Lipalo 12
12
Miriame u utwiswa butuku
1Mushe n'a nyezi musali wa Muetiopia, mi Miriame ni Aruni ba mu nyaza ka taba yeo. 2Ba li, “Kana Muñ'a Bupilo u bulezi feela ka Mushe, nji? Kikuli h'a si ka bulela ni ka luna cwalo?” Muñ'a Bupilo a utwa ze ne ba bulela. 3#Litu 45.4 Mushe n'e li mutu ya n'a ishuwile hahulu ku fita mutu ufi ni ufi mwa lifasi.
4Kapili-pili Muñ'a Bupilo a li ku Mushe, Aruni ni Miriame, “Ni bata kuli mwa bulalu bwa mina mu ye kwa Tende ya Kopano.” Ba ya. 5Mi Muñ'a Bupilo a taha mwa lilu. A t'o yema kwa munyako wa Tende, mi a biza, a li, “Aruni! Miriame!” Bubeli bwa bona ba sutelela kwapili. 6Mi Muñ'a Bupilo a li, “Cwale mu teeleze se ni bulela! Ha ku na ni bapolofita mwahal'a mina ni iponahaza ku bona ka lipono, mi ni bulela ni bona ka litolo. 7#Maheb 3.2 Fo, kwa fapahana ni ha ni bulela ni mutang'a ka Mushe. Ni mu beile kuli a be muzamaisi wa batu ba ka kamukana, bona Maisilaele. 8Cwale ni bulela ni yena lu nze lu talimani hande-nde, mi isiñi ka linguli. Yena mane u boni sibupeho sa ka! Cwale mu bile ni pilu-tata cwañi kuli mane mu bilaele ka za mutang'a ka Mushe?”
9Muñ'a Bupilo a ba nyemela h'a kauhana ni bona. 10Mi lilu la zwa fa Tende. Kapili-pili litalo la mubili wa Miriame la apeswa ki butuku bo bu yambukela, mi la fetuha busweu twaa. Aruni a mu talima, mi a bona kuli u tahezwi ki mbingwa. 11Kih'a li ku Mushe, “Muña ka, u si ke wa lu utwisa butuku kabakala sibi se, se lu ezize ka butoto. 12U si ke wa lumela kuli a swane ni sifolozwani se si cilwe neku.”
13Cwale Mushe a itilelela ku Muñ'a Bupilo, a li, “Mawee, Mulimu, u mu folise!”
14 #
Lipa 5.2-3
Muñ'a Bupilo a alaba, a li, “Kabe ndat'ahe n'a mu kwezi mati fa pata, kana n'a si ke a feza sunda a nz'a swabile, nji? Kabakaleo u mu tuhele, a ine kwand'a mafulo sunda mutumbi, mi mwamulaho a sunda, kihona a ta kutiswa.” 15Miriame a zwiswa mwa mafulo sunda mutumbi, mi batu ha ba si ka funduka ku fitela a kutisezwa mwa mafulo. 16Cwale ba zwa mwa Hazeroti, mi ba y'o tibelela mwa Parani.
Lozi Interconfessional Bible, Catholic Edition © Bible Society of Zambia, 2009.