Lipalo 13
13
Matwela
(Mul 1.19-33)
1Muñ'a Bupilo a li ku Mushe, 2“Keta mueteleli a li muñwi mwa lusika ni lusika kwa masika kaufela a lishumi ka a mabeli, mi u ba lume ku y'o twela naha ya Kanana, ye ni fa Maisilaele.” 3Mushe a lumela, mi ha ba li mwa Lihalaupa la Parani a luma baeteleli ba. 4A luma Shamua mwan'a Zakuri wa lusika lwa Rubeni, 5Shafati mwan'a Hori wa lusika lwa Simioni, 6Kalebu mwan'a Jefune wa lusika lwa Juda, 7Igali mwan'a Josefa wa lusika lwa Isakare, 8Hoshea mwan'a Nuni wa lusika lwa Eferaimi, 9Palati mwan'a Rafu wa lusika lwa Benjamine, 10Gadiele mwan'a Sodi wa lusika lwa Zebuloni, 11Gadi mwan'a Susi wa lusika lwa Josefa ili Manase, 12Amiele mwan'a Gemali wa lusika lwa Dani, 13Seturi mwan'a Mikaele wa lusika lwa Asere, 14Nahabi mwan'a Vofusi wa lusika lwa Nafetali, 15ni Geuele mwan'a Maki wa lusika lwa Gadi.
16Ba, ki bona matwela b'a n'a lumile Mushe ku y'o twela naha. A cinca libizo la Hoshea mwan'a Nuni. A mu biza Joshua.
17Mushe h'a ba luma, a li ku bona, “Mu libe kwa mutulo, kwa neku la mboela wa naha yeo, mi mu y'o zwelapili ku kena mwa naha ya malundu. 18Mu y'o bona kamaba ki naha ye cwañi, ku yahile batu ba ba kai mwateñi, ni maata a bona a kuma kai. 19Mu bone ni kuli ki naha ye nde kamba ye maswe, ni kuli batu ba mwateñi ba ipilela mwa minzi feela kamba ki mwa minzi ye mwa makwakwa. 20Mu bone haiba ki naha ye nunile, ni kuli ki mwahal'a likota kamba cwañi. Mu bone kuli ha mu kuta, mu tahe ni miselo ye mela mwateñi.” I n'e li nako ya ku buzwa kwa veine.
21Cwale batu bao ba ya kwa mutulo, mi ba y'o twela naha, ku kalela kwa Lihalaupa la Zini, le li kwa mboela mane ku y'o fita kwa Rehobo, ili fakaufi ni nzila ya Hamati, kwa mutulo. 22Ba kala pili ku ya kwa neku la mboela wa naha, mi ba y'o fita kwa Heberoni ko ne ku yahile mishiku ya Akimani, Sheshai ni Talemai, baikulu ba mushobo wa Anaki, ili batu ba bakima ba batelele. Heberoni n'o s'o na ni lilimo ze supile ha ku tomiwa Zoani mwa Egepita. 23Ba t'o fita mwa Musindi wa Eshikoli, mi hona mo ba puma mutai wa kota ya veine o n'o na ni sikocela si li siñwi. Ne si li bukiti hahulu, mane sa lwalwa ki banna ba babeli fa mushelu. Hape ba taha ni ligaraneti ni lifeiga. 24Sibaka seo sa bizwa Musindi wa Eshikoli kabakala sikocela sa veine se ne ba koyozi Maisilaele mwateñi.
25Ha ba se ba twezi naha ka mazazi a mashumi a mane, ba kutela. 26Ba taha ku Mushe, Aruni, ni sicaba sa Maisilaele kaufela mwa Kadashi, ili mwa Lihalaupa la Parani. Ba t'o biha ze ne ba boni, ni ku ba supeza miselo ye ne ba tile ni yona. 27Ba bulelela Mushe, ba li, “Lu il'o twela naha k'o n'o lu lumile. Ki naha ye nde, ye nunile, mi ye ñwi ya miselo ya yona ki ye. 28Kono batu ba ba yahile mwateñi ba maata, mi minzi ya bona ki ye mituna ye silelelizwe ka makwakwa. Se si maswe ni ku fita ki ku y'o bona baikulu ba batu ba batuna bao. 29Maameleke ba pila kwa mboela wa naha. Mahiti, Majebusi ni Maamori ba pila mwa naha ya malundu. Makanana, bona, ba pila kwatuko a liwate ni kwatuko a Nuka ya Jordani.”
30Kalebu a kuzisa batu ba ba ne ba bilaela ka Mushe, mi a li, “Lu swanezi ku lwana hona fa, lu hape naha. Lu tiile mi lwa kona ku i tula.”
31Kono batu ba ba ne ba ile ni Kalebu ba li, “Batili, ha lu na maata a ku lwana. Batu ba teñi ba tiile hahulu ku lu fita.” 32Cwale ba hasanya taba ya buhata mwahal'a Maisilaele ka za naha ye ne ba il'o twela. Ba li, “Mane naha yeo ha i koni ku melisa lico ze kona ku pilisa ba ba yahile mwateñi. Mañi ni mañi ye lu boni n'e li yo mutelele hahulu. 33#Sim 6.4 Mane lu il'o bona batu ba batuna hahulu, ili baikulu ba Anaki. Lwa ikutwa lu swana sina limpasu kwa bunyinyani fapil'a bona, mi kihona mo ne ba lu bonela ni bona!”
Lozi Interconfessional Bible, Catholic Edition © Bible Society of Zambia, 2009.