli Muñ'a Bupilo u mwa Tende ya Kopano.
Mushe u lapelela sicaba
11Muñ'a Bupilo a li ku Mushe, “Batu ba, ba ka nga nako ye kuma kai ba nze ba ni nyefula? Ku ta ba nga nako ye kuma kai ba nze ba hana ku ni sepa, niha ni ezize limakazo ze ñata mwahal'a bona? 12Ni ta ba lumela butuku bo bu yambukela, bu ba bulaye, kono wena ni ta ku eza musimululi wa sicaba se situna hahulu, se si na ni maata ku ba fita!”
13 #
Mut 32.11-14
Kono Mushe a li ku Muñ'a Bupilo, “U zwisize batu ba mwa naha ya Egepita ka maata a hao. Maegepita ba ta utwa s'o ezize kwa batu ba hao. 14Ba ta si bulelela batu ba ba pila mwa naha ye. Batu ba, ba se ba utwile kale kuli wena, Muñ'a Bupilo, u mwahal'a luna, ni kuli u bonahala hande lilu la hao ha li yema fahalimw'a luna, ni kuli wa lu etelela mwa lilu ka nako ya musihali, ni ka mulilo ka nako ya busihu. 15Cwale haiba u ta bulaya batu ba hao kaufel'a bona ka nako i liñwi, macaba a' s'a utwile kabubo ka hao a ka liñi? 16Ba ta bulela kuli u bulaezi batu ba hao mwa lihalaupa, kakuli u palezwi ku y'o ba fitisa mwa naha y'o n'o ba sepisize yona. 17Cwalehe, Muñ'a Bupilo, na ku lapela, u lu bonise maata a hao, mi u eze s'o sepisize, ha n'o ize, 18#Mut 20.5-6; 34.6-7; Mul 5.9-10; 7.9-10 ‘Na, Muñ'a Bupilo ha ni nyemi kapili, mi ni bonisa lilato le lituna ni busepahali cwalo. Ni swalela sibi ni petuhelo. Kono ha ni na ku palelwa ku nata bana ni baikulu, ku y'o fita mwa lusika lwa bulalu ni lwa bune, bakeñisa libi za bashemi ba bona.’ 19Na ku lapela. Swalela sibi sa batu ba, ka butuna bwa lilato la hao, le li sa fetuhi, sina ha n'o nz'o ba swalela ha ba sa li ba zwa mwa Egepita.”
20Muñ'a Bupilo a alaba, a li, “Ni ta ba swalela sina ha u kupile. 21#Maheb 3.18 Kono ni mi sepisa, na ya pila, ni ka kanya ya ka ya ye talize lifasi! 22Ha ku na wa ku bona batu ba ya ta pila, mane a be a y'o kena mwa naha yeo. Ba boni ku benya kwa liseli le li supa kuli ni teñi, ni limakazo ze ni ezize mwa Egepita ni mwa lihalaupa, kono ba likile buiswalo bwa ka hape ni hape, mi ba hanile ku ni utwa. 23Ha ba na ku y'o kena mwa naha ye ni sepisize bo kukw'a bona. Ha ku na ni yo mukana wa ba ba ni hanile ya ka y'o kena mwa naha yeo. 24#Josh 14.9-12 Kono kakuli mutang'a ka Kalebu u na ni maikuto a sili, mi u zwezipili ku ni kuteka, ni ka y'o mu fitisa mwa naha y'a il'o twela, mi baikulu ba hae ba ta luwa naha yeo. 25Ba ta luwa mabala mo ku yahile Maamaleki ni Makana nako ye. Kamuso u kute, mi u ye mwa lihalaupa le li kwa neku la Liwate la Mataka.”
Muñ'a Bupilo u shapa batu ka ku tongoka
26Muñ'a Bupilo a li ku Mushe ni Aruni, 27“Batu ba, ba ba maswe, ba ta nga nako ye kuma kai ba nze ba ni tongoka? Lipilaelo ze, ni se ni li utwile hañata! 28Cwale u ba taluseze kalabo ye, u li, ‘Ka na, ya pila, na konka kuli ni ta mi ezeza feela sona se mu kupile. Ni bulezi, na, Muñ'a Bupilo. 29#Maheb 3.17 Mu ta shwa, mi litupu za mina li ta hasanela mwa lihalaupa mo. Kakuli mu bilaezi ka na, h'a yo, ya na ni lilimo ze fitelela mashumi a mabeli, ya ta y'o kena mwa naha. 30Ni mi sepisize kuli mu ta y'o yaha mwateñi, kono ha ku na wa ku mina ya ta y'o fita mwateñi, konji Kalebu ni Joshua. 31Mu ize bana ba mina ba ta hapiwa, kono na, ni ta ba isa mwa naha ye mu hanile, mi i ta ba naha ya bona. 32Mu ta shwela hona mo mwa lihalaupa. 33#Lik 7.36 Bana ba mina ba ta ba bayambaeli mwa lihalaupa ka lilimo ze mashumi a mane, mi ba ta nyandiswa ki ku sa sepahala kwa mina, ku fitela wa mafelelezo ku mina a shwa. 34Mu ta lwala mulatu wa sibi sa mina ka lilimo ze mashumi a mane. I ta ba silimo mutumbi ka lizazi le liñwi ni le liñwi la mazazi a mashumi a mane a ne mu tatuba naha. Kihona mu ta ziba kuli na, ha ni mi lwanisa ku ba cwañi?’ 35Na konka luli kuli ni ta eza cwalo ku mina, batu ba ba maswe, ba ba kopanezi ku ni lwanisa. Yo muñwi ni yo muñwi wa mina u ta shwela hona mwa lihalaupa mo. Na, Muñ'a Bupilo, ni bulezi.”
36Banna b'a n'a lumile Mushe ku y'o twela naha ba tisize piho ya buhata, ye tahiselize batu ku tongoka Muñ'a Bupilo. 37Mi cwale u ba natile ka butuku, mi ba shwile. 38Kwa matwela ba lishumi ni ba babeli ku bandukile feela Joshua ni Kalebu.
Maisilaele ba lika lwa pili ku y'o lwanisa naha
(Mul 1.41-46)
39Mushe ha s'a bulelezi Maisilaele kamukana s'a n'a bulezi Muñ'a Bupilo, ba lila hahulu. 40Habusa, i sa li kakusasa, ba funduka ku y'o lwanisa naha ya malundu, ba li, “Cwale lu itukisize ku ya mwa sibaka s'a lu bulelezi Muñ'a Bupilo. Lwa lumela kuli lu ezize sibi.”
41Kono Mushe a li, “Cwale, kiñihe ha mu sa utwi taelo ya Muñ'a Bupilo? Ha ku na ku konda! 42Mu si ke mwa ya! Muñ'a Bupilo h'a yo ku mina, mi lila za mina li ta mi tula. 43Ha mu ka talimani ni Maameleki ni Makanana, mu ta shwela mwa ndwa. Muñ'a Bupilo h'a na ku ba ni mina, kakuli mu mu fulalezi.”
44Nihakulicwalo ba tundamena ku ya mwa naha ya malundu, nihaike Mushe n'a siyezi mwa mafulo. Mane ni lona Likwati la Bulikani ne li si ka ya. 45Cwale Maameleki ni Makanana ba ba ne ba yahile mwateñi ba ba lwanisa, mi ba ba tula. Ba ba lelekisa mane ku y'o fita kwa Horoma.
Lozi Interconfessional Bible, Catholic Edition © Bible Society of Zambia, 2009.